Harei ini 5/6, pahadar 113 thun harei Chu tich Ho Chi Minh tabiak nao duah jalan daong taneh ia (5/6/1911- 5/6/2024). Harei 5/6/1911, meng bến Nhà Rồng, urang likei dam Nguyễn Tất Thành tabiak nao duah jalan daong taneh ia haong hatai caong mek veik đoc lap ka Taneh ia, tự do ka bhap bini, ka bangsa Viet Nam. Bruk tabiak nao thun 1911 di Wa Ho hu jeng bruk biak praong, ngak brei salih sajarah di bangsa Viet Nam. Bruk tabiak nao duah jalan daong taneh ia lac bruk biak praong, peih tabiak jalan ka bruk peih paha bhap bini, peih paha taneh ia, palei negar.

Brei panuac tamat mbang tangi sua saong javap jalei tangi sua di mbang nyaom ka 7 di Quốc hội ka dom bruk gah kiểm toán, mesup ini 5/6, Akaok QH Trần Thanh Mẫn hu panuac ieu gah kiểm toán patui jalan paglaong siam mekre, bhian tui iek dom bruk caong langyah daok kandaong veik, padang cơ sở dữ liệu pambuak haong dom bộ ngành, pandar kong nghe dalam bruk kiểm toán. Gam haong nan, patagok pasang iek đạo đức bruk ngak di dom urang kiểm toán, langyah catang dom bruk tham nhũng, tiêu cực di dalam gah kiem toan.

Pachreih tui Harei Moi truong dunya 5/6, di ban Buôn Ma Thuột, tỉnh Đắk Lắk hu ba tabiak bruk “Tet pala phun miat miat hadar dhar phol Wa Ho”. Ini jeng lac bruk ngak pamong tal pahadar 120 thun Harei padang tỉnh Dak Lak, 120 thun Buon Ma Thuot padang tabiak saong cakrok patagok (22/11/1904 - 22/11/2024), rik tame ngak hu jak jeng danak dak “ Pala sa tỷ phun hijao” kayua Rajaei peih ngak. Thun 2023, dalam tỉnh Dak Lak pala hu labaih 4.500 ha glai, mek hu labiah 252% bruk ba tabiak. Dalam nan, Ban Buon Ma Thuot, phun kayau hijao hu 17,2 m2 sa urang, lac sa dalam dom do thi hu ty le phun hijao glong abih dalam negar.

Mesup 5/6, labaih 98.000 anek saih di ban raya HCM hu nao tal dom labik pakacah ngak harak gar tame pakacah pilih ruah anek saih tame tal bac 10 THPT công lập thun bac 2024-2025. Mbang pakacah peih tabiak dalam 2 harei lac harei 6 saong harei 7/6 haong dom môn Ngữ Văn, Ngoại ngữ, Toán saong môn Chuyên. Dahlau di tuk yam tame dom môn pakacah, anek saih hu karei lac hu mbaok njauk mon di dom labik pakacah piah iek veik adat pakacah saong thông tin di drei. Ini lac bruk hu makna biak praong piah daong ka anek saih thau cambaih dom bruk ka mbang pakacah, dom harak gar, dom janih hu ba tui saong dom janih oh brei ba tui tame bilik pakacah..., plaih ngak suan adat pakacah.

Dalam harei 5/6, labaih 14.600 anek saih di Cần Thơ hu mbaok tame pakacah palih ruah tame tal bac 10 thun bac 2024 -2025, mon pakacah akaok meti lac mon Toan. Cần Thơ hu 17.400 anek saih tal bac 9 thun bac 2023 -2024, yau nan min hu 2.516 anek saih oh tut angan pakacah Mbang palih ruah tame tal bac 10 THPT thun ini. Mbang pakacah palih ruah anek saih tal 10 di Cần Thơ peih tabiak meng harei 5 -7/6. Dalam nan, harei 5 saong 6/6, anek saih pakacah 3 mon: Toán, Ngoại ngữ, Ngữ văn; harei 7/6 pakacah dom mon chuyen di sang bac THPT Chuyen Lý Tự Trọng.

Tui panuac khan di Gah Langik tasik Dunya, hu jaik 60% bruk langik tasik La Nina mai veik dalam tukvak meng bilan 7 tal bilan 9 saong jaik 70% bruk ini hu mboh dalam tukvak meng bilan 8 tal bilan 11 thun ini meda ba mai langik tasik lahơi bingi jang. El Nino lac bruk langik tasik pambuak tal bruk pandiak tagok di mbaok tasik praong di labik xích đạo pasak saong gah Timur Thái Bình Dương. Dalam tuk nan, La Nina lac bruk langik tasik ngak ka mbaok tasik di labik xích đạo Thái Bình Dương la-an nao duk haong tuk karei saong meda pambuak tal ia dauk ia sua saong pandiak bhang.

Mentri Dulich saong The thao Thái Lan brei thau lac taneh ia ini hu taduan raok jaik 15 trieu mbang tuai negar langiu kuhria meng kaok thun tal ini, mek jien tame hu labaih 700 tỷ baht, sumu 19 tỷ USD. Tui kuhria mboh, hu jaik 600.000 tuai negar langiu mai rivang ma-in Thái Lan dalam adit camereip di bilan 6, tui nan, meda hu labaih 20 trieu tuai mai rivang taneh ia baha Ameh dalam dom bilan daok veik di thun ini. Thái Lan kham merat dui pachreih 35 trieu mbang tuai dunya saong mek jien tame hu jaik 1 rabau 1 ratuh ty baht (samu 30 ty USD) meng tuai negar langiu di thun 2024. Piah dui pachreih tuai dunya, Rajaei Thái Lan harei 4/6 brei tapa dom paok jien daong je piah jhul patagok bruk ravang me-in dalam taneh ia tukvak takik hu menuac nao ravang me-in meng bilan puac thun.

Rajaei Australia tabiak panuac lac, meng bilan 7-2024, meda brei adat ka dom menuac daok di taneh ia ini hu mbaok tame tapon nyaom bol pan phao kraong. Tui Akaok Mintri Quốc phòng Richard Marles, dom paka hu pacadu veik piah brei adat ka urang daok di Australia dalam 12 bilan meda hu tame ngak bruk dalam bol lin. Urang nan oh ngak bruk dalam bol lin negar langiu dalam 2 thun dahlau di nan saong meda brei tame quốc tịch Australia../.