Quốc hội mbang 15 hu peih tabiak tuk dah page ini (22/5), di Duk  ginum biai praong Diên Hồng, Sang Quốc hội. Mbang nyaom ini tui kuhria meda brei tapa rilo asal kadha hu makna praong, yau ye brei tapa 8 danak dak Hukum, 3 danak dak Sarak saong brei panuac ka 9 danak dak Hukum. Dalam nan, Hukum taneh riya (pasiam veik) daok hu Quốc hội brei panuac mbang ka 2. Sa asal kadha njauk caik hatai di mbang nyaom ini, nan lac Quốc hội pasang iek glaong abih bruk jak ba, khik ramik saong pandar dom prein khang piah pabak ka bruk pacang caga jit ruak COVID-19. Anak mbang nyaom ini, rilo cử tri caong maong dom urang QH ba tabiak jalan piah lang talaih dom kan kandah ka gah kinh tế piah mek hu bruk ba tabiak lac patagok 6,5% ka abih thun, ngak jeng kein lagaih khang kajap ka bruk ngak salah jalan ba tabiak ka luac tukvak 2021 - 2025.

Cty TNHH Pouyuen Việt Nam (TP.HCM) hu ginum biai njauk gauk brei padeih 4.430 urang ngak. Dalam nan, menuac ngak bruk labaih 20 thun, ngak bruk khik ramik hu daong jien glaong di abih lac labaih 320 triệu đồng. Dom urang ngak bruk mala 5 thun hu daong meng 15-30 triệu đồng. Yaom daong kuhria rah tapa ka yaok urang lac 130 triệu đồng. Tui kuhria, harei 30/6 ini, urang ngak meda taduan hu pok jien daong tapa tài khoản gilang pariak.

Kapul pachreih bac ban Cần Thơ bahrau peih bruk pok mayaom ka 28 anek saih bac naih joi pakat negar, dunya; jao 133 paok jien bac “Daong prein bilan pakacah” ka anek saih tal 12 sang kan kathaot, pachreih bac; gam tui di nan jeng taduan saong pok mayaom dom kapul, manuac urang hu rik tame “kadung jien pachreih bac, pachreih urang naih”. Meng bruk sa tangin haong gauk di rahra, tukvak tapa, labaih sa trieu anek saih, sinh viên saong gru pato kan kathaot di Cần Thơ hu daong ba samar drah,  abih tih paok jien jaik 400 tỷ đồng, rik daong praong tame bruk pato pakai, pasram megru paglaong ilamu ka ban Can Thơ.

Kapul urang kumei Việt Nam pambuak haong kapul urang kumei tỉnh Bình Phước bahrau peih bruk pathau khan paglaong ilamu thau ka bruk likei kumei samu gauk, pacang caga taong paoh dalam baoh sang, dalam sang bac ka urang kumei haong anek saih daok di xã Lộc Phú, huyện Lộc Ninh; daong 23 urang kumei bangsa takik mesraiy phun jien ngak mbang, yaok sang hu mesraiy 10 triệu đồng, alin hadiah 100 pok jien bac bruk ngak oh mek jien ka adei sa-ai kumei peih bruk padang mbang ngui. Gam haong nan, hu brei jien bac ka 120 adei anek saih kan kandah, takre bac da-a, peih labik pablei pandap yaom "0 đồng" brei ka labaih 400 uraniah saong urang kumei bangsa takik gaok kan kandah, daok di xã Lộc Phú blei dom pandap pandar yaok harei. Abih tih yaom jien alin hadiah pandap mbang ini, lac labaih 2 ti 700 trieu đồng.

Phú Quốc – Kiên Giang bahrau raok gilai Costa Serena pajeng 3.000 tuai dunya mai rivang main kaoh pulao Phú quốc. Pabah lamnge raok tuai Dương Đông, ban Phú Quốc hu peih bruk raok tuai biak chreih chrai ngan haong bruk hu mbaok di rilo kapul lữ hành du lịch, pajeng ba. Ini lac mbang gilai dunya camriep mai tal Phú Quốc hadei di jit ruak COVID-19. Tui pathau khan di Sở Du lịch tỉnh Kiên Giang, dalam bilan 5, Phú Quốc hu raok 38.640 mbang tuai dunya, 5 bilan akaok thun 2023, pulao Ngọc hu raok 318.311 mbang tuai.

 Nyaom biai pakat glaong di abih Kapul dom taneh ia ngak kong cakrok (G7) tamat blaoh hadei di 3 harei ngak bruk di ban Hiroshima, negar Japon. Di nyaom biai ini, dom urang pan akaok dom taneh ia G7 sanya pasang iek, daong jien padai haong daong quân sự brei ka Ukraine. Ini jeng lac bruk hu menuac sia dalam saong langiu negar Japon biak caik hatai sangka, abih di nyu lac gah ba khau tin di dom taneh ia hu mbaok dalam nyaom biai G7.  Pambuak tal bruk  kinh tế dunya, dom urang pan akaok G7 njauk gauk brei pataom sangka tal bruk salih karei di gah jien padai dunya, ba tabiak jalan ngak lagaih piah khik ramik tani tanat bruk jien padai.

Gilang paraik dunya (WB) taong yaom lac, bruk patagok kinh tế di Campuchia tui kuhria daok siam veik khang kadang saong meda mek hu 5,5% dalam thun 2023. Gilang paraik dunya jeng daok caong maong gah kinh tế Campuchia daok hu pasiam veik tuk gah buh jien tame, pablei salih, du lịch daok mai gilac veik saong prein khang di gah dịch vụ hu siam gilac veik yau dahlau di tuk ka oh tamuh jir ruak praong COVID-19. Min, Gilang paraik dunya jeng brei mboh hatai huac kanda tuk bruk caong meng darak pasa di negar langiu daok trun. Bruk ini meda ngak kan kandah tal bruk ngak mbang dalam taneh ia, dalam tuk gah kinh tế praong di dunya yau ye Mỹ saong Trung Quốc daok ngak catang bruk jien padai.

Taong Yam ndok Gah Thú y Dunya brei thau, dom rajaei njauk pasang iek klauk jru pacang caga cúm menuk ada piah plaih ka vi-rút jeng sa jit praong bahrau. Gah Y tế Dunya brei thau bruk pambak ruak tapa anek menuac meng cúm menuk ada jeng daok biar, min dom taneh ia njauk caga dahlau, huac nyu meda salih karei. Gah Thú y Dunya (WOAH) kakei lac, bruk klauk jru njauk pataom tame menuk ada raong palao, rilo meng lac ada, kayua cúm menuk ada njom mbak meng dom janih cim glai njom ruak./.