Pahadar 100 thun harei manek ong Võ Văn Kiệt (23/11/1922- 23/11/2022), dah page harei ini, Mban peih bruk pahadar dom harei praong di ban raya HCM hu peih parang iek “Ong Võ Văn Kiệt urang par akaok naih gheih– kreih camin urang cộng sản abih hatai haong taneh ia, haong rahra”. Tapa nan yaih khan dom thaot binguk, harak gar ka "Raidiuk saong bruk cách mạng di ong Võ Văn Kiệt". Abih di nyu nan lac thaot bingu tuk ong lac Akaok UBND saong Bí thư Thành ủy TP.HCM… Parang iek dui atah meng ini tal abih harei 30/11. Daok di Vĩnh Long, dah page ini jeng hu peih parang iek thaot binguk ka raidiuk, bruk ngak cách mạng di ong Võ Văn Kiệt,  hu mbaok di yaok rabau rahra dalam saong langiu di tỉnh.

Di nyaom biai taom gaok cử tri lambaok dom bangsa, agama tuk mesup ini di TP.HCM, cử tri brei thau, tukvak tapa, dom bangsa, agama dalam TP kham merat hu mbaok tame dom kapul nyaom…, ngak siam bruk di rahra. Trung ương saong TP.HCM jeng hu rilo sarak praong daong ka raidiuk bhap bini hu paglaong tagok. Daok dom panuac ndom ka jalan patagok TP, HĐND TP.HCM caong lac dom sở, ngành pambuak tal samar langyah, pasang iek dom sarak daong ka bhap bini.

Harei pataom ilamo cồng chiêng tỉnh Đắk Lắk mbang ka II thun 2022 meda hu peih tabiak meng harei 23 - 25/11/2022, di ban Buôn Ma Thuột. Sở Ilamo Thể thao Du lịch tỉnh brei thau, dom kapul hu mbaok tame Harei pataom meda yaih khan dom ilamo, siam gheih meng kan di pak ini, peih bruk khik ramik saong patagok dom yaom glaong ilamo, brei mboh hatai jum pataom, dak padang puk palei dak harei dak siam gheih, hadah hadai. Dalam nan, njauk ndem tal lac bruk khik ramik saong patagok dom Inem krung ilamo cồng chiêng.

Meng akaok thun tal ini, Mban Bangsa TP.HCM pambuak bruk haong TP Thủ Đức saong dom quận, huyện peih bruk daong jien bac, alin hadiah yaok ratuh pok jien bac brei ka dom adei anek saih bangsa takik. Gam haong nan, peih ngak dom sarak daong gru pato sap bangsa, oh mek jien bac di anek saih bangsa Cam, Khmer; sarak daong bruk bac da-a ka urang bac cao học, nghiên cứu sinh lac urang bangsa takik.. TPHCM tuk halei jeng daong palagaih piah patagok prein khang di bhap bini bangsa takik, hu dom jalan pacjreih ba dom doanh nhân, doanh nghiệp lac urang bangsa takik hu mbaok tame cakrok patagok kinh tế.

 Pasak Dịch vụ bhum ceik (di Mban Bangsa tỉnh Bình Thuận) brei thau lac hu jalan pabak pandap panda duh ka Tết Đầu lúa saong Tết Nguyên đán thun sak tapai 2023. Tui nan, Pasak kuhria blei labaih 300 triệu đồng, pataom tame dom janih pandap tani tanat yaom kaom. Meng 11 cửa hàng saong 4 đại lý daok di 11 xã harat saong dom palei bangsa takik daok pablak gauk, Pasak kuhria buh brei nyim dahlau jien mbaok piah blei pandap pabak ka bruk blei pandar di mikva, ngan haong yaom jien abih tih lac labaih 500 triệu đồng.

Ngoại trưởng dom taneh ia G7 hu tabiak tuyên bố chung ieu Hội đồng bảo an hu dom jalan ngak piah cagar veik dom bruk cuh iek tên lửa di Triều Tiên. Tui nan, lên án khang bruk cuh iek tên lửa đạn đạo liên lục địa di Triều Tiên harei 18/11, maong nan lac bruk ngak suan rilo sarak di Hội đồng bảo an. Tuyên bố chung mboh lac rilo bruk cuh iek tên lửa di Triều Tiên dalam thun ini lac bruk đe dọa biak khang tal bruk sron mbon, siam mekre dalam bhum saong di dunya, gam haong nan, nyu pacang jalan kham merat oh hu vũ khí hạt nhân di dunya, kayua mbuan hu bala ka bruk pajeng ba meng kapal haoh saong jalan tasik dalam bhum.

Theo Hãng tin AP, Mintri Quốc phòng Thổ Nhĩ Kỳ bahrau brei thau lac lac taneh ia ini hu peih dom mbang không kích tame dom kapul urang Kurd di dom bhum gah barak Syria saong Iraq. Thổ Nhĩ Kỳ ndem lac dom kapul urang Kurd ini njauk taduan bruk ngak taong bom di adit dahlau di Istanbul. Mintri ini brei thau lac dom sruh kapar haoh mesuh di Thổ Nhĩ Kỳ hu taong tame drap ar di Đảng Công nhân urang Kurd saong Dom kapul daong khik rahra Syria. Dom urang ini ba thaot binguk sruh kapar haoh F-16 par tagok saong hu brei mboh sa mbang taong meng sruh kapar haoh oh hu manuac peih.

Sa mbang bão tuyết biak khang kuhria meng kan mai nyu laik trun bhum gah pai  tiểu bang New York, Mỹ saong tuyết kapan jaik 2m hu mboh di dom labik, ngak brei dom jalan oh nao mai hu saong ba tal adat pakauk peih radaih jeng yau klaak dom mbang par di harei puac adit anak mbang padeih lễ Tạ ơn. Thống đốc New York Kathy Hochul hu panuac ndua dhar phor bhap bini bhum pai New York hu pacang dom jalan cao tốc praong, ngak tui adat pakauk nao mai saong daok di sang dahlau di tuk tuyết laik trun, daong pacang bala, khik cagar prein yava anek menuac saong khik ka jalan mbak hu salamat, laneing jalan ka dom bruk ngak samar drah./.