Page ini 5/5, di Ha Noi peih Pataom meyai Sarak ka bruk ngak ka dam dara thun 2023 ngan haong kadha “Sarak bruk ngak ka dam dara”. Di var patom meyai, urang ngak praong di dom jabat meda hu ndem biai nao mai ka Sarak, jalan ngak di Đảng, Karja ka bruk ngak ka dam dara; sarak bruk ngak ka dam dara dom gah lac: dam dara palei pala, dam dara ngak kong, dam dara đô thị, dam dara jaoh jo, dam dara bangsa takik, urang lin salah bruk hu gilac veik mai palei, sinh vien; brei panuac ka sarak bruk ngak ka dam dara dalam tuk hadei jit COVID-19 saong bruk salih tapa pandar 4.0.

UBND tỉnh Bình Dương bahrau brei tapa yaom taneh piah biyar piah padang ngak 7 danak dak di dalam tỉnh, lac: danak dak padang ngak jalan mbak meng canah 3 Nguyễn Tri Phương - Bùi Quốc Khánh tabiak kraong Sài Gòn; danak dak jalan katung talei 500kV Đức Hòa - Chơn Thành (labik nao tapa huyện Dầu Tiếng); ngak pasiam veik, peih praong mbaok jalan ĐT.749A; tatua Bạch Đằng 2; tatua kraong Đồng Nai; pasiam veik, peih praong mbaok jalan 2 gah jalan ĐT746. Dalam nan tanut yaom biyar glaong abih lac labaih 48 trieu 6 rituh ribau đồng/m2, bier abih lac labaih 13 triệu đồng/m2; taneh ngak nong biyar glaong abih jaik 32 triệu đồng/m2, bier abih lac jaik 8 trieu 1 rituh ribau dong sa m2.

Pasak Pasang iek ruak kik ban raya HCM kuhria mboh dahlau lac urang njom COVID-19 meda tagok rilo dalam dom harei anak tal, hadei di tuk bhap bini nao ma-in di dom labik karei mai, taom gaok rilo manuac yau nan ye meda hu rilo urang birau njom ruak. Pasak Pasang iek ruak kik ban raya HCM kakei, bhap bini juai huac blaoh haduh hatai min oh iek lap anak bruk jit ruak COVID-19; Bhap bini brei ngak tui jalan V2K nan lac cuk patiah pacang pabah, khử khuẩn saong klauk vaccine; khik caga urang umo taha dalam sang anak bruk mbuan njom COVID -19.

Huyện Bình Đại hu bruk raong hadang công nghệ glaong cak rok patagok khang abih di tỉnh Bến Tre ngan haong labaih 1.400 ha, mblang taneh raong mek hu kein laba lac labaih 85%. Min, bruk raong ini jeng daok gaok dom kan kandah yau ye gaok bruk biến đổi khí hậu, jit ruak, chất lượng anek pajaih oh tani tanat,… piah langyah ka bruk ini, huyện Bình Đại ba tabiak jalan langyah padang ngak bhum raong pataom gauk di mangaok mblang taneh praong labaih 300 ha. Min, piah cak rok bruk raong kaya tasik tui jalan pandar công nghệ glaong, tani tanat saong khang kajap, Bến Tre ieu kakei dom gilang paraik samar drah daong phun jien ka bruk ngak, padang ngak bhum raong glaong pataom gauk, pambuak gam bruk cak rok patagok chuỗi giá trị...

Tỉnh Vĩnh Long birau hu sa urang metai kayua dương tính haong Virus SARS-CoV-2. Urang ruak lac likei, umo 35 thun daok di huyen Tam Bình, hu klauk 4 mbang vaccine, ba tame sang iek ruak di harei 30/4 menhg blaoh. Urang ngak praong di Sở Y tế tỉnh Vĩnh Long khan lac, yaom lac urang metai saong duk iek mboh dương tính haong Virus SARS-CoV-2, min karja palei jeng daok duah thau makna ba tal metai kayua dahlau di nan, urang ruak hu menyum alak. Yaom lac yau nan, min gah y tế palei jeng ieu sang urang metai brei dar urang metai njauk tui jalan di urang metai kayua virus SARS-CoV-2. Meng akaok thun mbiah tal ini urang njom ruak COVID-19 di Vĩnh Long tagok tal 255 mbang.

Harei 14/5 anak tal, cử tri Thái Lan meda nao tal 400 labik pilih ruah di grauk labik dalam taneh ia piah buh phieu pilih ruah tabiak 500 hạ nghị sỹ. Tui mbang pasang iek bahrau ini mboh lac, đảng Pheu Thai (đảng kayua negar Thái) taduan hu bruk pachreih tui di rilo abih dalam dom đảng maraik gauk pilih ruah ngan haong bruk pachreih tui lac 38,32%. Tui Hukum negar Thái Lan, hadei di mbang tổng tuyển cử, 500 hạ nghị sỹ hu pilih ruah tame Hạ viện meda gam haong 250 thượng nghị sỹ di Thượng viện pilih ruah tabiak Thủ tướng Rajaei meng angan dom ứng cử viên thủ tướng kayua dom đảng ba tabiak. Urang jayah meda taduan hu bruk pachreih tui di takik abih lac 376 urang QH, nan lac labaih meteh dalam abih tih 750 urang di dua Viện Quốc hội Thái Lan.

Gah Y tế Dunya (WHO) brei thau, nyaom dom urang ilamu y tế dunya daok ginum biai piah ba tabiak iek jit ruak praong COVID-19 daok dalam bruk samar chip atau oh. WHO mbang akaok meti ba tabiak bruk kakei pacang glong abih ka jit ruak praong COVID-19 di harei 30/1/2022, meng nan mbiah tal ini daok ngak tui dom mbang ginum biai haong chuyen gia y te 3 bilan sa mbang. Sa khaw tin karei mboh lac, bruk atah klak bruk samar chip ka prein yawa bhap bini ngak dunya haduh hatai, meda ngak kan kandah tal dom bruk kham merat pambuak bruk atau daong dunya. Abih di nyu nan lac, biak kan thau dahlau ka virus COVID-19 ngak brei kan si ba tabiak jalan ngak dalam tuk ini.

Ilocki Podrumi lac labik hu angan je ka bruk ngak alak vang Traminac bahrau brei thau janih alak vang Mbong yamen meng kan phiên bản 2019 meda pabak di harei tagok rai anak tal di Patao Charles 3. Ini lac mbang ka 2 Traminac – lac sa dalam dom janih alak vang hu angan je abih di Croatia hu pabak di harei tagok rai di patao negar Anh. Traminac lac janih alak hu khik piah lavik thun abih dalam dom lubang alak di Ilok. Yaom di yaok klaok alak meda tagok tal labaih 7.500 euro. Harei tagok rai di Patao Charles III meda hu peih tabiak di harei 6/5 anak. Ini hu brei thau lac adat hu makna praong saong praong di abih di Hoàng gia Anh dalam thun ini.