Pahadar 64 thun Harei Bol lin khik caga jalan negar (03/3/1959 – 03/3/2023) saong Bilan dam dara thun 2023, page ini (3/3), T.Ư Đoàn Dam dara CSHCM, T.Ư Hoi LH dam dara Viet Nam pambuak haong Bộ Tư lệnh Bol lin khik caga jalan negar peih ngak danak dak “Bilan klau jalan negar” ngan haong kadha “ Jalan tapen negar dahlak” di dom tỉnh taphia negar Lạng Sơn, Quảng Trị saong Kiên Giang. Dalam danak dak peih ngak Mban peih bruk gam haong dom đơn vị alin brei pandap ka baoh sang di sarak karja saong anek saih sang kan kanthaot, alin hala dok Negar ka dom baoh sang khik caga jalan tapen negar, daong brei phun kreim ka bruk “ Mbuk kreim jalan negar Viet Nam”. Abih di nyu, peih ngak dom danak dak “ Truac hadah jalan negar”, jalan khik iek tapen negar…Yaom dom paok pandap, danak dak, bruk ngak dalam Danak dak kuhria tui jien lac labaih 7,2 tỷ đồng.

Tỉnh Bình Dương saong Bình Phước hu njauk gauk ka gah jalan cao tốc TP. Hồ Chí Minh – Thủ Dầu Một – Chơn Thành (labik tapa dua tỉnh) atah 45,6 km hu yaom phun jien buh tame ngak abih tih labaih 17.000 tỷ đồng. Tui kuhria, jalan cao tốc meda peih ngak saong ngak salah di thun 2026. Hadei di tuk ngak salah meda ba prein khang ka abih bhum kinh tế praong gah maraong, dui katut veik tukvak saong jalan nao meng TP. Hồ Chí Minh tal Bình Dương saong tỉnh Bình Phước; dalam nan kanja saong rahra, doanh nghiep tỉnh Bình Phước biak caik hatai sangka tal danak dak ini.

Piah peih ngak Danak dak “ Dong bruk ngak brei likei kumei sumu gauk bhum urang bangsa takik di tỉnh Bạc Liêu” thun ini, Mban Bangsa saong Agama tỉnh Bạc Liêu peih tal pasram bruk ngak likei kumei sumu gauk dalam bhap bini bangsa takik ka 60 urang lac oh hu mbang tui kadung jien karja. Dom urang hadei di bac blaoh hu jeng dom urang kham merat pathau khan brei bhap bini, abih di nyu na lac urang bangsa takik hu paglong jalan sahaneng, thau ramik jalan diukrai, ngak njauk tui hukum karja ba tabiak dalam bruk likei kumei sumu gauk.

Tỉnh Bến Tre daok ba tabiak dom jalan ngak pacang caga anak bruk ia njom mbak di dom kraong praong tagok glaong, piah patrun patakik dom kan kandah di bruk njom ia mbak ngak kan kandah tal bruk pala drak, raidiuk di rahra. Tui akaok UBND tỉnh Bến Tre, bruk njom ia mbak, pandiak bhang di thun ini rahtabiak oh njauk tukvak yau dom thun dahlau. Piah pacang caga bruk pambuak gauk di ia tagok saong bruk njom ia mbak, dalam tukvak anak tal, UBND tỉnh Bến Tre ieu kakei dom gah, dom pakat peih bruk pasang iek dom labik thaong, samar drah pok paglaong, pasiam piah pacang caga ia tagok; khan bruk rahtabiak di ia tagok, glut jaleih brei bhap bini thau.

Le hoi Dinh Cô daok iew lac Lễ giỗ Cô, Lễ vía Cô di ban sit Long Hải, huyện Long Điền, Bà Rịa - Vũng Tàu birau hu Mentri Ilamu, The thao saong Dulich hu ba tame angan Inem krung phi vat the pakat negar. UB bhap bini tỉnh BR-VT mboh lac Lễ hội Dinh Cô hu jeng Inem krung phi vat the pakat negar rik daong siam tame bruk khik ramik ilamu hu rilo janih di gilang inem krung Viet Nam. Ini lac sa dalam dom adat cambat prong di bhum tasik Nam Bộ , peih ngak di Dinh Cô-Inem krung sajarah dakrai ilamu pakat negar di ban sit Long Hải,caong khin palei negar sron mbon, bhap bini jap karo, abih di nyu lac chraong daong ka urang nao ngak mbang di tasik hu rilo ikan hadang.

Dom urang metai dalam bala ginuh gauk di radaih pui pajeng tuai saong radaih pui pajeng pandap rahtabiak di melam 28/02, di gah kreih negar Hy Lạp tagok tal labaih 57 urang. Akaok mintri jalan mbak pajeng ba Hy Lạp hu payua harak likau padeih bruk di dom maong hadei di tuk rahtabiak bala. Thủ tướng Hy Lạp ieu bruk ini lac “bala radaih pui biak trak damak abih ka oh bhian mboh” di Hy Lạp, gam tui di nan jeng sanya brei pasang iek ginup ka bala trak damak ini. Rajaei Hy Lạp jeng tabiak panuac brei thau bruk quốc tang 3 harei, piah pahadar dom urang njauk bala.

Gilang pariak karja negar Pakistan birau tagok jien laba tal 300 tanut , yam tapa bruk caong khin di rilo urang buh jien tame ngak mbang, dalam tuk taneh ia kurang jien mbaok daok duah jalan piah Kadung jien Dunya brei peih phun jien praong nan. Laba di Gilang  pariak karja Pakistan urak ini lac 20%, glong abih kuhria meng bilan 10 thun 1996 mbiah tal ini, bruk lạm phát pandar cai urak ini glong abih kuhria dalam jaik 50 thun.

Dom urang manek hu tut angan di Nhật Bản mboh trun khang, trun bier di abih di thun 2022. Tui yaok pataom di dalam negar Nhật Bản hu 799.728 urang manek di thun 2022, lac bier di abih saong lac mbang camriep trun daok mala tanut 800.000 urang. Paka nan nyu trun jaik mateh dalam 40 thun tapa, tuk Nhật Bản hu labaih 1 trieu 5 rituh ribau urang manek di thun 1982. Ini lac bruk yaok pataom njauk haduh hatai di abih ka bruk trun manek dui atah yaok piluh thun bo kanja Nhật Bản oh salih karei hu, yaom lac hu rilo kham marat./.