Melam kabroi, di tỉnh Quảng Trị, peih ngak melam hadar dhar phol dom urang hu buh prein yawa daong taneh ia di TPHCM. Tukvak tapa, TPHCM hu peih ngak rilo bruk “Bayar dhar phol”,  sangka iek glang baoh sang urang jaoh jo, baoh sang liet si, urang hu buh prein ka cách mạng. Dalam tukvak 2013-2023, Ban raya  jak ba rik jien tame Kadung jien “ Bayar dhar phol” hu jaik 189 tỷ đồng; rik daong ngak brei paglong raidiuk ka dom baoh sang dalam sarak karja; taong abih dom amaik Viet Nam Anh hùng daok diuk hu dom gah taduan raong; taong abih dom xã , phường ngak siam bruk Thương binh – Liệt sĩ.

Tỉnh Đồng Tháp kham merat ka taong abih bhap bini hu blei bảo hiểm y tế saong piah ka bruk ini hu jeng biak, ye bruk pathau khan ka siam mekre, yaom glaong di sarak bảo hiểm y tế hu ba tagok dang akaok. Urak ini, dom menuac pandar thẻ bảo hiểm y tế mai iek ruak di dom labik iek ruak dak harei dak rilo jang, thun 2023 dalam tỉnh hu 3 triệu 700 rabau mbang urang mai iek ruak bảo hiểm y tế, jien bayar ka bruk iek ruak bảo hiểm y tế lac jaik 1.200 tỷ đồng.  

Sở Dulich tỉnh Bà Rịa - Vũng Tàu khan lac, dalam bilan 7 birau blaoh kuhria taong abih tuai damuai mai rivang main, menei ia tasik saong padeih padei labaih 1.687 ribau mbang, tagok 15% dut saong bilan ini thun dahlau. Bruk duh ka tuai damuai mai rivang ma-in hu patagok, trat tu, pacang caga apui khuah patuh di dom doanh nghiep dulich hu khik kajap. Yau nan min, tuai damuai rilo meng palih ruah dahlau dom danak dak rivang ma-in  katut harei, yaom patak pataom saong nao tui nyaom takik manuac, nan ye jien mek tame  gah bruk dulich daok takik.

Pasak pasang iek ruak kik (CDC) tỉnh Đồng Nai bahrau brei thau ka sruh jit gila maroi di sau ban glai ban klo kaik 11 urang di huyện Định Quán. Dahlau di nan, harei 12/8, sa drei asau bilau katam kanyik, trak 7 kg (oh ka thau po di nyu), mboh yau ruak gila, maroi. Hadei di tuk kaik 11 urang, drei sau njauk rahra mek kreik. Drei sau hu mek mẫu dut iek saong mboh lac dương tính haong virus gila meroi. Yau nan, meng akaok thun tal ini, dalam tỉnh Đồng Nai hu 24 sruh jit sau gila, sau meroi. 

Meng akok bilan 8 mbiah tal ini, langik gah Meraong negar takik hajan, harei pandiak ralo saong catang, di Ban raya HCM saong dom tỉnh, ban karei hu pandiak  meng 35 -36 độ C. Ong Lê Đình Quyết, Akok jabat Kuhria mboh dahlau, Bilai tui iek bruk langik tasik bhum Nam Bộ khan lac, bruk ba tal pandiak kayua mbaok taneh, labik pandiak di gah Pei cak rok saong pambak praong gah Đông Nam. Tui kuhria  mboh dahlau meng harei 20 - 21/8, hajan hangin  meda khang tuk biar harei di Nam Bộ, hu dom labik hajan khang. Njauk caik hatai  hangin  hadei mbang pandiak bhang tua riya langik sraw kadau ralo, mbuan rah tabiak dom mbang ribuk hangin khang, jakala klak, hangin khang ba tal bala khang.

Mintri Jien padai Singapore khan lac daong ka rahra pacang lạm phát. Tui nan, taong abih menuac praong  ginup paka ba tabiak, hu taduan jien daong sa mbang meng 200-400 SGD di bilan 9, piah pabak ka jien cai pandar tagok glaong. Danak dak ini hu pandar ka labaih 2 triệu 400 rabau menuac Singapore umo meng 21 thun tagok dalam thun ini saong brei ka taong abih urang hu jien mek tame njauk kak je meng 100.000 SGD trun dalam sa thun. Urang ngak po rilo jang sa sang danaok taneh riya, oh taduan hu bruk daong ini. 

Yaok ribau bac si ngak bruk dalam karja di Ấn Độ trun jalan cagar veik bruk kateik greik rapeik rapai saong pametai sa bac sĩ umo 31 thun di ban Kolkata, bang Tây Bengal. Dom bac si ba tui dom bieu ngu ndom tagok bruk biak pandik harao, eiw brei ngak njauk hukum ka urang gaok bala saong iew brei hu dom jalan peih ngak siam jang di sang iek ruak. Bruk trun jalan samar hu pambak praong di ralo bang hu mbaok tame di labaih 8.000 bac si ngak bruk dalam karja, ngak brei dom sang iek ruak brei padeih ngak bruk di anak meta.

Y tế dunya (WHO) tabiak panuac samar drah ka bruk prein yava menuac sia dunya kayua ruak đậu mùa khỉ mbang ka dua dalam 2 thun. Urak ini, dom chuyên gia hu ba tabiak bruk pandar vaccine pacang caga ruak đậu mùa khỉ di anak tal. Ruak đậu mùa khỉ pambak tabiak grauk labik dalam taneh ia Congo dahlau di tuk mbak tapa dom taneh ia karei. Congo lac labik camereip abih janih virus ba tal ruak đậu mùa hu mboh di menuac di thun 1970.