Dalam dom harei dalam bian 7 sajarah ini, yaok rituh urang hu rik prein ngak bruk cach mang hadah mbaok meta hu mai Ban ine hu mbaok tame Bruk pahadar 77 thun Harei Thuong binh - Liet si 27/7. Drut drui, hadah mbaok meta ka bruk sangka di Ndang saong Karja, dom urang lambaok brei mboh bruk iek praong saong biak damen anak bruk plang lahik di Tổng Bí thư Nguyễn Phú Trọng. Urang ngak bol lin dahlau diah lac ong Nguyễn Đức Thụy, umo 80 thun, daok di tỉnh Hưng Yên hu 2 mbang hadah mbaok meta hu Ndang, Karja alin brei angan Anh hùng bol pan phao karong khan lac, ong biak pandik harao dalam hatai, damen urang abih hatung hatian di Đảng, Tổng Bí thư Nguyễn Phú Trọng.

Di tuk pahadar 77 thun harei Thương binh - Liệt sĩ saong pamaong tal salam uan pahadar 80 thun harei padang Bol bala bhap bini Việt Nam (22/12), sang iek ruak Quân y 120, Cục Hậu Cần, Quân khu 9 bahrau peih dom mbang ravang, iek ruak, brei jru saong alin hadiah 200 pok pandap ka dom urang njauk jru mek klik kruac dioxin haong dom sang sarak karja di dom tỉnh Tiền Giang, Bến Tre. Tapa nan, Sang iek ruak Quân y 120 jeng hu alin hadiah pandap brei ka dom sang njauk jru mek klik kruac, yaok pok pandap yaom 300.000 đồng, mek meng kadung jien laba di sang iek ruak saong jien daong di dom urang ngak pahla.

Tui nan, tỉnh Hậu Giang hu padang rilo kapol nao tal sang rivang, alin pandap  ka dom Amaik VNAH, Anh hùng bol pan phao karong, thuong binh, benh binh, urang hu mbaok mesruh metak njom asar jru mek kalik kruac ngak brei ruak dalam rup hu meng 81% tagok, baoh sang kathaot, baoh sang jaik kathaot hu urang ngak bruk cach mang dalam tỉnh. Di dom labik hu rivang, lambaok dom kapol  hu alin brei pandap, rivang, tadhau ayuh prein yawa khang kajap saong caong khin dom baoh sang brei patui bruk khik ramik saong patagok ilamo cach mang, brei nao dahlau ngak dahlau dom bruk jak ba.

Di labik inem mek sajarah pakat negar ban klak  Quảng Trị, Giáo hội Phật giáo Việt Nam peih bruk cầu siêu hadar dhar phor dom anh hùng liệt sĩ, hu mbaok jaik 1.000 đức chư tôn, tăng ni, phật tử saong rilo bhap bini. Bruk cầu siêu jeng likau ka taneh ia sron mbon, rahra ginup meda, pamaong tal dom siam mekre, sron mbon. Ini jeng lac tuk piah ka dom rai harei ini brei mboh ilamu siam mekre “Menyum ia hadar halau ia” di bangsa Việt Nam; lac tuk piah pato pakai rai ranaih anit ranam taneh iac, thau dhar phor dom bruk ngak, dom prein yava rik daong di dom anh hùng liệt sĩ ndih trun ka độc lập, hòa bình harei ini.

Tỉnh Đắk Nông sangka bruk pato bac, palahik bruk oh thau akhar huroh di bhap bini bangsa takik, abih di nyu nan lac dom bangsa gah Barak negar mai tagok Đắk Nông padang mbang ngui saong dom urang bangsa takik umo thun taha di labik ini. Tỉnh hu pasang iek, duah thau abih bhap bini oh ka thau akhar huroh, abih di nyu lac urang bangsa takik dalam tỉnh mai bac piah palahik bruk oh thau akhar huroh. Tapa pasang iek, dom tal bac palahik bruk oh thau akhar huroh hu bhap bini pachreih tui, nao bac, bruk pato saong bac biak siam. Urang bac hadei tuk salah danak dak tukvak 2 ( tal bac 4 -5) hu thau bac akhar di angok mbao khak, huroh di ba-ar papaok jru khik caga phun pala…

Mbang nyaom ka 46 di Ủy ban Inem krung Dunya bahrau peih tabiak di ban ine New Delhi, Ấn Độ, hu mbaok di Thủ tướng Ấn Độ Narendra Modi, Taong Yam ndok UNESCO Audrey Azoulay. Ini lac mbang camereip abih  Ấn Độ dang tabiak peih sa mbang nyaom di Ủy ban Inem krung Dunya. Di mbang nyaom ini, dom urang hu ginum biai dom đề xuất, đề cử dom labik bahrau tame angan inem krung dunya, pathau khan bruk khik ramik di 124 inem krung dunya daok hu, daong ka dunya saong bruk pandar Inem krung Dunya. Mbang nyaom hu mbaok di labaih 2.000 urang di dunya saong lambaok labaih 150 taneh ia.

Mbang peih nduac jalan pasei dunya akok meti hu pambuak dua ban ine di Lào saong Thái Lan hu mai tal ga Khamsavath di ban ine Vientiane. Ini lac sa dalam dom danak dak pambuak bruk di Lào haong Thái Lan piah jhul pakhang bruk pablei salih, buh jien tame ngak mbang, dulich, pambuak co so ha tang tui jalan pambuak bruk kinh te Đông-Tây, Bắc-Nam. Hadei di labaih 12 mon peih nduac saong ngak harak gal brei tame tabiak negar di ga Nỏng-khai (Thái Lan), 500 tuai damuai  akaok meti hu mai tal ban ine Vientiane, tame rivang iek duah thau ban ine Vientiane atau patui veik meng radaih peih drah samar Lào - Trung Quốc piah nao tal dom labik dilich danei angan di Lào.

Sruh ghe atah abih di dunya hu angan ieu lac Stampfli 24 Express hu mbaok tame bruk raok troy Olympic Paris 2024 hu mbaok di ban ine Paris, Prang dalam tuk peih mbaok Thế vận hội. Sruh ghe vah biak gheih mekre ini atah 40 mét, pajeng hu 24 menuac, rilo jang 3 mbang duk haong dom sruh ghe bhian mboh. Ghe kayua labik ngak di Thuỵ Sĩ lac Stampfli Racing Boats ngak tabiak. Dahlau di nan, ghe Stampfli 24 Express hu mbaok tame raok troy angaok kraong Marne, gah timur ban ine Paris. Thế vận hội Olympic Paris 2024 peih tabiak meng harei 26/7 - 11/8.  Thế vận hội Paralympic hu peih tabiak meng harei 28/8 - 8/9./.