Patui danak dak mbang nyaom ka 8, page ini UBTV QH brei panuac ka bruk likau pabak danak dak Hukum iek ruak, taong ruak ( pasiam veik) tame danak dak padang ngak hukum, sarakh thun 2022. Rajaei pok tagok UB TVQH dom bruk birau tamuh tabiak, taong yaom bruk kan kandah di jit ruak praong Covid-19 piah ngak brei cambaih laih quy định iek ruak daalm danak dak Hukum. Gam haong nan, ngak brei cambiac laic bruk y te pacang caga ruak saong taong ruak tui Hukum BHYT saong Hukum Iek ruak, taong ruak; manuac njuak pambak tal tuk ramik pasiam Hukum. Daok bruk pamong ngak, jalan ngak pasiam Hukum, dom jalan ngak  mek urang ruak ngak pasak di yaok bruk pabak bruk iek ruak, taong ruak tui jalan hu mbuan lagaih piah iek ruak, taong ruak, lagaih haong jalan ngak di dunya.

Pahadar bak 43 thun hadei di mesuh metak di jalan tapen negar gah Barak tamuh tabiak (harei 17/2/1979), huyện Mường Khương, tỉnh Lào Cai hu peih bruk cuh gilau hadar dhar phor dom liệt sĩ di Đồn Biên phòng Pha Long var klaak rup drei labuh trun dalam mbang mesuh metak ini piah khik caga quyen ngak po di taneh ia. Angaok blah patau pahadar hu caik di gah hanuak Đồn vak angan 41 liệt sĩ; dalam nan, 27 liệt sĩ ndih trun dalam 4 harei camriep khang hatai mesruh oh huac merai lahik di gah akaok jalan tapen negar. Di tuk pahadar ini, huyện Mường Khương jeng hu peih bruk nao rivang dom sang sarak kanja, gauk gar di urang buh prein ka taneh ia dalam tỉnh; peih bruk puh ramik dom labik inem krung sajarah; cuh gilau di kubo liệt sĩ ndih trun dalam mbang mesuh metak di jalan tapen negar thun 1979.

Tui Mentri Y tế, kuhria meng akaok mbang jit ruak tal ini, bruk njaom Covid-19 di uranaih umo mala 18 thun di negar drei lac 19,2%, sumu labaih 490.000 uranaih. Dalam negar hu 165 uranaih njom Covid-19 metai, meblah 0,42% dut saong dom urang metai. Tui Thứ trưởng Mintri y tế Nguyễn Trường Sơn, uranaih tuk njom Covid-19 bhian hu ruak dui atah saong jeng hu ruak hadei Covid-19, hu ruak cấp tính di Covid-19. Angaok dunya, hu dom uranaih mboh ruak trak yau ruak “di chứng viêm đa hệ”. Abih di nyu lac, meng biến chủng Omicron, bruk njom mbak ruak mbuan hu rilo jang di dom uranaih oh ka klauk vaccine pacang caga Covid-19.

Hadei di tuk Tết Nguyên đán thun sak rimaong thun 2022, bruk pablei salih padap pakauk di jalan tapen negar Tây Nam jeng daok rahtabiak sarau kadhau. Dom gah chức năng cap mek hu rilo mbang pajeng pandap pakauk. Tui Bộ đội Biên phòng tỉnh An Giang, dom urang cakaong, naong pandap, pajeng ba pandap mbang pah rilo meng lac urang kan kathaot, sang gaok kan kandah, njauk dom urang par akaok dui pachreih, ba tame. Jalan ngak suai lavik, Bộ Chỉ huy Bộ đội Biên Phòng tỉnh hu panuac  ieu UBND tỉnh An Giang daong, ba bruk ngak tani tanat ka bhap bini dalam bhum tapen negar, meng nan tani tanat raidiuk, oh pang tui, oh pajeng ba pandap pakauk ka dom po pandap, đầu nậu; gam haong nan, pathau khan piah ka bhap bini oh ba tangin tame daong ka kol pablei salih pandap pakauk.

Adit payua jien patak pataom daong ka urang kathaot thun 2022 hu Gilang pariak Karja tỉnh Lâm Đồng pambuak saong 4 kapol lac Kapol Urang ngak nong,  Kapol urang kumei, Kapol urang dahlau diah ngak bol lin saong Kapol dam dara CSHCM dang tabiak taduan ngak, pachreih hu yaok ribau mbang kapol nyaom saong menuac urang lac công chức, viên chức, urang ngak, urang đoàn, urang hội dom gah chính trị - xã hội saong Bhap bini hu mbaok tame. Hadei di sa adit peih ngak, dalam tỉnh  hu 2.196 kapol nyaom, menuac urang payua jien patak pataom di Gilang pariak sarak karja labaih 136 tỷ đồng.

Jabat khik ramik jru tavao di Ô-xtrây-li-a (Australia) bahrau pasang iek brei pandar vaccine caga Covid-19 ka ranaih meng umo 6 thun tagok. Yau nan urak ini di Australia, ranaih umo meng 6 thun tagok hu klauk 2 janih vaccine caga Covid-19 di Pfizer saong Moderna. Bruk jabat chức năng Australia brei adat ka vaccine caga Covid-19 di hãng jru Moderna klauk ka ranaih meng umo 6 thun tagok hu pabak bruk pilih ruah ka dom sang tuk dahlau di nan, taneh ia ini bahrau brei adat ka vaccine di hãng jru Pfizer klauk ka ranaih umo meng 5 tal 11 thun.

Harei ini 17/2, Nhật Bản meda brei bruk pacadu  dom jalan pacang khik labik taphia negar hu ba tabiak ngak dahlau daih  piah pacang cakak bruk njom mbak di jit ruak praong Covdi-19, dalam tuk dom D.N saong pasak pato megru taneh ia ini iew brei peih abih pabah mbang. Tui kuhria, tuk pacadu dom jalan pacang khik labik taphia negar, dom menuac hu adat tame negar Nhật Bản tagok 5 ribau urang yaok harei, meng 3 ribau 500 urang yau urak ini. Langiu di nan, tukvak brei daok karei jeng takik veik, meng 1 adit trun daok 3 harei ngan saong dom urang hu klauk vacine ginup saong mai meng taneh ia takik njaom mbak  ruak.  

Brei panuac peih Nyaom biai Kapul 20 nền kinh tế patagok saong bahrau cak roh dang akaok (G20) harei ini (17/2), Tổng thống In-đô-nê-si-a (Indonesia) Giô-kô Uy-đô-đô (Joko Widodo) ndem lac, urak ini oh njauk lac tukvak ngak tabiak bruk sarau kadhau yau bruk daok rahtabiak di U-crai-na (Ukraine). Nyaom biai pakat glaong abih G20 mbang ini kayua In-đô-nê-si-a dang tabiak peih ngak, dalam tuk jit ruak Covid-19 jeng daok tamuh khang di rilo taneh ia saong sarau kadhau U-crai-na di Nga haong Mỹ saong NATO daok tagok khang. Dalam harak ndom puac, Tổng thống In-đô-nê-si-a hu panuac ieu bruk pambuak gauk di dom taneh ia piah jhul samar bruk pasiam veik kinh tế dunya./.

Urang lang: Thu Thao & A.Nghiem – 17/02/2022