Piah pacang caga bruk mbuan njom mbak jit ruak cúm A/H5N1 njom tame kayua pajeng ba, pablei salih manuk ada, pandap ngak meng manuk ada blei suan hukum meng negar langiu tame Việt Nam, Mintri ngak nong saong patagok palei pala hu sarak ieu kakei dom tinh, ban samar drah paglaong bruk pasang iek, abih di nyu nan lac di dom pabah mbang negar, jalan praong, jalan sit, jalan pabah mbang negar, pabah lamnge, jalan kraong… piah samar drah duah mboh saong langyah catang dom bruk pablei salih, sik ralaow, pajeng manuk ada, pandap ngak meng manuk ada suan adat hukum tame Việt Nam, abih di nyu nan lac dom tinh tapen negar gah Maraong. Meyah chap mek hu dom pandap athur, ralaow athur pajeng suan adat hukum ye njauk ba nao am cuk klaak chip.

Daok di tỉnh An Giang, labik jaik taphia negar Campuchia, jeng daok peih ngak khang, ngak samu gauk dom jalan pacang caga ruak cúm menuk ada. Dalam nan, gah chức năng hu klauk vắc xin cúm A/H5N1 ka tapon ada labaih 2 triệu drei. Gam haong nan, brei pruh jru pametai anek ruak dom radaih pajeng, labik caik pablei ralow menuk ada, athur raong, labik raong glang, dom labik sik ngak ralow menuk ada, athur raong, patagok bruk pathau khan, jak ba sang raong brei klauk dom janih vắc xin caga ruak ka tapon athur raong, dalam nan pataom tame klauk vắc xin cúm ka menuk ada.

Tỉnh đoàn Long An peih tabiak Bilan dam dara ngan haong kadha “Umo ranaih ba akaok nao dahlau dalam salih số” uan salam pahadar 92 thun Harei padang Kapul dam dara Cộng sản Hồ Chí Minh (26-3-1931 – 26-3-2023). Dalam bilan Dam dara, kapul dam dara dom pakat meda peih rilo bruk ngak salih số gam dom bruk ngak langyah pato tacei bruk ngak, yaih khan bruk ngak, daong ka dam dara peih bruk ngak mbang, padang mbang ngui, yam tagok ngak kaya mada. Gam tui di nan, Tỉnh đoàn hu ba tabiak ngak 15 danak dak: jalan hala dok taneh ia; 7 baoh sang ayut saabat saong sang khăn quàng đỏ; 1 danak dak tatua nao mai di palei; jao 50 paok pandap, jien bac ka anek saih yam tapa kan kandah, bac da-a naih joi; 100 paok pandap ka rahra gaok kan kandah gam saong rilo bruk ngak karei.

Mesup ini (27/2), sa baoh kapal praong pajeng tuai dunya angaok jalan nao ravang me-in Đông Nam Á hu vaih tame pabah lamnge Tân Cảng - Cái Mép, ban sit Phú Mỹ, tỉnh Bà Rịa – Vũng Tàu. Tàu ba labaih 3.800 tuai dunya tal Việt Nam ravang me-in. Ini lac kapal du lịch dunya ka 7 saong lac sruh kapal pajeng rilo tuai di abih mai tal Bà Rịa – Vũng Tàu kuhria meng akaok thun tal ini. Sruh kapal praong nan daok dalam top 10 sruh padeih padei pakat glaong angaok tasik di dunya. Ini jeng lac kapal du lịch praong abih vaih tame Bà Rịa- Vũng Tàu kuhria meng bilan 10/2022 hadei di tuk jit ruak COVID-19 hu pacang veik.

Tukvak tapa, di TP Hồ Chí Minh saong di dalam taneh ia rahtabiak rilo bala jalan mbak biak trak damak, bo makna lac kayua urang peih radaih manyum alak mbia, jru phin, chất kích thích. Piah samar pasang iek, pacang caga dom bruk ngak suan di jalan mbak, công an TP Hồ Chí Minh hu jhul khang bruk pasang iek jru phin, nồng đồ cồn di dom pabah lamnge, labik pataom rilo urang peih radaih pajeng pandap, radaih container nduac jalan atah. Dom kapul meda salih gam gam jalan pasang iek, luac harei melam, gam tui di nan jeng langyah biak catang dom urang cagar veik saong oh caik rahtabiak bruk “can thiệp” tuk cảnh sát jalan mbak daok langyah dom urang ngak suan.

Tui rayo papar binguk karja Triều Tiên, ong Kim Châng Ưn (Kim Jong Un) - urang pan akaok Triều Tiên bahrau dang akaok mbang nyaom di dom urang ngak praong Đảng Lao động cầm quyền, ginum biai ka bruk pasiam kinh tế saong gah ngak nong, kayua huac bruk kurang padai brah, jeng yau bruk srau kadau gah daong ngak pahla nyu tagok rilo. Mbang nyaom rah tabiak dalam tuk bruk padai brah di Triều Tiên mboh yau daok jhak nao tuk taneh ia ini ba tabiak dom adat pacang cakak kayua jit praong COVID-19 gam haong dom bruk taong phat catang di dunya pambuak tal danak dak vũ khí hạt nhân saong tên lửa đạn đạo daok ba tal kamlah gauk.      

Tui Danak dak Pandap mbang Dunya (WFP), yaok trieu urang di Đông Phi mbuan laik tame bruk eik lipa, dalam tuk bhum ini daok dang anak mbang tua riya pandiak bhang trak damak di abih kuhria dalam 60 thun tapa, hadei di 5 bilan hajan oh siam. Tua riya pandiak bhang khang jeng ngak ka 3 triệu urang di Somalia, Kenya saong Ethiopia daok gaok bruk lahik an ninh lương thực di tanut samar drah. Bruk ini jeng hu makna lac dom urang ini bhian ein mbang dalam dom harei saong njauk pablei drap ar di drei piah diuk.

Dom menuac metai dalam dom mbang hajan rabuk glut jaleih taneh khang dalam 1 adit tapa di bang Sao Paulo, đông nam Brazil tagok tal 65 urang. Karja pak nan brei thau, bruk brei ngak dahlau urak ini jeng lac pataom tame daong ka dom urang di bhum njauk bala meng langik tasik. Bol bala, lin padam pui, urang cứu hộ, urang halan hatian jeng daok kham merat kuac raok, duah rup tau dom menuac metai saong dom menuac daok lahik. Jaik 2.440 urang lahik sang danaok bahrau hu ba nao labik karei chip kayua mboh lac daok mbuan hu dom mbang glut jaleih bahrau./.