Page ini 20/7, Akok negar  Võ Văn Thưởng hu mbaok tuk peih bruk padang ngak danak dak Pasak Y tế  Quân - Dân Y huyện Côn Đảo saong brei ba tame pandar Tapen gilai pajeng tuai Côn Đảo.  Pasak Y tế Quân – Dân Y huyện Côn Đảo hu yaom jien buh tame ngak abih tih 247 tỷ đồng ngan haong 60 gaiy laneng ndih, sumu sang iek ruak đa khoa hạng III, hu pandar công nghệ birau, pabak bruk iek ruak asar siam glong. Tuk salah blaoh Pasak brei pabak bruk iek ruak dak harei dak glong ka bhap bini, urang lin, tuai damuai, tapa nan rik tame khik brei salamat saong paglong  asar  raidiuk di bhap bini.

Dalam 5 thun ngak tui Chỉ thị ka 19 di mBan Bí thư ka patagok bruk ngak di bhum bangsa Khmer dalam tukvak bharau, tỉnh Sóc Trăng hu daong ka jaik 26.900 baoh sang kan kathaot bangsa takik, daong ia pandar tal labaih 2.800 sang saong salih bruk ngak ka 555 sang, jak ba rahra rik prein yava, jien padai tame daong ngak sang ka urang kan kathaot hu 3.496 baoh, dalam nan, labaih 1.200 baoh sang ka urang bangsa Khmer. Bruk iek glang prein yava ka bhap bini bhum bangsa takik, bhum biak kan kandah daok hu sangka peih ngak, ilamu siam mekre meng kan hu khik ramik saong atagok.

UBND tỉnh An Giang birau ba tabiak bruk padang  Hệ thống khik ia taba gam haong hạ tầng duh ka bruk pambuak bhum pala drak Pak krieng Long Xuyên labaih 3.185 tỷ đồng. Danak dak  praong labaih 3.000 ha, daok dalam  jalan tathuak ia ribuk  Châu Đốc - Tịnh Biên, di labik pacang ia ribuk bhum Tứ giác Long Xuyên. Tui UBND tỉnh An Giang, bruk dak padang “ danao padang ia taba” piah caga ribuk, pabak ia ka bhum taneran krang Cuu Long. Hadei tuk salah blaoh, he thong caga ia taba gam haong hạ tầng  duh ka bruk pala drak di  bhum Tứ giác Long Xuyên meda ba ia pruh 30.000 ha taneh ngak nong dalam bhum Tứ giác Long Xuyên.

Tukvak jaik di ini, rilo sang pala thanh long di huyện Xuyên Mộc, tỉnh Bà Rịa - Vũng Tàu daok biak duh hatai kayua yaom trun biar, daok mala 2000 đồng 1kg, janih baoh mekre piah pablei tapa negar langiu yaom jeng daok 8000 đồng 1kg. Kuhria tal bilan 5/2023, tỉnh hu labaih 712 ha pala thanh long, dalam nan 671 ha daok paik baoh, pataom rilo di 2 huyện Xuyên Mộc saong Châu Đức. Sa thun urang nong hu pala 2 vụ thanh long, bilan chính vụ lac tame bilan hajan saong bilan karei lac di bilan thu yau urak ini, haong baoh paik hu abih tih lac 6.000 tấn sa thun. Min hu tal 80% baoh hu pablei tapa Trung Quốc tui jalan tiểu ngạch.

Muk Ngô Thị Kim Chi umo 64 thun, bac di Pasak pato bruk ngak – Pato thuong xuyen Quận 7, Ban raya HCM pakacah tamat  THPT thun 2023 mek hu 31,55 điểm.  Gru Nguyễn Quang Phú nan lac gru dang akok tal bac di muk  Kim Chi khan lac: “ Tanut pakacah nan biak njauk hoang bruk kham merat bac di muk Chi. Umo thun praong  yau nan ye muk gaok oh  takik kan kandah. Muk samar val saong sahaneng suai jang dom ayut ranaih jeng. Min muk oh padeih kham merat bac da-a.  Meng tal bac 6 tal tal bac 12, muk Chi  tuk halei  bac naih joi. Muk pakacah mek giải nhì mbang pakacah địa lý pakat ban raya thun bac tal 9 saong giải ba di mbnag pakacah tuk bac tal 12. Muk lac sa dalam dom urang yau kareih camin  hadah “ yam tapa kan kandah bac megru naih joi” di sang bac.

Karja ban Valladolid di Tây Ban Nha daok tabiak panuac ieu rahra padeih pandar radaih ô tô di drei piah patrun bruk nerak. Panuac ieu nan hu ba tabiak dalam tuk taneh ini daok hu sa mbang pandiak khang haong nhiệt độ tagok glaong oh ka bhian mboh di dom labik, ngak ka nerak langik tasik tagok khang. Urak ini nhiệt độ tagok tal 45,3 độ C di bhum Catalonia, gah Đông Bắc taneh ia ini.

Takik di nyu lac 4 urang metai saong labaih 100 urang njauk taneh patau glut jaleih kateik lahik di page ini 20/7 di bang Maharashtra, miền tây Ấn Độ kayua hajan praong dui atah. Gah daong duah urang gaok bala urak ini daok gaok kan kandah dalam hajan praong piah duah dom urang  daok diuk dalam mbuk patau kayau jaleih kateik tagok.  Min bruk daong urang daok gaok rilo kan kandah  kayua patau jaleih kateik trun dalam jaik 10m. Hajan khang dui atah ba tal dom sang bac brei kareik pabah mbang, jalan mbak dauk dalam ia, dom mbang radaih apui brei padeih peih./.

Gah Y tế thế giới (WHO) tabiak panuac brei thau lac lô jru siro taong ruak patuk saong sru la-an Naturcold daok hu pablei di Cameroon hu janih độc hại diethylene glycol biak glaong. Tui WHO, janih diethylene glycol tok hu brei pandar oh tapa 0,1%, min nyu hu dalam siro Naturcold tagok tal 28,6%. Di bilan 4 meng bloh, gah khik ramik y tế di Cameroon brei thau lac daok duah thau dom bruk metai di uranaih hu pambuak tal siro Naturcold. WHO hu daong karja Cameroon ngak brei cambaih laih bruk ini./.