Ban raya Can Tho hu labaih 102.000ha phun mbang baoh, baoh paik hu yaok thun jaik 1,2 trieu tan. Rilo janih baoh kayau hu yaom glaong yau durian, darang, pa-aok, baoh ia tasau hu pablei tabiak jak jeng tame dom darak pasar dunya, daong ba mai jien mek tame tani tanat ka urang ngak nong. Tukvak anak tal, Can Tho pamaong tal patagok gah phun mbang baoh tui jalan paglaong asar siam pablei tabiak, padang bruk ngak mbang njauk lagaih; parilo ndap nda saong padang he thong pasang duah piah thau kaya hu mai meng halei saong paglaong bruk pasang iek ma so bhum pala, padang angan je baoh kayau Can Tho di dom darak pasar praong.

Meng harei 16 bilan 9 tal abih harei 15 bilan 10, dom kapol pasang iek pambuak dom gah di Gia Lai pasang duah bruk ngak tui dom hukum ka pandap mbang hacih sa-at di dom labik ngak tabiak pandap, pablei salih saong pablei tabiak kaya mbang. Bruk hu makna praong lac dom janih duh ka darak pasar Tet Trung thu yau ahar keo, mbia alak, ia menyum, ralaow saong dom pandap ngak meng rilo, ahar ngak tui mukkei, pandap pablei di jalan, labik pablei kaya mbang…Bruk pasang duah piah samar hu thau hu mboh, pacang cakak blaoh langyah dom bruk ngak suan, piak palik njiak jru mek kayua kaya mbang saong ruak njom mbak tapa kaya mbang.

Dalam 10 thun jaik ini, vanh ndai glai pacang khik tapen tasik Gò Công, tinh Dong Thap njauk ngak kanjah trak, rilo labik daok meng 4-20m, hu dom labik lahik glai meng 10-15 m/thun. Tui ong Nguyễn Thanh Tâm, urang jakar xa Gò Công Đông glut jaleih di ar tapen tasik rah tabiak biak praong, rilo meng lac di bilan angin khang, kuhria rah tapa labik 50m tame taneh riya ngak ka jalan vanh ndai glai pacang caga ar tasik khut tayak trak saong mbuan lahik abih.

Jalan raya 61, tapa dom xã Long Thạnh, Định Hòa, tỉnh An Giang atah labaih  12 km jalan dak harei dak khut tayak trak, rilo labik glut “galut”, “galac” praong sit mbuan ba tal bala angaok jalan mbak, kan nao mai saong pajeng ba ndap nda nao pablei salih di bhap bini, doanh nghiep. UBND xã Định Hòa pok panuac likau UBND tinh, brei kuhria iek buh jien ramik ngak pasiam veik samar  piah jalan mbak nao  mai di bhap bini jeng bruk pajeng ba ndap nda hu lagaih kayua ini lac jalan pajeng ba kaya ndap nda di dom bhum palei karei tra.

Melam 18/9, sa mbang hajan praong rah tabiak di dom xa Đại Phước, Phước An (daok di huyen Nhơn Trạch, Dong Nai dahlau diah) ngak glut jaleih saong njauk ia dauk, kanjah trak tal drap ar saong raidiuk di rahra. Taduan hu khau tin, kapul chuc nang hu samu hu mbaok, tapa melam daong rahra panduan drap ar tal labik salamat. Gam haong nan jak ba rahra oh daok di dom labik mbuan glut jaleih, lahik salamat piah patakik abih khat lahik kayua bala ngak tabiak.

Thu tuong Malaysia hu rilo mbang iew phone ginum biai haong Thu tuong Thai Lan ka dom bruk birau rah tabiak di bhum taphia negar Thái Lan - Campuchia. Thu tuong Malaysia kakei lac dom gah pambuak tal kham merat khik brei salamat, oh caik rah tabiak bruk oh njauk hatai gauk ba tal cuang kandah catang. Tui nan iew Thai Lan saong Campuchia brei langyah dom bruk rah tabiak di labik tapen negar, ginum biai di dua gah, abih di nyu lac jalan ngak bruk di Uy ban taphia negar hon hop.

Trung Quoc hu ba mai negar 68.000 urang medil lac chot pagat di langiu negar dalam dom thun jaik ini, gam haong nan ba tabiak bruk padang sa pambuak pacang chot pagat dunya. Trung Quoc hu ba tabiak dom negar saong bhum taneh hu pambuak padang kapul pacang chot pagat dunya, jhul tagok dom gah saong bhap bini dunya daong gauk langyah bruk duas chot pagat vien thong saong Internet. Gam haong nan pandar dalam dunya patagok bruk pambuak jang veik, salah blaoh dom co che langyah bruk haong gauk saong pasiam he thong meraik gauk saong pasang iek dalam toan cau.

Gah Y te Dunya -WHO khan lac hu takik di nyu 31 urang metai dalam mbang tamuh jit ruak Ebola birau abih di negar CHDC Congo. Dalam nan taneh ia ini hu 48 urang lac njom ruak, labaih 900 mbang hu taom gaok urang ruak daok tui iek. WHO saong dom gah hu pabak labaih 14 tấn mac mac ndap nda y te, ba urang ilamo mai ngak bruk, padang pasak taong ruak Ebola, peih bruk klauk jru ka nyaom urang hu taom gaok jaik saong urang jakar jru ruak tapak./.