Akok QH Vương Đình Huệ peih pakak mbang nyaom

Page harei ini 20/10, di Sang QH ( Hà Nội), Mbang nyaom ka 4, QH mbang XV hu peih tabiak dalam praong prang. Dalam var page ini, hadei kadha ndom puac peih pakak mbang nyaom di Akok QH Vương Đình Huệ, Thủ tướng Rajaei Phạm Minh Chính puac harak pathau khan dom jak jeng di bruk patagok kinh tế - xã hội thun 2022;  ba tabiak jalan patagok kinh tế - xã hội thun 2023; Akok UB Kinh tế di QH Vũ Hồng Thanh puac harak pathau khan taong yaom jak jeng di bruk peih ngak  cak rok patagok kinh tế - xã hội thun 2022; ba tabiak jalan cak rok patagok kinh tế - xã hội thun 2023.  

Anak bruk dom doanh nghiệp pablei lẻ xăng menyek kreik pabah mbang atau padeih pablei salih rilo meng lac di dom tỉnh, ban gah meraong negar yau ye: TP Hồ Chí Minh, Cần Thơ, An Giang, Bình Phước… ngak kan kandah tal raidiuk saong bruk ngak mbang, pablei salih, Thủ tướng Rajaei Phạm Minh Chính brei bruk ka Akaok Mintri Công Thương sangka tacei pato tani tanat bruk darak pasar xăng menyek, abih di nyu lac dom labik pablei xăng, oh caik brei srau kadau. Dahlau di nan 1adit, Phó Thủ tướng Lê Văn Thành jeng hu ginum biai ka bruk khik ramik saong pabak xăng menyek ka darak pasar dalam taneh ia.

Pamong tal Pahadar  100 thun harei menek ong Võ Văn Kiệt, tỉnh Vĩnh Long hu peih bruk padang ngak rilo danak dak duh ka raidiuk bhap bini nan lac: Pasak nyaom biai tỉnh Vĩnh Long, Danak dak padang ngak tatua Cái Càm 2,  di angaok jalan Võ Văn Kiệt, Cầu Cái Côn 2, jalan pambuak jalan Phạm Hùng tal jalan Võ Văn Kiệt, ban Vĩnh Long saong danak dak peih praong jalan 61B di huyện Vũng Liêm. Urak ini, dom gah padang ngak daok jhul pasamar bruk ngak piah sumu ba tame pandar.

Akaok UB bhap bini tỉnh Sóc Trăng bahrau hu harak samar drah tacei pato dom puk palei samar peih ngak dom jalan caga dahlau haong mbang triều cường puac thun ini.  Tui kuhria mboh dahlau, tabung glaong mbang ia tagok di bilan 10 thun ini glaong jang duk haong kuhria rah tapa dalam rilo thun. Tabung glaong ia tagok glaong abih di Trần Đề tal 2,49m;  di Đại Ngãi lac 2,26m di dom harei 27 - 31/10 tal. Tui kuhria ia meda glaong jang di dom bilan puac thun saong nyu meda glaong jang meyah langik tasik oh siam rah tabiak  dalam tuk ia tagok.

Tapa jamraih pasang iek, gah y tế mboh hu urang ruak đậu mùa khỉ ka 2, hadei di tuk tame negar tapa Mblang kapal haok Tân Sơn Nhất. Nan lac urang kumei, umo 38 thun, daok di tỉnh Tuyên Quang, nao ma-in dulich pak Dubai meng hahei  29/9 tal harei 18/10. Urang mboh hu dom kadha di ruak đậu mùa khỉ meng harei 11/10 yau padiak, glaih glar, glaoh ta-oh saong tamuh mun hu laneh angaok rup. Urang ini bhian hu daok dalam sang haong urang ruak đậu mùa khỉ camereip( urak ini abih ruak) di Dubai.

Tui urang jakar ngak praong di Thái Lan, bruk ia dauk ia sua kayua ribuk Noru di puac bilan 9 saong hajan praong di akaok bilan ini meda ngak patrun sản lượng brah dalam bilan pala praong saong jeng daok biak aval piah kuhria dom khat lahik kayua ia dauk ia sua jeng daok rah tabiak di rilo labik dalam taneh ia. Tui kuhria mboh, ia dauk ia sua dalam bilan 8 saong bilan 10 meda ngak brei sản lượng brah dalam bilan pala praong nyu trun, ngak brei khat lahik labaih 70 triệu USD saong meda ngak brei yaom brah Thái Lan daok daok di tanut glaong dalam tukvak ini. Meyah ia dauk ia sua ngak trun sản lượng brah dalam taneh ia ye bruk pablei brah tabiak negar langiu di Thái Lan dalam thun tal oh siam lagaih.

Gah Y tế Dunya WHO bahrau ndom lac, jit ruak COVID-19 jeng daok ba tal bruk samar chip di dunya hadei di jaik 3 thun. Tui UB drah samar  di WHO, yaom lac urak ini, bhap bini di rilo labik jia lac jit COVID-19 abih blaoh, min ini jeng daok lac bruk kan kandah gah y tế bhap bini meda ngak kan kandah khang tal prein yawa bhap bini di dunya. Yaom lac urang ruak COVID-19 metai yaok adit trun biar abih kuhria meng tuk jit ruak tamuh tabiak, COVID-19 jeng daok lac ruak ba tal metai rilo jang dut saong dom ruak karei kayua virut.

Sa bruk karei jang labik karei hu mboh di Upla, sa palei sit di bang Maharashtra (Ấn Độ), labik hu 1.600 menuac daok haong jaik 100 drei kara kanyik katam Rhesus.  Menuac sia dalam palei Upla biak iek praong dom drei kara nan ye tut angan ngak po 129.000 m2 taneh dang angan dom drei kara ini. Dahlau daih, taong abih dom adat cambat dalam palei Upla jeng hu mbaok di kara. Menuac sia dalam palei brei kara mbang tuk halei nyu mai di anak sang. Hu dom menuac jeng daok tui bruk alin hadiah pandap brei kara dahlau bloh hadei di nan meng ngak dom adat cambat./. 

 Urang lang: M. Phương & Bhumi – 20/10