Di tuk Pahadar 132 thun Harei menek Chủ tịch Hồ Chí Minh, page 19/5, Bao Nhân Dân peih bruk tabiak mbaok Blah khaw tin đặc biệt Hồ Chí Minh saong jalan sahaneng “mek bhap bini ngak gha”. Blah khaw tin yaih khan labaih 1.000 kadha  vak di Chủ tịch Hồ Chí Minh hu ba tagok angaok Báo Nhân Dân meng thun  1951-1969. Langiu di  gilang tư liệu quý, Blah Khaw tin  daok ba mai ka urang puac harak, tapuk  jaik 500 kadha vak di dom urang pan akaok Đảng, Karja, dom panuac abih hatung hatian di dom urang jakar, urang đảng, dom urang roh duah, bhap bini, pacheih tui bruk jak ba “ Bac megru saong ngak tui jalan hadah krah di Hồ Chí Minh” meng thun 2007 tal thun 2022.

Tui nan, Nhà xuất bản Chính trị Quốc gia Sự thật hu peih bruk tabiak mbaok “Tu tapuk Hồ Chí Minh” saong peih pakak Bilik parang iek tapuk ka Chủ tịch Hồ Chí Minh di labik inem mek Chủ tịch Hồ Chí Minh.  “Tu tapuk Hồ Chí Minh” hu yaok ratuh baoh tapuk kayua Nhà xuất bản Chính trị Quốc gia Sự thật patabiak. Tu tapuk hu padang tabiak piah pathau khan tal rilo urang puac tapuk ka raidiuk, bruk ngak di Chủ tịch Hồ Chí Minh saong dom jalan sahneng, jalan diukrai hadah krah di Wa piah bac megru, ngak tui.

  Patui Mbang nyaom taong abih mbang ka 3 di Hội đồng Bangsa di QH mbang XV, biar harei 18/5, di Sang QH, dom urang QH brei panuac tame dự thảo pathau khan bruk ngak di Hội đồng Bangsa meng Mbang nyaom ka dua tal Mbang nyaom ka klau, QH mbang XV; bruk pasang iek kadha “Bruk ba tabiak harak quy phạm hukum hu pambuak tal bruk bangsa vaktu 2016 – 2021” di Hội đồng Bangsa; bruk pasang iek ka bruk pambak tal bhum urang bangsa takik saong bhum ceik tui ilamu patagok tal bruk peih ngak sarak bangsa.

Biar harei kabroi, Thành ủy ban raya HCM peih bruk pok meyaom dom kapul nyaom, menuac urang naih gheih, hadah krah dalam bac megru saong ngak tui jalan hadah krah di Hồ Chí Minh thun 2021-2022. Brei panuac di tuk peih bruk, Bí thư Thành ủy ban raya HCM Nguyễn Văn Nên pok meyaom 142 kapul nyaom saong 213 menuac urang hu pilih ruah meng yaok rabau kreih camin hadah dalam bac megru, ngak bruk abih drei di rilo gah, saong brei mboh hatai caong daok tui jalan bac megru saong pambak praong dalam rahra dom kreih camin hadah, rik daong patagok jalan sahneng, ilamu jum pataom, hatai anit ranam gauk, daong ba gauk di bhap bini ban raya; padang jalan sahneng, jalan diukrai, ilamu ndom puac, daok dang, ngak jeng bruk siam biak karei di bhap bini ban raya angan Wa.

Page ini 19/5, urang likei pakacah ka 1 nduac marathon Viet Nam lac Hoàng Nguyên Thanh pakacah nduac marathon likei di SEA Games 31 mek hu Huy chương Ameh bak yaom glong. Baoh HC ameh di Hoàng Nguyên Thanh lac HC ameh sajarah dakrai pakacah marathon di negar Việt Nam  kayua oh ka hu sa mbang halei, khol drei tame vô địch likei pakacah marathon di SEA Games.

Harei 18/5, Gah Khí tượng dunya (WMO) hu ba tabiak harak pathau khan “Bruk Khí hậu dunya 2021”, brei mboh 4 tanut biến đổi khí hậu praong nan lac nồng độ khí sang kreih camin, ia tasik tagok, nhiệt độ tasik praong saong axit hóa tasik praong jeng tagok dom tanut glaong bahrau di thun 2021.  Tui pathau khan, 7 thun tapa lac 7 thun ấm di abih. Thun 2021 tok lac 1 dalam 7 tukvak ấm abih kayua bruk La Nina rah tabiak di akaok thun saong jhung thun. 

  Hãng thông tấn negar Triều Tiên, KCNA brei thau, dalam harei 18/5, Triều Tiên hu veik  262.270 urang ruak pandiak birau  saong 01 urang metai dalam mbang jit ruak daok tamuh di taneh ia ini. Yaom lac Triều Tiên oh brei thau dom urang pandiak saong metai hu pambuak tal Covid-19 atau oh, min tui dom urang ilamu, mbang jit tamuh mbang ini di Triều Tiên  lac biak trak damak. Urak ini, Triều Tiên hu abih tih 1,6 trieu urang ruak pandiak saong 63 urang metai dalam mbang jit ini.

Dalam 3 harei tapa, baoh kraong Brahmaputra, lac baoh kraong praong abih di dunya tuh tame Ấn Độ saong Băng-la-đét njauk pacah takai kraong ngak brei 1 rabau 500 palei dauk dalam ia sua.  labaih 500 rabau menuac di bang Assam njauk klaak sang danaok nao nyaik  bala ia dauk, ia sua. Tui panuac khan di rilo bhap bini pak nan, rilo labik ia dauk tal cada, dauk lahik rilo drap ar, sang danaok saong njam patam di urang pala. Bruk ia dauk ia sua tui kuhria daok trak jang dalam dom harei tal./.

Urang lang: M.P & A.Nghiêm – 19/05/2022