Ong Trần Quốc Nam, Akaok UBND tỉnh Ninh Thuận 

Pahadar 30 thun padang veik tỉnh (1/4/1992-1/4/2022), Tỉnh ủy, HĐND, UBND, Ủy ban MTTQ Việt Nam tỉnh Ninh Thuận hu peih ginum nyaom "Ninh Thuận - 30 thun sa canah jalan salih bahrau song patagok ". Dalam ginum biai, ong Trần Quốc Nam, Akaok UBND tỉnh Ninh Thuận ndom lac, meng hatai khin sahneng, khin ngak, khin salih bahrau, pandar siam dom prein khang di drei, patagok siam lagaih gam song dom kham meret, hatai caong yam tagok di taong abih hệ thống chính trị, dom pakat, dom gah, dom doanh nghiệp, di abih bol bhap rahra, tỉnh mek hu dom jak jeng biak hadah mbaok meta di rilo gah. Tuk vak anak tal, Ninh Thuận daok brei peih ngak dom jalan piah jhul pakhang patagok kinh tế-xã hội; kham merat mek hu bruk lac tỉnh cakrok di di bhum saong di taneh ia yau sarak di nyaom roya Đảng bộ tỉnh tuk vak 2020-2025 batabiak

Tui bruk ba tabiak, akaok bilan 4/2022, 63 tỉnh ban ba gauk yam tame bruk klauk vắcxin caga Covid-19 ka uraniah umo meng 5 tal 11 thun. Vắcxin hu pandar lac vắcxin caga Covid-19 kayua Pfizer haong Moderna ngak. GS.TS Phan Trọng Lân, Akaok Cục Y tế kuhria caga, Mintri Y tế ndom lac, dom uraniah njauk ruak Covid-19 blaoh, meda klauk vắcxin hadei di tuk njaom ruak 3 bilan.

Jit COVID-19 ngak ka dom urang ngak di tỉnh Đồng Nai njauk nao veik palei kayua oh hu jien pah sang trọ, jang yau bruk oh lagaih di dom sang trọ. Thau hu bruk ni, urang pal akaok tỉnh Đồng Nai brei peih bruk rami ramik, padang ngak sang dok xã hội piah iek glang siam jang ka urang duah hu jien takik. Urak ni, tỉnh Đồng Nai hu 13 danak dak sang dok xã hội, sang dok di urang ngak dok hu peih ngak ngan song taneh prong jiak 60 ha, pabak ka labaih 10.746 boh sang.

Piah pabak bruk nao mai di tuk lễ 30-4 haong 1-5, Tổng ty jalan pasei Việt Nam brei peih nduac rilo jang dom radaih pajeng tuai di dom jalan nao, abih di nyu lac jalan meng TPHCM saong Hà Nội nao tal dom tỉnh pachreih hu rilo tuai nao ravang me-in dalam dom harei padeih lễ. Labik gah meraong negar, gah jalan pasei brei peih nduac rilo jang 17 sruh meng TPHCM nao Phan Thiết, Nha Trang, Quy Nhơn, Đà Nẵng saong mai veik. Bhum gah barak, peih nduac rilo jang 30 sruh meng Hà Nội nao Lào Cai, Thanh Hóa, Vinh, Đồng Hới, Huế, Đà Nẵng, Hải Phòng saong mai veik.

Dom melam doh takơ hadar tal nhạc sĩ Trịnh Công Sơn hu peih tabiak meng harei 31/3 - 3/4 di phòng trà Trịnh Ca, Hà Nội. Gam song nan, sang di nhạc sĩ song ekip phim điện ảnh Em và Trịnh hu peih melam doh takơ hadar tal ong hu angan ieu lac 21 thun hadar Trịnh Công Sơn harei 1/4/2022 di jalan tapuk ban raya HCM.

Meng harei ini (1/4), Japon brei patrun umo trưởng thành meng 20 trun daok 18 thun. Tapa bruk pasiam veik Hukum Dân sự, dom adat hukum ka urang trưởng thành di Japon mbang camereip di abih hu salih karei hadei di labaih 140 thun. Bruk ngak nan piah urang ranaih umo hu mbaok tame rilo jang dom bruk kinh tế - xã hội, min jeng hu dom suh sah lac, dom urang ini mbuan njauk lah pachot tuk hu adat mbaoh tangin tame harak pambuak bruk pandar cai bo oh hu bruk tui iek di amaik ame.

Hadei di sa tuk vak brei padeih, tui kuhria harei ni, urang pal akaok Liên minh châu Âu (EU) song Trung Quốc hu peih nyaom biai pakat glong tui jalan online. Rah tabiak dalam tuk talei rohim Trung Quốc - EU dok mbiah mbaoh kayua rilo bruk kandah gauk gah ngoại giao, địa chính trị song pablei salih, nyaom biai mbang ni hu tong yaom lac sa “jalan ngak iek” ka talei rohim di 2 gah, tuk châu Âu oh njauk hatai song khin kateik greik Bắc Kinh brei hu jalan ngak cambaih laih ka bruk Ucraina song talei rohim song Nga.

Harei ini, rajaei Australia bahrau tabiak panuac lac brei pabak tame gac 85 triệu đôla Australia piah daong ka dom taneh ia hu pandar vaccine pacang Covid-19. Ngan haong Việt Nam, Australia hu ngak blaoh panuac sanya parabha brei 7,8 triệu mbang vaccine pacang Covid-19 di Pfizer tapa UNICEF saong 4,2 triệu mbang vaccine AstraZeneca meng labik karei di taneh ia drei. Langiu dom vaccine ini, rajaei Australia jeng bahrau hu panuac sanya lac meda brei pabak gac 13,7 triệu mbang vaccine pacang Covid-19 ka uraniah umo meng 5 tal 11 thun di Việt Nam pak di dalam dom adit camereip di bilan 4/2022./.

Urang lang: Hani Pha – M. Phương – 01/04