Melam harei 2/7, UBND TP.HCM peih Danak dak daoh tamia praong pahadar 325 thun padang ban Sài Gòn – ban raya Hồ Chí Minh (1698-2023) saong Pahadar 47 thun harei ban Sài Gòn - Gia Định hadah mbaok mata hu mek angan Chủ tịch Hồ Chí Minh (2/7/1976 – 2/7/2023).  48 thun meng di harei peih paha gah maraong negar, yasa taneh ia, 47 thun harei ban Sài Gòn - Gia Định hadah mbaok mata hu caik angan Chủ tịch Hồ Chí Minh piah pahadar labik Wa tabiak nao duah jalan daong ka taneh ia, hadar dhar phor di Wa. Dalam bruk dak padang saong cak rok patagok, ban tuk halei jeng kham merat patagok ilamo anh hùng, sami samar, sahneng duah bahrau piah mbeik drei khang ka sa đô thị praong; ba akaok nao dahlau, pachreih ba ka abih bhum saong dalam taneh ia.

Meng akaok thun tal ini, dalam taneh ia hu jaik 15.000 urang njauk ruak tangin takai cambuai saong 7 urang metai. Njauk caik hatai lac, dom urang metai jeng pambuak tal virus EV71 ngak brei ruak trak. Tapa dut iek dom mẫu ruak jeng brei mboh lac 40% dương tính haong janih virus ba tal ruak trak. Ini lac makna ngak brei dom urang ruak trak tagok rilo duk haong dom thun dahlau. Anak bruk ini, Mintri Y tế hu padang dom kapul ngak bruk pasang iek, pacang caga jit ruak di dom tỉnh, ban.

Mintri Ngak nong saong patagok palei pala bahrau pathau khan bruk glai dalam taneh ia thun 2022. Dalam nan, mblang taneh glai hu gam glai ka oh khép tán lac 14 triệu 790 ribau ha. Bruk pacang ma-aom di glai dalam taneh ia lac labaih 42%.  Mintri Ngak nong saong patagok palei pala ieu kakei dom tinh, ban hu mblang taneh glai trun dalam thun 2022, njauk peih bruk pasang iek ngak cambaih laih makna saong peih ngak dom jalan ngak pasiam veik mblang taneh ngak glai trun, lahik; pasang iek bruk ngak (mayah hu) di dom gah kapul, manuac urang hu pambuak tui njauk adat.

Hadei di sa tukvak  atah yaom thanh long dang di tanut glaong, urang pala hu laba rilo, ye urak ini di Tiền Giang yaom daok laik trun kayua tame bilan paik baoh rilo.  Di tukvak ini, yaom thanh long ralow bhong meng 5.000 đồng tal 7.000 đồng sa kg, trun labaih 25 rabau đồng sa kg duk haong bilan dahlau.  Yaom lac urak ini yaom baoh thanh long trun biar min urang pala jeng daok kham merat sangka piah ka bein phun karei bilan meda truac gom ka phun hu rilo baoh saong yaom glaong jang.

Piah khik ramik bruk peih ngak, khik caga saong cak rok patagok kaya tasik, Sở Ngak nong saong patagok palei pala tỉnh Kiên Giang pakauk abih tih dom sruh gilai atah mala 12m kuac mek nghêu lụa, sò huyết, hến di bhum tapen tasik Kiên Giang meng harei 1/7/2023 tal 31/12/2023. Dom labik ngak tabiak, pablei salih kaya tasik oh hu pataom, ngak tabiak, pajeng ba, pablei salih nhuyễn thể 2 kaduh hu peih ngak dalam tukvak njauk pakauk. Dalam tuk nan, kapul chức năng meda paglaong bruk pasang iek saong langyah catang dom bruk eng drei kuac mek, pataom mek, ngak, khik piah, pajeng ba, pablei salih janih 2 kaduh hu kuac mek dalam tukvak pakauk mek atau hu asal oh thau cambaih laih.

Thái Lan hu 48 urang njauk ruak đậu mùa khỉ dalam bilan 6, rilo jang dua - klau mbang duk haong bilan 5, saong jaik abih urang ruak lac likei, dalam nan hu 22 urang njom HIV-AIDS. Yaom lac oh hu dom triệu chứng ruak trak bhian ba tal metai, min Cục Pasang iek jit ruak Thái Lan hu panuac kakei bhap bini njauk nao pasang iek ruak samar drah meyah mboh tagok baoh ia di dom labik angaok rup, pandik akaok, pandik talang. Dom triệu chứng meda tamuh tabiak dalam 21 harei hadei di tuk taom gaok, daok jaik urang njom ruak.

Kapul pambuak bruk Islam (IOC) hu 57 taneh ia brei thau lac, njauk hu dom jalan ngak haong gauk piah pacang caga dom bruk ngak jhak tal kinh Koran saong hukum dunya njauk hu pandar piah pacang cakak kol ngak kanjak jhak di agama hadei di bruk cuh kinh Koran di Thụy Điển. Dahlau di nan, sa urang likei hak saong cuh kinh Koran di gah langiu sang magik pak pasak di Thụy Điển harei 28-6, harei camriep ngak Qurban di urang Islam. Bruk ngak ini nyu ngak ka Thổ Nhĩ Kỳ biak ginaong tagok, dalam tuk Thụy Điển daok caong hu bruk daong di Thổ Nhĩ Kỳ piah hu mbaok tame liên minh quân sự NATO.  Bruk ini na tal bruk trun jalan praong di Bát-đa anak jabat lambaok negar Thụy Điển di Irắc.

Dalam 2 harei tapa, jaik 40 palei di bang Assam gah đông bắc Ấn Độ dauk dalam ia sua. Ia sua ngak ka jaik 10 rabau urang daok pak nan gaok kan kandah biak trak. Bruk ia sua ia dauk di bang Assam gah đông bắc Ấn Độ jeng daok khang, ngak kan kandah tal bruk ngak mbang ngak huak di menuac sia dalam palei saong ngak ngak khut rilo palei. Ngin khang tui bilan rah tabiak yaok thun di bang Assam lac makna ba tal ia sua ia dauk saong glut jaleih taneh, ngak brei rahra nduac klaak sang danaok saong lahik pandap panda, drap ar./.