Danak dak jalan Vành đai 3 bana raya Hồ Chí Minh

Page ini 5/4, Thủ tướng Rajaei Phạm Minh Chính dang akaok Nyaom biai online pakat negar Rajaei haong dom tỉnh, ban ka bruk kinh te -xa hoi bilan 3 saong quý 1 thun 2022; peih ngak Danak dak pasiam veik saong patagok kinh te - xa hoi; bruk rah tabiak saong jalan ngak piah jhul samar bruk parabha paok jien, peih brei phun jien karja thun 2022. Di Nyaom biai, dom urang lambaok hu ginum biai bruk đầu tư, padang ngak saong caga đầu tư dom danak dak jalan mbak hu makna praong pakat negar, dalam nan hu jalan peih radaih drah samar Bắc Nam; Danak dak Mblang kapal haok dunya Long Thành; Danak dak jalan Vành đai 3 bana raya Hồ Chí Minh; 3 danak dak jalan peih radaih drah samar: Khánh Hòa-Buôn Ma Thuột, Biên Hòa-Vũng Tàu saong Châu Đốc-Cần Thơ-Sóc Trăng.

"Dom tỉnh, ban dalam bhum njauk pambuak gauk siam lagaih; kein laba, khang kajap, kein laba jang haong dom mban, dom mintri, dom gah  di Trung ương dalam bruk peih ngak danak dak  pakat negar  patagok  kinh tế - xã hội bhum bangsa takik song bhum ceik tuk vak  2021-2030; tuk vak 1 meng thun 2021 - 2025 ". Ni lac, panuac tacei pato  di  phaok akaok Thường trực Quốc hội Trần Thanh Mẫn di nyaom biai “peih ngak danak dak  pakat negar patagok kinh tế - xã hội bhum bhap bini bangsa takik song bhum ceik  tuk vak  2021-2025 bhum taneran krong Cửu Long” kayua  Ủy ban bangsa pambuak bruk  song Hội đồng bangsa di  Quốc hội song tỉnh Sóc Trăng peih ngak mesup ni di Sóc Trăng.

UB bhap bini tỉnh Tiền Giang birau njauk gauk brei peih ngak danak dak pasiam ar tasik Gò Công tuk vak ka 2 ngan saong phun jien abih tih jaik 200 tỷ đồng. Ini lac danak dak ba mai kein lagaih ralo dalam bruk pacang caga saong trun hanjul bala meng langik tasik di bhum tapen tasik Gò Công, pabak prein khang piah cak rok patagok kinh te –xa hoi ka bhum ia taba Gò Công di tỉnh Tiền Giang patagok palei pala tui jalan CNH, salih birau.

UBND TP.HCM kuhira ngak salah bloh bruk klauk vaccine COVID-19 ka 898.537 uranaih umo meng 5 tal mala 12 thun  dahlau di bilan 9/2022.  UBND TP.HCM ieu dom jabat pagam tal brei khan ka amaik ame, urang pasang iek di uranaih ka kein lagaih di bruk klauk vaccine song brei thau dom bruk meda gaok hadei di tuk klauk.

Urang pala lasun tím di Ninh Thuận daok chreih chrai kayua lasun pala njauk saong pablei hu yaom. Urak ini, akaok lasun that urang blei di hamu yaom meng 25.000-30.000 đồng sa kilo, yaom glong jang dua mbang dut saong puac thun 2021. Langik siam saong bruk pablei tabiak mbuan lagaih hu daong ka urang nong hu pabak prein piah jhul khang bruk pasiam veik pala drak hadei di jit ruak Covid-19.

Mintri jien padai Mỹ brei thau, oh brei adat peih bayar pok jien sre halei meng jien đô la meng kadung jien rajaei Nga di dom sarak jien ndua di Mỹ.  Min, Nga hu tuk vak 30 harei piah palih ruah meng bruk suak mek  đô la dok hu yaom atau jien mek tame meng bahrau pablei pandap. Meyah Nga oh bayar hu dom  pok jien trái phiếu meng jien đô la dalam tuk vak ni, ye Nga meda dang anak bruk mbuan si pacah sre.

Truyền thông di Sudan brei thau, 23 urang kumei metai tuk sa baoh phà kram di  bang Sinnar, bhum kreh negar taneh ia ini. Bala rah tabiak di harei 1/4, tuk nan angaok phà hu 28 tuai daok angaok jalan nao tal labik ngak bruk, taong abih lac urang kumei. Tok hu 5 urang kumei saong urang peih kapal patuah oh njauk hagait.

Yaom năng lượng, pandap mbang tagok khang ngak brei lạm phát di Thổ Nhĩ Kỳ tagok tal tanut glong di abih kuhria dalam  20 thun tapa. Urak ni, yaom pandar cai tagok tal  61% dalam bilan 3. Yaom padai brah, pandap mbang tagok 70% dut song tuk vak ni thun dahlau. Yaom nhiên liệu tagok 103% song jien pajeng ba, nao mai tagok 99%. Bruk ni, ngak trak damak jang dom cuang kandah kinh tế ngan song karja  Tổng thống Recep Tayyip Erdogan./.

 Urang lang: Hani Pha – Bhumi – 06/04