Pahadar 132 thun Harei ndik tapui Chủ tịch Hồ Chí Minh (19/5/1890 - 19/5/2022), Viện Phim Việt Nam ngak salah bộ phim tài liệu nghe thuat “Hồ Chí Minh – Jalan padang ngak ilamu sron mbon”. Atah labaih 29 minit, bộ phim hu ngak tui jalan sajarah, brei mboh veik njauk haong bruk rah tabiak, chreih chrai saong ndung bak makna dom bruk praong, brei mboh jalan sahaneng ka sron mbon di Chủ tịch Hồ Chí Minh, pambuak bruk rah tabiak dalam negar saong dunya  yau Nyaom biai Hòa bình di Paris, Nguyễn Ái Quốc lambaok bhap bini Viet Nam di Prang saong bhap bini Viet Nam ba tabiak sarak “Caong khin di bhap bini Viet Nam”.

Harei 18/5, Sở Thông tin saong Truyền thông ban raya HCM pambuak bruk haong dom gah peih mbaok parang iek thaot binguk pahadar 132 thun harei menek Chủ tịch Hồ Chí Minh  saong 111 thun harei Wa Hồ tabiak nao duah jalan daong taneh ia (5/6/1911-5/6/2022) ngan saong kadha "Jalan nao tui takai Wa”, tapa nan bhap bini hu maong iek dom harak gar, thaot binguk brei mboh ka raidiuk, bruk ngak cách mạng di Wa, ka jalan nao 30 thun duah jalan daong taneh ia di Chủ tịch Hồ Chí Minh. Langiu di nan, daok hu dom bruk taom gaok, ndom biai nao mai, yaih khan dom kadha ka Wa, bản đồ jalan nao tui takai Wa saong dom bruk ngak karei karei hu peih tabiak di jalan tapuk ban raya Hồ Chí Minh.

Tukvak jiak ini dom urang ruak padiak tabiak drah di tỉnh Bình Dương daok tagok glong, mbuan tamuh jeng jit tui bilan di nyu. Meng akok thun mbiah tal bilan 5 dalam tỉnh  hu 2.237 mbang, 5 urang metai, dalam tuk dom bilan ini thun blaoh oh hu thei metai. Tiến sĩ Nguyễn Hồng Chương, Yam ndoc Sở Y tế tỉnh Bình Dương brei thau, sa dalam dom bruk ba tal ruak pandiak tabiak darah tagok lac jalan sahaneng  di bhap bini oh ka glong, iek lap, oh caik hatai peih ngak dom jalan pacang caga jit ruak saong pametai lăng quăng( anek raoh) ba ruak njom mbak praong dalam sang. Meneing bhap bini kayua daok iek biar, eng drei iek ruak di sang ba tal ruak samar trak saong metai.

Sở Pato Megru ban raya HCM bahrau hu panuac ka tukvak tamat thun bac 2021-2022. Tui nan, dom tal bac meng tal 1 tal tal 4 suai di abih lac tamat di harei 30/6; dom tal 5 lac harei 10/6. Di pakat THCS, dom tal 6 meda tamat thun bac di harei 15/6. Daok dom tal bac meng tal 7 tal tal 12, dom sang bac brei pasang iek học kỳ II saong bac salah danak dak dahlau di harei 15/5. Yau nan, bilan padeih hè 2022 di anek saih ban raya HCM nyu karei gauk tui tal bac, pakat bac.

Công an huyện Xuyên Mộc, tỉnh Bà Rịa – Vũng Tàu brei thau, hu ba tabiak piah kaoh tui hukum, langyah  saong chap kareik Lê Xuân Vĩnh, ndih tapui thun 1964, daok di Thạnh Sơn 4, xã Phước Tân piah pasang iek ka bruk rambeik rambai uranaih umo ala 16 thun. Dahlau di nan, harei 8/5/ 2022, sa urang likei ruak angan P, ndih tapui thun 2006, daok di xã  Phước Tân, huyện Xuyên Mộc hu mai tal bilik di Vĩnh piah jru ruak kalik. Di labik ini, hadei di tuk iek ruak  ka adei P blaoh, ong Vĩnh iew urang leik abih khan ao saong rambeik rambai. Di jabat công an, ong Vĩnh taduan bruk nan.

Bruk peih mbaok Harei pataom phim Cannes mbang ka 75 hu peih tabiak di ban angan yau nan di negar Prang melam 17/5 (tui mon pak nan) tapa bruk ba danak dak di urang kumei diễn viên dane angan urang Bỉ lac Virginie Efira. Thun ini, 21 bộ phim hu pilih ruah piah pakacah gauk meblah giải Cành cọ vàng, giải thưởng glaong abih di harei pataom phim dane angan ini, dalam nan njauk caik hatai lac hu "Top gun: Maverick" di tài tử Tom Cruise saong  phim “Tiểu sử Elvis” di Baz Luhrmann, hu mbaok di dua urang dane angan lac Austin Butler haong Tom Hanks.

Brei panuac  di mbang nyaom hu labaih 30Aakaok Mentri Ngoại giao dom taneh di LHQ harei 18/5, Akok Mentri Ngoại giao Đức Annalena Baerbock ndom lac, bruk kurang pandap mbang di dunya oh meda yam tapa hu dalam samar drah. Muk An-na-lê-na Be-ơ-bốc ndom lac, dom gah brei pataom tame  langyah dom bruk ba tal iek lipa jeng yau daong dom taneh ia gaok kan kandah trak abih kayua bruk kurang pandap mbang yau châu Phi saong Trung Đông. Hu rilo bruk ba tal kurang pandap mbang di dunya urak ini, dalam nan bruk mesruh Nga-Ukraine ba tal bruk klaik klaoh dalam bruk pabak pandap mbang di dunya, ngak ka yaom năng lượng saong pandap mbang tagok glong.

Takik di abih 12 urang metai saong 1 urang karei njauk rambus dalam bruk jaleih daning biak khang harei 18/5 di bang Gujarat, gah pai Ấn Độ. Taong abih dom urang njauk bala nan jeng lac urang ngak daok ngak bruk di labik padang ngak ini. Urak ini, bruk cứu hộ jeng daok rah tabiak dalam samar drah./.

Urang lang: M.Phuong & Ai Nghiem – 19/5/2022