Rilo urang QH tangi sua dom urang pal akaok 

Page ini 9/6, QH patui bruk tangin sua saong javap calei 2 nyaom kadha di gah gilang pariak, gah jalan mbak pajeng ba. Phaok Thủ tướng Thường trực Rajaei Phạm Bình Minh ngak brei cambiac laic dom bruk pambak tal saong javap calei dom tangin sua di urang QH. Mbang ginum biai hu Rayo sap ndem VN, Rayo papar binguk Viet Nam, Truyen hinh QH Viet Nam papar sap, papar binguk tapak piah cử tri jeng yau bhap bini dalam negar hu tui iek tui pang. Biar harei ini, QH pang Akok QH brei panuac tamat mbang tangin sua saong javap calei.

Urang pal akaok Viện Tim ban raya .HCM brei thau, meng harei  9/6, Viện brei padeih bruk taduan drah tapak meng menuac brei drah (lac gauk gar urang ruak  blac draih boh hatai) song hu tacei urang brei drah halan hatain tapa sang iek ruak  Truyền máu huyết học ban raya .HCM brei drah halan hatain tui adat batabiak. Bruk ni hu batabiak hadei di bruk mboh lac hu menuac mbang jien tuk ba urang nao brei drah tapa duah thau di  mbao Tuổi trẻ. Viện Tim khik kajap bruk kuhria caga drah piah blac draih boh hatai di urang ruak, meng bruk taduan drah meng gilang drah  di sang iek ruak  Truyền máu huyết học ban raya. mBan Yam ndok Viện Tim TP.HCM jeng hu panuac sinya khik kajap dom bruk ngak di Viện oh gaok kan kandah hagait tuk salih labik pabak drah.

Meng 8 -10/6, Mban Bangsa tỉnh Đồng Nai peih tal pato pabak ilamu ngak bruk bangsa ka 206 urang hu angan je dalam bhap bini bangsa takik dalam tỉnh. Urang hu mbaok hu bac dom asar kadha di sarak bangsa; bruk ngak di urang hu angan je dalam bruk jak ba bhap bini pambuak bruk, peih ngak sarak bangsa di cơ sở; pakhang bruk ba ilamu cong nghe  thong tin dalam bhap bini bangsa takik saong thau ka bruk pambak tame mạng piah ngak sraw an ninh taneh ia saong salamat xa hoi.

Harei 8/6, Công an tỉnh Đắk Lắk  brei cap mek chip ong  Huỳnh Tấn Đàn (umo 47 thun, dok di palei 3, xã Hoà Thuận, ban Buôn Ma Thuột, tỉnh  Đắk Lắk) ka duas ngak khak ja. Dahlau di nan, tapa pasang iek kho pandap di jalan  23B, palei  6, xã Hoà Thuận, ban  Buôn Ma Thuột jabat  chức năng cap mek hu labaih 100 tấn khak mboh lac yau khak ja  song  30 tấn pandap tamo piah ngak khak oh thau cambaih asal di nyu . Di jabat công an, tuk camereip ong Đàn taduan lac hu pandar pandap tamo oh thau cambaih asal di nyu, piah ngak ja khak mai meng Mỹ, ngan saong labaih 100 tấn, yaom abih tih labaih  1 tỷ meteh.

Melam bloh, kapol dat blong caoh mbanh U-23 Viet Nam mbang U 23 Malaysia piah gam haong U-23 Hàn Quốc lac dua kapol tame pakacah tứ kết U -23 châu  Á di bảng C. Hadei di tuk caoh salah, Thủ tướng Phạm Minh Chính payua panuac tadhau ayuh taong abih urang dat blong U -23 Viet Nam. Thủ tướng pachreih taong abih gauk brei caga siam ka mbang pakacah anak tal tui jalan the thao siam gheih, khik sambo mau hala dok ao ngui cuk. Thủ tướng pachreih ba abih gauk dalam kapul U-23 Viet Nam pakacah abih hatai, kham yam tapa, oh caik ka bruk jayak nyu kateik trak rup drei. 

Akaok mintri  Y tế Singapore Ong Ye Kung mboh lac, Singapore meda dang anak bruk njom mbak bahrau di  biến thể Omicron dalam bilan 7 atau bilan 8-2022, tuk jru pacang Covid-19 nyu trun prein pacang ruak. Dom taneh ia karei jeng dok dang anak bruk patagok dom urang  njom  biến thể phụ BA.4 song BA.5 di  Omicron. Urak ni,  biến thể phụ BA.4 hu duah mboh takik di abih di  30 taneh ia song  BA.5 di  32 taneh ia. Tui gah ilamu  Mỹ, BA.4 song  BA.5 hu prein yam tapa kháng thể di dom urang  hu klauk jru, glong jiak 4 mbang dut song BA.2.

Dalam mbang ginum biai di Strasbourg harei 08/06, dom nghị sĩ châu Âu hu buh phieu brei tapa harak Ke hoach khi hau di Liên minh châu Âu, dalam nan bruk praong lac pakauk pablei taong abih dom radaih ô tô peih meng năng lượng hóa thạch meng thun 2035, piah tal kreh abap 21 ngak brei châu Âu jeng châu lục oh hu khí thải cac-bon. Tui bruk ba tabiak hu Nghị viện châu Âu brei tapa, meng ini tal thun 2030, dom taneh ia Liên minh châu Âu brei cakak trun meteh dom radaih ô tô peih meng xăng - menyek saong mbiah tal thun 2035 brei pakauk abih.

Harei 8/6/2022, sa radaih  ô tô ginuh tame labik hu rilo menuac di mangaok  jalan Rankestrasse di  quận Charlottenburg, ban ine  Berlin (Đức), ngak takik di abih sa urang metai  song labaih 30 urang njauk rambuac. Urang peih radaih njauk cảnh sát chap kreih. Hu thau, labik radaih ginuh dahlau daih lac labik rah tabiak mbang tong khủng bố di drak  Giáng sinh thun 2016 ngak ka  11 urang metai./.

Urang lang: Ái Nghiêm- Hanipha- 9/6