Dalam nan, brei jien rami ramik ngak pasiam 10 baoh sang, daong 10 pandap panda ngak mbang pala drak saong 11 sruh radaih juak ka sang gaok kan kandah, alin harak Bảo hiểm y tế ka baoh sang kan kathaot daok raidiuk di bhum tapen negar bhum tasik Cần Giờ di xã Lý Nhơn; jao 24 paok pandap ka dom “kapul eng drei khik iek an ninh trật tự”, “Kapul gilai, kapal eng drei khik iek salamat”, alin 100 paok pandap ka 100 baoh sang sarak kanja saong sang gaok kan kandah. Abih tih phun jien lac labaih 1 tik 500 trieu dong. Gam tui di nan jeng peih bruk iek ruak, alin jru tavao oh mek jien ka 500 rahra dalam huyện Cần Giờ.

Salam uan 92 thun Harei padang Kapul dam dara CS Hồ Chí Minh (26/3/1931-26/3/2023), dalam 2 harei tapa, di TP Bà Rịa – tỉnh Bà Rịa Vũng Tàu, labaih 200 dam dara lac urang bangsa takik, urang tui agama, urang jakar ngak bruk gah bangsa hu mbaok tame Harei pataom pambuak dam dara agam, bangsa thun 2023. Harei pataom lac tuk peih praong bruk jum pataom dam dara, paglaong angan je di Kapul dam dara dalam puk palei. Harei pataom hu Hội Liên hiệp Thanh niên tỉnh pilih ruah lac bruk peih tabiak jalan “Dahlak anit ranam taneh ia dahlak hulin” thun 2023, labik jalan ka 1, ngan saong kadha “jalan nao pok meyaom saong patagok yaom glaong inem krung ilamu bhap bini bangsa takik, pambuak dam dara, agam, bangsa” thun 2023.

Tui Mintri Pato magru, bhum ĐBSCL hu labaih 92.900 bilik bac dom pakat mầm non, phổ thông công lập, min dom bilik  khang kadang bahrau hu labaih 81%. Kayua yau nan ye, dom bilik bac khang kadang tui kuhria rah tapa mboh lac bier jang di dalam taneh ia. Langiu di nan, jeng daok kurang rilo bilik di dom bhum hu rilo rahra, bhum atah biyah, bhum biak kan kandah. Urang par akaok dom tinh, ban di ĐBSCL jeng mboh lac pandap panda pabak ka bruk pato magru daok takik. Di dom labik jeng daok pandar bàn kik janih 4 kik daok klaak oh daok lagaih haong bruk bac da-a bahrau.    

UBND tỉnh Đồng Nai bahrau mbaoh tangin brei adat buh jien tame ngak danak dak binah 3 di danak dak padang ngak jalan Vành đai 3 - TP.HCM, labik nao tapan tỉnh haongyaom jien buh tame ngak abih tih jaik 2.600 tỷ đồng. Danak dak atah 11,26 km, labik akaok lac di labik Km0+000 di xã Vĩnh Thanh, labik jhung di tatua Nhơn Trạch dalam xã Long Tân (jeng daok dalam huyện Nhơn Trạch). Labik jalan cao tốc di danak dak hu 8 jalan radaih, nduac hu 100km/giờ. Tui kuhria, danak dak hu peih tabiak ngak di bilan 6/2023, meda ngak salah di thun 2025 saong brei radaih nduac peih di thun 2026.

Piah paglaong bruk pacang caga jit cum manuk ada, pacang cakak saong langyah biak catang dom bruk pajeng athur, pandap ngak meng athur suan adat hukum tapa jalan tapen negar, akaok UBND tỉnh Đồng Tháp bahrau hu harak ieu kakei dom tinh, ban jhul samar dom bruk pasang iek pacang caga jit ruak, caga dahlau bruk pambuak gauk haong dom kapul chức năng peih ngak biak catang dom bruk pasang iek jit ruak, pasang iek bruk pajeng ba athur, pandap athur, peih bruk pacang caga saong langyah biak catang dom bruk pajeng athur, pandap athur suan adat hukum tapa jalan tapen negar …

Mintri Y tế Campuchia khan lac, sruh jit menuk ada (A/H5N1) di tỉnh Prey Veng, jaik taphia Việt Nam hu pacang veik, oh hu bruk njaom mbak tabiak gah langiu. Dalam harei 26/02 taneh ia ini tok hu 2 urang njom cúm menuk ada. Daok bruk urang ame di uranaih metai kayua njom virus cúm menuk ada di adit blaoh, hu dut iek veik saong mboh lac âm tính. Kuhria meng tuk tamuh jit cúm menuk ada camereip abih di negar Campuchia di thun 2005 tal urak ini, hu 58 urang njom virus cúm menuk ada H5N1 saong tok hu 19 urang abih ruak.

Urang par akaok negar Triều Tiên Kim Jong-un hu ba tabiak panuac ieu salih bahrau dalam bruk ngak nong, dalam tuk daok huac bruk kurang pandap mbang di taneh ia ini dak harei dak trak damak. Urang par akaok negar Triều Tiên brei thau lac, negar ini njauk mek hu dom bruk ba tabiak dalam bruk ngak ngũ cốc, gam tui di nan jeng brei mboh yaom glaong dalam tani tanat bruk ngak nong. Meng akaok bilan 2, Mintri yasa Hàn Quốc brei thau lac, bruk pandap mbang di Triều Tiên mboh lac daok jhak nao.

Labaih 300 mbang par meng dom mblang kapal haok Đức brei padeih veik kayua công đoàn nhân sự Verdi – sa dalam dom kapul công đoàn gah dịch vụ praong abih di Đức đình công dalam harei 27/2. Urang ngak dalam gah kapal haoh ieu ndok bayar jien bilan glaong jang dalam tuk jien mek tame di urang ngak gaok kan kandah kayua lạm phát glaong. Dalam dom adit jaik ini, Đức hu rilo mbang đình công dui atah. Bahrau ini, harei 17/02, bruk đình công ngak brei hãng kapal haoh praong abih di Đức lac Lufthansa klaak labaih 1.300 mbang par./.