Dalam mbang nao ngak bruk pak tỉnh Hậu Giang, dah page ini, Ủy viên Mintri Chính trị, Phó akaok Quốc hội Trần Thanh Mẫn hu alin hadiah 4,8 tỷ đồng piah daong padang ngak 2 danak dak jalan mbak puk palei di huyện Châu Thành saong alin hadiah 50 paok pandap ka dom sang njauk bala jru mek k kalik, dioxin dalam tỉnh, yaok pok pandap yaom 1 triệu 200 ribau đồng.  Tapa nan, Phó akaok Quốc hội jeng hu nao pasang iek jalan Kênh Xáng Nàng Mau 2, di phường Bình Thạnh, ban sit Long Mỹ. Jalan ini hu padang ngak atah di ini labaih 15 thun, urak ini daok mbaih mbaoh, ngak kan kandah tal bruk nao mai di bhap bini saong mbuan hu bala ka radaih nao mai.

  Uan Sen Dolta di urang Khmer Nam bộ, kapul urang di Bộ chỉ huy Bộ đội Biên phòng tỉnh Sóc Trăng hu mai ravang saong tadhau ayuh mikva  Khmer di 10 labik baha bhum tasik taphia negar dalam ban sit Vĩnh Châu. Tapa nan, Đồn Biên phòng Lai Hòa, Bộ đội Biên phòng tỉnh Sóc Trăng jak ba, ieu pataom hu 100 pok pandap piah alin hadiah brei ka dom urang Khmer sang kan kandah daok daok dalam xã Lai Hòa saong Vĩnh Tân, ban sit Vĩnh Châu.

  Yaom nghêu di dom bhum raong nghêu di tasik Tân Thành, huyện Gò Công Đông, tỉnh Tiền Giang daok hu yaom meng 30.000-40.000 đồng sa kg, tagok jang tukvak ini di thun dahlau lac labaih 10.000 đồng/kg. Meng năng suất tui kuhria lac 16 tấn/ha, urang nong mek nghêu pablei di urak ini hu meng 400-450 triệu đồng. Bruk raong nghêu di bum tapen tasik Gò Công hu ba bruk ngak mbang, duah jien ka bhap bini bhum tasik Gò Công, gam tui di nan jeng hu pabak pandap ka urang blei mbang saong pablei tabiak negar langiu.

Piah pacang caga ribuk ka 4, tỉnh Ninh Thuận hu tacei jalan ka dom kapal gilai daok di tasik tame labik plaih siam mekre. Urak ini Ban Chỉ huy pacang caga bala meng langik tasik saong daong duah urang gaok bala tỉnh hu panuac ieu tal 2.489 sruh kapal gilai gam saong 15.112 urang ngak. Daok labaih 400 menuac ngak di mangaok  327 baoh bè raong ikan jeng hu ba nao tal labik salamat, tacei pato kak kajap bè raong ikan, piah takik khat lahik tuk hu bruk jhak rah tabiak. Dom gah chức năng jeng hu pasang iek catang dom danao ia, khik salamat ka danao, binek jeng yau rahra daok di bhum gah ala.

Kayua ribuk ka 4, meng melam ini (26.9), TPHCM saong dom tỉnh, ban gah maraong daok hu hajan di rilo labik saong hangin khang, hu labik hu hajan biak khang. Hajan rilo meng 20-40mm/24h, hu labik hu tal labaih 50mm dalam 24 maong. Dalam hajan hangin khang meda hu cakala saong hangin biak khang. Taphia di nan, ia di dom bilai bhum gah mala kraong Bei Gon - Đồng Nai meda tagok biak samar dalam dom harei anak tal. tabung glaong di mbang ini meda rahtabiak meng harei 27-28.9.

Urang jakar Philippines daok samar brei pandap mbang ka yaok rabau menuac nao plaih di rabuk khang Noru tuh tame ban ine Manila saong dom tỉnh gah barak taneh ia ini, ngak brei takik di abih 5 urang metai saong rilo labik daok dauk dalam ia. Noru lac ribuk ka 11 saong lac rabuk khang abih tuh tame Philippines meng akaok thun tal ini, hu ngin khang 195 km/h saong tagok tal 240 km/h di puac harei 25/9.

Dom sruh gilai pajeng pandap panda tapa negar di dua taneh ia Triều Tiên saong Trung Quốc hu pambuak veik hadei di 5 thun brei padeih. Bruk pajeng pandap panda meng jalan radaih pasei tapa 2 taneh ia hu brei padeih meng bilan 4 kayua jit ruak COVID-19. Dom kapul daong di dunya brei thau lac, sarak brei kareih pabah mbang negar lac makna ba tal bruk kinh tế Triều Tiên njauk patrun, ba tal bruk yaok ribau rahra kan hu pabak pandap mbang.

Di mbang taom gaok gah langiu mbang nyaom 77 di Đại Hội đồng Liên hợp quốc daok rah tabiak di Mỹ, Tổng Thư ký Liên hợp quốc Antonio Guterres hu ndom veik panuac sanya di Liên hợp quốc dalam bruk daong rajaei Yemen saong ndom lac brei ieu pataom yaok prein khang piah daong ngak pahla ka menuac sia taneh ia ini. Gam haong nan, hu panuac lac Liên hợp quốc jeng daok kham merat abih drei piah daong ka bruk njauk gauk padeih mesruh di Yemen saong dui atah harak sanya ini. Yemen laik tame bruk mesruh gauk meng thun 2014, tuk kol Houthi meblah mek dom tỉnh di gah barak taneh ia ini./.

Urang lang: M.P & H.Pha – 26/9/2022