Page ini, di Sang Quoc hoi, peih pakak dalam praong prang Mbang nyaom ka 8, Quoc hoi mbang 15. Mbang nyaom ini, brei thau ngan hu jakar piah Quoc hoi palih ruah pok ngak Akok negar saong dom urang pambuak tal. Quoc hoi caik tabiak rilo tukvak ka bruk padang ngak hukum, tui iek pakat glong, ba tabiak dom bruk kinh te - xa hoi di taneh ia, dalam nan njauk caik hatai  lac Quoc hoi brei panuac  ka jalan peih ngak danak dak jalan peih drah samar  di jalan Barak - Meraong. Mbang nyaom ka 8, Quoc hoi Mbang 15 hu peih chip hadei Nyaom biai Trung uong 10 peih ngak hu jak jeng. Mong gilac veik tukvak tapa saong tukvak anak tal, pataom tame prein kham merat ngak hu salah siam abih dom bruk ba tabiak bruk ngak di Nyaom roya 13; ngak jeng bruk yam tagok di taneh ia tame jamar birau, sa jaman patagok di bangsa Viet Nam.

Harei kabroi, Lien Doan Lao dong TPHCM pambuak Thành Đoàn TP.HCM peih ngak Harei daong dam dara urang ngak Ban raya mbang 3 thun 2024. Harei peih ngak di Quan 6, dui atah meng 20 tal harei 27/10. Harei ini, mban peih bruk hu alin 200 paok pandap, yaok paok 1 trieu dong saong 5 sruh radaih patuh ka urang ngak raidiuk kan kandah; 20 paok pandap ka dom adei uranaih, anek saih hu raidiuk kan kandah  kayua jit ruak COVID-19. Mban peih bruk hu peih dom labik ma-in, tacei pato hukum saong dom kein laba, lagaih tui hukum, lagaih haong raidiuk urang ngak…   

Pasak Daong anek saih – sinh vien Ban Can Thơ pambuak haong Kpaol dam dara Viet Nam quận Ô Môn, quan Ninh Kiều peih ngak Danak dak  alin pandap  ka anek saih bangsa Khmer. Bruk nan piah patagok halan hatain  do gah Kapol - Nyaom brei sangka, kuhria ka dom adei saih bac,saih megru hu raidiuk kan kandah. Mban peih bruk hu alin brei 100 paok pandap ka dom anek saih bangsa Khmer sang kan kathaot daok bac di dom Sang bac bangsa quận Ô Môn saong dom  sang bac di quận Ninh Kiều, yaok paok yaom 400.000 đồng, dalam nan pandap mbang saong kaya piah bac megru.

Danak dak “Pambuak daong urang nao tasik truac hadah gom di tasik”  pamong tal bruk daong urang nao tasik, khik bruk ngak po di tasik harei ka broi hu alin brei 100 paok pandap yaok paok 6 trieu dong saong iek ruak, brei jru aoh mek jien  ka labaih 500 urang ngak  mbang di tasik dalam 3 xa tapen tasik di huyen U Minh, tinh Ca Mau; alin brei 200 thung mac hlang ia hacih  ka mikva pak ni; 25 paok jien bac  daong ka dom anek saih  lac anek di urang nao tasik yam tapa kan knadah bac da-a naih joi. Danak dak caong lac, bhap bini xa hoi pan tangin gauk daong ka mikva urang nao tasik hu sahanang hatai, khik brei mboh bruk ngak po tasik palei negar drei.

UBND tinh Binh Duong birau peih bruk ginum biai piah taong yaom bruk peih ngak  jalan mbak praong, dalam nan hu bruk palong pasiam jalan Roya 13. Yaom lac, hu dom bruk kham merat, danak dak daok gaok rilo kan kandah, abih di nyu lac dalam bruk peih taneh. Tui urang ngak praong di UB bhap bini ban Thuận An, urak ini, rilo baoh sang bhap bini oh njauk hatai haong yaom jien taneh, yau nan ye bruk mek veik taneh gaok kan kandah. Bruk ramik caga labik daok birau oh ka salah, ngak suai tal bruk panduan ba.

Tong thong Indonesia Prabowo Subianto melam karoi hu khan ka Rajaei di Dinh Tong thong. Dom urang ngak bruk Rajaei bo ong Prabowo Subianto iew lac “Bhong meriak – Putih” dalam nan  hu 48 Akok mentri, praong veik lac urang jakar ngak bruk di jamar Joko Widodo hu 34 Akok mentri. Takik di nyu lac 15 Akok mentri dahlau diah di ong Jokowi hu palih ruah birau, njauk ngak veik bruk yau klak atau ngak bruk birau. Tong thong Indonesia Prabowo Subianto caong khin ngak brei patagok kinh te 8% dalam meng 2-3 thun dut saong bruk ba tabiak lac 5 thun yau urak ini. Dom urang jakar Rajaei hu tuyen the ngak bruk di page ini 21/10.

Gah Y te dunya (WHO) harei kabroi brei thau Ai Cập hu jeng taneh ia lac taneh ia oh daok rauk la-ar dom. Bruk nan taong yaom bruk atah klak sa ruak hu mboh di ralo taneh ia chau Phi, dalam nan hu Ai Cập. Mbiah tal ini, Gah Y te dunya hu brei harak ka 44 taneh ia saong sa bhum taneh  di dunya abih ruak la-ar dom. Ruak la-ar dom lac ruak dunya ini var lavik ye, hu 95% urang ruak saong 96% urang metai di Chau Phi.

Jalan gom ndien di Cuba harei kabroi klaoh lahik. Ini lac bruk klaoh lahik ndien mbang ka 4 di Cuba dalam 48 tuk tapa kayua ribuk Oscar, ngak khut tayah di taneh ia ini. Kayua lahik gom ndien, yaok trieu urang oh hu ndien pandar dalam dua harei tapa. Urang ngak praong di Cuba daok ngak brei pasiam jit vu pabak ndien ka bhap bini./.