Dah page ini (23/11), bruk pahadar 100 thun harei manek ong Võ Văn Kiệt (23/11/1922 - 23/11/2022) hu peih tabiak dalam praong prang di tỉnh Vĩnh Long. Puac harak di pak ini, Thủ tướng Phạm Minh Chính biak drut druai hadar veik jalan diukrai saong bruk ngak cách mạng di ong Võ Văn Kiệt. Thủ tướng brei thau lac: kreih camin buh prein ka taneh ia, ka rahra di ong Võ Văn Kiệt miat miat hu kanal hadar. Dalam tukvak cách mạng bahrau, abih tih dom kapul nyaom, dom urang jakar, urang đảng saong dom rai bhap bini, abih di nyu nan lac rai ranaih umo kham merat bac magru, bac tui kreih camin di ong Võ Văn Kiệt saong dom urang ngak cách mạng dahlau deih, patagok dom prein khang jum pataom gauk di dom bangsa, hatai tự lực, tự cường; halain hatain, hadah krah, duah jalan ngak bahrau, ieu pataom saong pandar hu siam lagaih dom prein khang, kham marat peih ngak jak jeng dom Sarak di nyaom roya XIII di Đảng; kham marat dak padang jak jeng sa taneh ia Việt Nam trei sil, haniem phul,  khang kadang. 

Mesup 23/11, kapul urang lambaok TPHCM nao cuh gilau, pok bingu pahadar Chủ tịch Hồ Chí Minh, hadar dom AHLS di labik inem mek sajarah – ilamu pakat negar Dinh Quận Hóc Môn, di tuk pahadar 82 thun Harei Nam Kỳ khởi nghĩa (23/11/1940 – 23/11/2022). Patui di nan, kapul hu nao pok gilau di labik inem mek sajarah pakat negar Ngã Ba Giồng. Ini lac labik dahlau daih thực dân Pháp padang labik cuh pametai dom urang jakar ngak praong pan akaok, dom urang lin saong bol b hap rahra hu mbaok tame bruk khởi nghĩa Nam Kỳ thun 1940. Jaik 1.000 bhap bini, urang lin di drei ndih trun di labik ini.

 Di Cần Thơ, Mintri ngak nong saong patagok palei pala bahrau peih mbang nyaom biai peih ngak Danak dak paglaong prein ngak bruk di hợp tác xã (HTX) ngak nong lagaih haong bruk biến đổi khí hậu bhum ĐBSCL tukvak 2021-2025. Tal abih bilan 10/2022, ĐBSCL hu 2.546 HTX ngak nong, tagok 1.379 HTX dut saong thun 2012. Piah peih ngak hu siam lagaih, Mintri ngak nong saong patagok palei pala saong dom tinh, ban di ĐBSCL hu brei thau cambaih dom bruk ngak meng akaok thun ini tal thun 2025. Dalam nan hu bruk padang ngak saong cak rok patagok dom bruk ngak kinh tế hijao, kinh tế tuần hoàn; cak rok patagok bruk ngak mbang, salih janih phun pala, athur raong; padang ngak saong khik tani tanat dom hệ thống quan trắc, kuhria mboh dahlau bruk ia sua, ribuk, pandiak bhang, njom ia mbak, ia tasik tagok.

Tui yaok pataom, dalam TP.HCM urak ini hu 155 doanh nghiệp brei trun mong ngak bruk, brei urang ngak payeng gauk padeih atau brei padeih bruk, ngak brei labaih 50.000 urang ngak gaok kan kandah. Bruk tavak sraiy BHXH, BHYT jeng biak rilo, hu jaik 48.700 labik tavak sraiy meng 1 bilan tagok, samu 48%. Tui kuhria mboh dahlau, bruk di urang ngak haong labik ngak meng ini tal abih quý 1/2023 daok mbuan hu rilo kan kandah, srau kadau. LĐLĐ TP.HCM brei thau, kuhria tal harei 15/11, dalam ban raya hu 13 mbang hu 5.966 urang ngak ba gauk padeih ngak, lac rilo jang 6 mbang duk haong tukvak ini thun bloh, dalam nan rilo meng lac gah jhik, menyim saong takhaok klik.

Meng akaok thun tal urak ini, bruk raong glang kaya tasik di tỉnh Bình Thuận hu tani tanat, bruk blei pandar mboh tagok. Hu rilo labik raong hadang takai putih pandar công nghệ glaong ngan haong mblang taneh praong labaih 120 ha, năng suất mek hu meng 25 - 30 tấn/ha/vụ. Langiu di bruk raong mbau ốc hương di danao tauk mbat mek hu năng suất meng 3 - 10 tấn/ha. Raong dalam ia taba khik tani tanat di labik Đức Linh, Tánh Linh, ikan tầm di danao Đa Mi. Sản lượng kaya tasik raong meng akaok thun tal urak ini mek hu 10.360 tấn Tui kuhria dalam thun 2022 mek hu 14.400 tấn, mek hu abih tih jalan ba tabiak, tagok 13,6% dut saong tukvak ini thun dahlau.

Dom harei tapa, Thổ Nhĩ Kỳ gam gam peih rilo meng không kích tame dom labik di Đảng công nhân urang Cuốc (Kurd - PKK) haong gah dân quân urang Kurd daok di Syria. Bruk ini ngak brei Nga, Mỹ suh sah saong ieu un sabar. Hu thau, bruk ngak ini di Thổ Nhĩ Kỳ hu peih tabiak hadei di bruk taong bom di Istanbul harei 12/11 ngak brei 6 urang metai, 81 urang njauk rambus. Gah Thổ Nhĩ Kỳ ndom lac Đảng Công nhân urang Kurd ngak bruk nan, min đảng ini hu panuac lac oh thau hagait ka bruk nan.

 Meng labaih 20.000 urang njom ruak yaok harei dalam 8 harei tapa, Trung Quốc daok dang anak dom kan kandah praong abih dalam bruk pacang caga jit ruak. Karja Bắc Kinh njauk ieu kakei rahra tuk nao tal dom jabat, doanh nghiệp, kapul, labik hu rilo manuac njauk ba tabiak harak brei thau lac dut iek PCR âm tính dalam 48 maong. Meng harei 24/11, dom urang nao tal Thượng Hải ka oh ginup 5 harei oh hu nao tal dom labik pataom rilo manuac. Ban Thâm Quyến ieu kakei bhap bini njauk hu harak dut iek mboh âm tính dalam 48 maong meng hu nao radaih công cộng saong tame dom labik sil meng maong 12 melam  24/11.

Kuhria meng kreh thun 2026, urang kumei brei hu takik di abih 40% khagaiy dalam hội đồng quản trị di dom Cty praong. Ini lac bruk ba tabiak dalam hukum “urang kumei dalam hội đồng quản trị” bahrau hu nghị viện châu Âu brei tapa, brei mboh takai yam tagok bahrau dalam bruk jhul patagok likei kumei samu gauk di darak pasar urang ngak di Liên minh châu Âu. Tui adat bahrau nan, tuk 2 urang tabiak mbaok piah pilih ruah tame labik pan akaok dalam Cty bo hu bằng cấp bac da-a yau gauk, ye labik ngak nan hu jao ka urang kumei. Min hukum bahrau ini, bahrau hu pandar di dom Cty praong, hu meng 250 menuac tagok./.