Dalam bilan ngak ka uranaih thun ini, tỉnh Kiên Giang hu peih ngak rilo danak dak, bruk ngak hu makna. Dalam nan, sangka daong ka uranaih gaok kan kandah di bhum tapen negar, bhum kaoh pulao, uranaih bangsa takik, daong ka dom adei hu mbuan lagaih piah bac taa, ma-in sambai,… daong padang labik daok salamat, siam makre ka uranaih. Dalam tỉnh Kiên Giang urak ini hu labaih 409 ribau uranaih umo mala 16 thun; dalam nan hu labaih 3.000 uranaih biak kan kandah saong labaih 26.000 uranaih tui kuhria mbuan laik tame kan kandah khang.

Sở Ngak nong saong patagok palei pala Cần Thơ pambuak haong UBND huyện Cờ Đỏ bahrau brei thau bruk pablei 2 tấn pa-ok xoài tượng kanduh hijao camereip abih tapa Australia saong Hoa Kỳ. Bruk nan di Cần Thơ brei mboh bruk mbeik drei di gah ngak nong, salih meng jalan ngak sit sot tapa ngak tui jalan pambuak gauk catang tui chuỗi giá trị haong doanh nghiệp piah padang dom bhum pala praong. TP Cần Thơ hu abih tih taneh pala phun mbang baoh labaih 25.000 ha. Urak ini, Cần Thơ hu 193 mã số bhum pala haong taneh pala praong abih tih 2.600 ha, dom pandap siam chất lượng glaong di ban CT hu pablei tapa dom darak pasar kan tame saong hu yaom glaong. 

Dom harei tapa, di rilo mblang hamu trun pajaih aval padai Hè thu, urang ngak nong pak tỉnh Hậu Giang hu yuak padai dalam bui sambai kayua pablei hu yaom. Bilan padai Hè thu thun ini, urang ngak nong trun pajaih hu jaik 74.200ha. Urak ini dalam tinh yuak hu labaih 1.000ha padai Hè thu, haong nang suat hu  labaih 6 tấn/ha. Tui kuhria di urang ngak nong, meng nang suat saong yaom pablei yau urak ini, urang ngak nong hu laba meng labaih 30 triệu đồng/ha.

Yaom hadang ngak pandap di tỉnh Bến Tre daok trun khang ngak ka urang raong hadang pandar ilamu kong nghe glaong di dom labik tapen tasik gaok kan kandah dalam bruk buh jien peih praong mbaok taneh raong. Yaom hadang thẻ janih 100 drei/kg lac 70.000 đồng; janih 30 drei/kg labaih 115.000 đồng, trun 40.000 đồng/kg duk haong 2 bilan dahlau. Tui yaom yau nan, urang raong hadang di Bến Tre oh hu laba. 

Cục Cảnh sát duah thau toi pham ka ma túy (C04), Mintri Công an hu panuac brei thau ka janih jru phin bahrau biak jhak ka prein yava hu angan fentanyl. Urak ini, Fentanyl daok hu pandar biak rilo di Mỹ saong dom taneh ia, thun 2023 negar Mỹ hu labaih 100.000 urang metai (meng umo 18 tal 45 thun) kayua pandar Fentanyl biak rilo. Fentanyl hu pablei lau tame Mỹ meng Mexico saong dom taneh ia Trung saong Nam Mỹ. Bruk ngak tabiak saong pajeng ba Fentanyl daok ngak ka bruk saron mbon di dom taneh ia Trung - Nam Mỹ biak sarau kadau. Dalam bhum Đông Nam Á, Fentanyl hu duah mboh, pataom mek di Myanmar, Lào, Thái Lan. Bahrau ini, Thái Lan hu pataom mek labaih 510 tấn Anilin, meda pandar piah ngak tabiak 85 tấn Fentanyl.

Trung Quốc hu peih sa bruk duah thau pacang pablei khut yaom ngan saong ralow pabui saong dom pandap karei hu blei tame meng Liên minh châu Âu, bhian lac meng Tây Ban Nha, Hà Lan saong Đan Mạch, piah cagar veik bruk patakik brei pablei tabiak negar langiu radaih điện di taneh ia ini. Mintri pablei salih Trung Quốc khan lac, bruk duah thau     hu peih ngak tui harak đơn khiếu nại di Gah raong glang Trung Quốc payua di harei 6/6. Bruk duah thau hu ngak salah dahlau di harei 17/6/2025 min meda dui atah jang 6 bilan meyah hu panuac caong.

Rayo papar binguk negar Triều Tiên brei thau, Tổng thống Nga Vladimir Putin tapa rivang pakat karja tal negar Triều Tiên meng harei 18 - 19/6. Ini lac mbang ka 2 Tổng thống Putin mai rivang Triều Tiên, hadei di mbang mai rivang camriep di bilan 7/2000. Mbang rivang rah tabiak dalam tuk Moscow saong Bình Nhưỡng daok patagok talei pambuak bruk dalam tukvak jaik di ini. Hãng thông tấn TASS saong Điện Kremlin urak ini oh khan brei thau cambaih laih ka mbang ravang. Min, tui adat cambat dunya, Tổng thống Putin meda hu mbang taom gaok haong urang pan akaok negar Trieu Tien lac ong Kim Jong-un saong dom bruk ngak karei dalam tukvak daok pak Bình Nhưỡng.

Urang jakar ngak praong di Italia khan lac hu 2 bruk kram kapal di langiu tasik taneh ia ini dalam harei 17/6 ngak brei takik di nyu 11 urang di cư matai saong 66 urang karei jeng daok lahik. Urak ini gah khik iek takai tasik Italia daok duah daong urang gaok bala di Địa Trung Hải. Dom urang di cư nao mai meng gilai tasik tapa Địa Trung Hải bhian gaok bala saong matai rilo ka yua langik jhak saong kapal gilai oh siam. Tui gah Di cư dunya di Liên hợp quốc, kuhria meng akaok thun tal ini, hu jaik 1.000 urang matai atau lahik tuk nao tapa Địa Trung Hải, takik jang duk haong 3.155 urang di thun 2023.