Gah Quảng Tây brei thau anak meta brei langyah bruk pandap daok tavak di pabvah mbang

Page harei 10 bilan 01 thun 2022, tỉnh Quảng Tây (Trung Quốc)  hu peih veik dom pabah mbang negar, jalan sit taphia negar di ban Đông Hưng, gah Việt Nam lac ban Móng Cái, tỉnh Quảng Ninh. Ini lac dom gu pabah mbang negar, jalan taphia negar hu makna biak praong ka pandap pablei salih nao mai di dua negar. Gah Quảng Tây brei thau anak meta brei langyah bruk  pandap daok tavak di pabvah mbang, abih di nyu lac kaya nong saong pandap la-ar. Yau nan, hadei di rilo kham merat ginum biai di dua gah, meng harei 5 bilan 1 thun 2022, rajaei tỉnh Quảng Tây brei peih veik dom gu pabah mbang negar, jalan tapen negar di Quảng Tây saong  Việt Nam.

Mintri Công Thương bahrau patabiak Sarak 25/2021/TT-BTC pasiam, pabak Sarak 33/2019/TT-BCT ka Hệ thống tiêu chí di Danak dak Angan je taneh ia Việt Nam, hu ba tame pandar meng 7/2/2022. Tui nan, doanh nghiệp hu tut angan pilih ruah pandap mek hu Angan je taneh ia lac doanh nghiệp hu padang ngak tui hukum Việt Nam saong kayua kapul nyaom, manuac urang Việt Nam khik labaih 50% phun jien tui hukum atau cổ phần phổ thông di doanh nghiệp nan. Meyah doanh nghiệp oh pabak hu bruk gah phun jien min hu pandap hu mbaok tame pilih ruah brei mboh dom bruk siam lagaih di Việt Nam, rik daong paglaong thaot binguk saong yaom glaong angan je taneh ia Việt Nam ye Hội đồng Angan je taneh ia Việt Nam pasang, tabiak panuac. 

Var ginum biai di Ban tacei jalan pacang caga jit ruak Covid-19 saong pasiam veik kinh tế TPHCM, brei thau ka bruk parabha urang ngak bruk hadei Tet thun sak Rimaong 2022 peih tabiak di harei kabroi, ong Nguyễn Văn Lâm, Pho Yam ndoc Sở Lao động, Thương binh saong  Xã hội Ban raya HCM brei thau, ngan saong dom urang ngak hadei Tet, ban raya  kuhria mboh dahlau brei hu jaik 45.000 urang ngak naih bruk, pataom tame  dom bruk pablei salih, kalik takhaoh, điện tử, cơ khí, điện lạnh.

Bruk raong pabe, pabo lac 2 dalam 6 janih dalam angan pandap kaya nong praong abih di tỉnh Ninh Thuận. Ong Đặng Kim Cương– Giám đốc Sở ngak nong saong patagok palei pala tỉnh Ninh Thuận brei thau, suai lavik, tỉnh meda roh duah ba pabe, pabo tame pablei dalam dom siêu thị. Ngak hu yau nan ye ralaow pabe, pabo hu rilo jang laboik pablei tani tanat yaom kaom. Urak ini tỉnh Ninh Thuận hu tapon pabe, pabo labaih 250.000 drei, dalam nan pabo hu jaik 120.000 drei saong pabe labaih 130.000 drei. Ralaow pabe Ninh Thuận hu Cục Sở hữu trí tuệ - Mintri ilamo saong Công nghệ brei harak daong khik angan je, ralaow pabo hu brei harak tacei pato địa lý ka ralaow pabo hu asal meng “Ninh Thuận” piah brei mboh chất lượng saong angan je pandap panda di tỉnh ini.

Biar harei 10/1, Công an Quận 12, TP.HCM brei thaudaok khik 7 urang kayua khin ngak urang njauk rambuac. Tui Công an Q12, ini lac kapol urang taong ong N.V.H.  umo 50 thun, yam ndoc sa công ty di harei 3/1. Taong paoh ong H barah meta, tapa dut iek laka 21%. Tui duah thau camereip, ong H hu pambuak bruk pah sang di ong Trần Văn Thạch di huyện Hóc Môn. Hadei di nan, dua urang mesao gauk ka jien ndo. Kayua oh ndok hu jien yau nan ye Thạch  pah kapol urang nan taong ong H piah ngak ka ong H huac bloh bayar jien. 

Kayua huac lac meda tagok bruk mbuan njom pambak di Covid-19, abih di nyu nan lac biến thể Omicron, di tukvak Tết meng kan daok jaik tal, hu takik di nyu 7 tinh, bal saong ban sit di Trung Quốc hu tabiak harak ieu pachreihg bhap bini patakik bruk nao mai saong bruk daok viek di palei dalam mang padieh padai, anak mbang tabung glaong nao me-in Xuân saong bruk nao mai praong abih yaok thun hu angan “Xuân Vận”. taphia di nan, dom tinh, ban karei brei thau lac meda pabak dom paok jien daong hu yaom meng 500 nhân dân tệ (samu 78 USD) tal 1.000 nhân dân tệ (156 USD) ka dom urang halain hatain daok viek dalam mbang padieh padei.

Harei kabroi 10/1, Pasak Pasang iek saong  pacang caga jit ruak Mỹ (CDC) saong Mentri Ngoại giao taneh ia ini hu panuac kakei juai nao ma-in dulich tal taneh ia jaik taphia lac Canada kayua urang njom Covid-19 tagok dalam tuk biến thể Ô-mi-crôn pambak praong. Pasak Pasang iek saong pacang caga jit ruak Mỹ brei tagok tanut kakei juai nao mai haong Canada tagok pakat 4, nan lac pakat biak glong. Jabat ini jeng ba tabaik labaih 80 labik rivang ma-in di dunya daok di pakat 4. Pasak Pasang iek saong pacang caga jit ruak Mỹ brei thau, uirang Mỹ njauk klauk jru pacang ruak ginup dahlau di tuk nao rivang ma-in dulich tal dom labik hu jit pakat 3. Harei kabroi, dom urang tame iek ruak di Mỹ tagok tabung glong abih lac labaih 132.600 mbang.

Rajaei Indonesia brei thau lac meda pambuak viek meneing bruk pablei dhang tabiak negar langiu meng harei ini (11/1) saong dom bruk pablei dhang tabiak negar langiu meda hu pambuak viek meng harei paguh (12/1). Dahlau di nan, harei 1/1, Indonesia brei padeih bruk pablei dhang tabiak negar langiu dalam 1 bilan kayua rilo doanh nghiệp oh ka ngak hu Sarak Nghĩa vụ Thị trường dalam taneh ia, ngak ka rilo gah pabak dhang ka dom sang mac laik tame tanut biar biak trak, ba tal bruk mbuan kurang dien praong./.

Urang lang: Thu Thao – Bhumi – 11/01