Di tuk pahadar 233 thun Jayah Ngọc Hồi-Đống Đa sajarah, biar harei 15/2 (lac harei ia bulan bak baoh bilan 1 thun sak ramaong), Ong Nguyễn Xuân Phúc – akaok negar, mai cuh gilau, pok bingu saong cakak mbăng peih pakak labik pok kakuh Tây Sơn Tam Kiệt  daok dalam danak dak peih praong Miuyim Quang Trung – inem krung sajarah pakat negar di ban sit Phú Phong, huyện Tây Sơn, tỉnh Bình Định. Brei panuac pak nan, ong Nguyễn Xuân Phúc ndom lac, Bình Định lac labik pataom, pambuak ilamu dom bangsa Việt, Chăm... Bình Định jeng lac bhum taneh ginreih, menuac naih gheih, labik tabiak bruk khởi nghĩa Tây Sơn kak kajap haong angan AH bangsa Quang Trung-Nguyễn Huệ.

Jabat Rajaei bahrau hu harak ka 42 brei thau panuac tamat di Phó Thủ tướng Rajaei Lê Văn Thành di mbang ginum biai ka bruk caga buh jien tame ngak dom Danak dak buh padang ngak jalan nduac samar tukvak 2021-2025. Phó Thủ tướng Lê Văn Thành ieu kakei dom Mintri, dom tinh, ban pambuak tal brei jhul samar bruk peih ngak dom danak dak jalan nduac samar piah kham marat tal thun 2025 hu 3.000 km jalan nduac samar. Ini lac dom danak dak biak praong, dalam nan hu 05 danak dak praong pakat negar saong 04 danak dak nyaom A.

Sở Y tế TP.HCM biar harei 15/2  brei thau, tapa taong yaom pakat jit tui tacei pato bharau di Mintri Y tế, ban raya hu 275 phường, xã pakat 1 saong 37 phường, xã pakat 2 (rilo jang 36 phường, xã duk haong jalan taong yaom klak).  Hu 4 makna praong ngak brei tagok pakat jit meng pakat 1 tagok pakat 2 di dom phường xã nan: ka 1 lac kayua bruk klauk vaccine ginup mbang oh ka hu yau quy định ngak brei tagok jang 1 tanut njaom mbak, nan ye meda ngak brei tagok jang 1 pakat jit; ka 2, tanut njaom mbak di tanut 2 min prein pacang di tanut mbiah nan ye pakat jit lac pakat 2; Makna ka 3 lac tanut njom mbak di tanut 3 saong prein pacang daok di tanut glaong nan ye pakat jit lac pakat 2;  Makna puac di abih lac menuac metai dalam 100.000 rahra yam tapa tanut ba tabiak (lac 6 urang dalam  100.000 rahra).

Hadei di labaih 1 thun kham merat padang ngak, Sang mac điện hangin ka 7 di Ấp Âu Thọ B, xã Vĩnh Hải, ban sit Vĩnh Châu, tỉnh Sóc Trăng bahrau hu peih pakah. Sang mac điện hangin ka 7 kayua Công ty Cổ phần Năng lượng Sóc Trăng ngak po hu padang ngak di bhum tapen tasik ban sit Vĩnh Châu praong jaik 90 ha labik ar tapen tasik saong labaih 3 héc ta dalam mblang taneh; taong abih jien buh tame ngak sang mac jaik 5.700 tỷ đồng,  taong abih prein khang thiết kế 120 MW. Dalam nan tukvak ka 1 hu ngak salah, Sang mac điện hangin ka 7 hu prein khang 30MW.

800 urang Low dalam khan ao hadah tanyak, ngak jeng dom tiên nữ, Thần Tài… ba gauk nao diễu hành, tamia lân vil val labik Chợ Lớn, biar harei 15/2. Tết Nguyên tiêu, daok ieu lac Tết Thượng nguyên, hu peih ngak di melam ia bulan bak baoh bilan 1 lac tuk piah ka menuac urang likau hu siam mekre, salamat, caong hu 1 thun sron mbon. Di dom canah 4 jalan, labik menuac daok rilo, baha, hội quán... dom kapul lân sư rồng nao tapa jeng padeih veik tamia, dui pachreih hu rilo menuac dua gah jalan dang veik tui iek. Dalam harei Tết Nguyên tiêu daok hu dom bruk karei karei yau ye: "adit pandap mbang huak, harei ariya Việt Nam, parang iek mỹ thuật, rup cih, thư pháp, thaot binguk, kadha mein meng kan mai di bhap bini…

Tui pathau khan kayua Liên hợp quốc brei thau di harei kabroi, nerak tachauk  daok ngak ka dom menuac metai di dunya rilo jang dut saong COVID-19. Tui yaok pataom brei mboh, hu takik di nyu 9 triệu urang metai aval kayua njauk tachauk nerak atau njauk jru mek dalam alam moi trương, rilo jang 2 mbang dom menuac metai dalam 18 bilan camriep di jit praong COVID-19. Dom menuac metai di dunya kayua dom janih ruak pambuak tal nerak tachauk lac 1/6, rilo jang labaih 15 mbang dom menuac metai kayua njauk taong paoh. Makna biak praong ba tal metai aval lac njom tachauk nerak không khí, tui kuhria lac ngak ka labaih 7 triệu urang metai yaok thun. Dom menuac metai pambuak tal nerak tachauk rilo meng lac di dom taneh ia hu jien mek tame bier saong mbiah.

Yaom lac hu panuac taong yaom bruk Nga tabiak panuac lac ba dom kapul nyaom  lin tabiak truh labik tapen negar Nga-Ukraina lac bruk siam, brei mboh bruk catang tagok daok hu pacadu, min dom taneh ia châu Âu jeng daok caik hatai sangka, mboh lac bruk mesruh gauk jeng daok mbuan patuh tabiak. Min javap jalei dom panuac di dom taneh ia phương Tây, rajaei Nga harei 15/02 rilo mbang ndom lac, Nga hu ba lin tabiak njauk tui bruk hu ba tbaiak dahlau di nan. Gah Nga jeng brei thau lac daok halan hatian tui dom jalan ginum biai sron mbon haong phương Tây.

Dom urang ngak praong Canađa brei thau, meng harei 28/2, dom tuai damuai dunya mayah hu klauk ginup meda mbuan jang tame taneh ia ini. Tuai tame negar njauk dut iek kháng nguyên samar, salih ka dut iek PCR. Canađa jeng meda klaak bruk ieu dut iek COVID-19 ngan haong dom rahra hu klauk ginup peih bruk nao katut harei (ala 72 maong) tabiak negar langiu. Tui akaok mintri Y tế Canađa, taneh ia ini hu tapa tabung glaong di Ô-mi-crôn saong bhap bini Canađa hu jia tame bruk klauk vacxin pacang caga jit ruak./.

Urang lang: Thu Thảo & M.Phuong – 16/2/2022