Ralo anek saih ndom lac đề thi gheih gam mbuan, mbiah

Page ini 7/7, anek saih pakacah môn akok meti lac Ngữ văn di Mbang pakacah THPT thun 2022. Taong yaom di dom labik pakacah di bhum ĐNB, anek saih mboh sahanang hatai ngan haong môn pakacah ini. Ralo anek saih ndom lac đề thi gheih gam mbuan, mbiah. Daok di Bình Phước, rilo anek saih daok atah hu dom kapol dam dara halan hatian di Tỉnh đoàn Bình Phước daong dom adei nao tal labik pakacah njauk tukvak. Adei Hà Thanh Trâm, tal 12A6, sang bac THPT Thanh Hòa, huyện Bù Đốp gaok bala angaok jalan mbak dahlau di tuk rah tabiak pakacah saong oh eng drei nao mai hu, nan ye hu ba nao tal labik pakacah meng radaih cứu thương. Langiu di nan, 27 kapol urang halan hatian  daong prein pakach  daok brei ia menyum, dom pa-op pandap mbang brei saoh…ka anek saih anak pabah mbang sang bac labik pakacah.

Melam 6/7, di Pasak ilamu Kinh Bắc, ban Bắc Ninh, tỉnh Bắc Ninh, Mintri Ilamu, Thể thao saong Du lịch pambuak bruk haong UB bhap bini tỉnh Bắc Ninh peih mbaok Harei pataom “Sap daoh công nhân, urang ngak thun 2022”. Harei pataom pachreih hu 26 kapul daoh tamia bhap bini, lambaok ka dom công nhân, urang ngak mai meng 24 tỉnh, ban. Harei pataom hu ba mai yaom glaong gah hatai sahneng, hatai khang cách mạng, pok meyaom prein khang jum pataom ka công nhân, urang ngak dalam taneh ia, pachreih ba, patagok bruk daoh tamia bhap bini dalam taneh ia. Hadei di tuk peih mbaok, dom kapul daoh tamia daok hu parang me-in di sang daoh ragu bhap bini Quan họ Bắc Ninh meng harei ini tal harei 9/7.

Tal biar harei 6/7, dua D.N njauk to yaom taneh  di Khu đô thị birau Thủ Thiêm lac Công ty CP Dream Republic saong Công ty CP Sheen Mega  oh ka buh jien pandar taneh kuhria abih tih lac 7.820 tỷ đồng ka Cục Thuế TP.HCM. Dua đơn vị jeng oh ka hu văn bản atau harak brtei thau tal bruk nan yaom lac abih tukvak ngak bruk nan. Yam ndoc Sở Tài nguyên- Môi trường TP.HCM Nguyễn Toàn Thắng brei thau, dom sở ngành meda brei panuac daong UBND TP padeih hợp đồng hu mbaoh tangin blaoh haong dua D.N, gah D.N meda lahik jien takai.

Ndom biai pambuak gauk patagok Du lịch Việt Nam hu peih tabiak di TP Hồ Chí Minh dalam 2 harei lac harei 8 saong harei 9/8/2022. Ini lac bruk ngak hu makna, piah duah tabiak jalan ngak, jeng yau labik pambuak piah ka dom doanh nghiệp du lịch Việt Nam meda taom gaok, ndom biai nao mai, pambuak gauk khang kajap hadei di jit ruak COVID-19.

Sang iek ruak  Đa khoa tỉnh Lâm Đồng brei thau, daok taong ruak ka dua urang var drei trak, meng mac tapa nội khí quản. Dua urang ruak nan lac Liêng J Rang Ha Hải, ndih tapui thun 1999, tame sang iek ruak di harei  4/7 saong Liêng J Rang Ha Hôn, ndih tapui thun 1996, tame sang iek ruak di harei  5/7. Ini lac dua adei sa-ai hatian, daok ngak apuh mbang apah di palei Đạ Nghịt, xã Lát, huyện Lạc Dương. Harei 3/7, dua urang ruak nan hu menyum alak saong dom urang di palei Đạ Nghịt, hadei di nan mboh pandik akok, ba tame sang iek ruak. Tui panuac khan di Sang iek ruak Đa khoa tỉnh Lâm Đồng, dua urang nan daok ruak biak trak, var drei jan trak, suak yawa meng mac.

Prang harei kabroi brei mai palei veik 51 urang kumei haong uraniah meng dom labik kayua kol IS dahlau daih pasang iek di Xy-ri. Tui Jabat công tố pacang khủng bố taneh ia Prang, mbang mai veik palei mbang ini hu 16 urang kumei umo meng 22 tal 39 thun saong 35 uranaih. Langiu 2 urang kumei, taog abih jeng lac rahra Prang. Ini lac mbang mai veik palei di urang kumei saong uranaih rilo abih di Prang meng dom  trại daok di gah Đông Bắc Xy-ri kuhria meng di tuk kol khủng bố IS taong lah di 3/2019. Prang hu rilo rahra di drei klaak taneh ia nao tui kol IS rilo jang dom taneh ia châu Âu halei karei.

Hungary oh pabak phao ndao ka Ukraine kayua taneh ia ini oh khin tavak tame bruk mesruh gauk di Nga saong Ukraine tui jalan halei. Akok  mentri Ngoại giao Peter Szijjarto  langyah, urak ini hu labaih 150.000 urang Hungary daok diuk rai di gah pai negar Ukraine, meyah Hungary jao brei phao ndao ka taneh ia ini, dom urang nan meda hu jeng bruk pamaong tal di Nga. Ong Szijjarto daok hu panuac lac, bhum taphia negar Hungary – Ukraine urak ini lac labik siam mekre salamat di abih  saong daok hu pandar piah pajeng ba pandap ngak pahala.

Brei panuac di mbang họp báo online meng Geneva (Thụy Sĩ) harei 6/7, Tong Yam ndok Gah Y tế Dunya (WHO) Tedros Adhanom Ghebreyesus brei mboh hatai suh sah ka bruk rah tabiak praong saong bruk njaom mbak di virus đậu mùa di mangaok dunya. Tui ong, bruk kurang dut iek jeng hu makna lac rilo menuac njaom mbak oh hu dut iek. Ruak đậu mùa khỉ lac sa ruak njaom mbak bhian mboh di dom taneh ia Trung Phi saong Tây Phi. Min meng akaok bilan 5 thun ini, dom menuac njauk ruak mboh hu rilo di dom taneh ia langiu dom taneh ia bhian hu ruak ini. Urak ini 80% dom menuac njauk ruak đậu mùa khỉ lac di châu Âu./.

Urang lang: M. Phương & Bhumi – 07/07