Pahadar Harei baoh sang Việt Nam 28/6, Liên đoàn Lao động TP.HCM hu peih danak dak taom gaok, ndom biai nao mai “baoh sang haniem phul”. Tapa danak dak ini, Liên đoàn Lao động TP hu pok mayaom 100 baoh sang công nhân viên chức, urang ngak kham marat yam tapa kan kandah, anit ranam gauk saong klah raba ka gauk, dak padang baoh sang trei sir, hadah hadai, siam makre. Di pak ini, dom baoh sang urang ngak daok hu mbaok tame “Pakacah khan aw ngui cuk”, hu mbaok tame kadha ma-in di baoh sang, mek thaot binguk piah khik piah, tacei jalan ngak gheih, blei pandap yaom lap meng 11 gian pandap lac “Phúc lợi đoàn viên”…     

Uan harei Baoh sang Việt Nam 28-6,  tỉnh Đồng Nai peih ngak rilo bruk taom gaok, ndom biai nao mai, pathau khan pacang caga taong paoh gauk dalam sang, dak padang baoh sang siam mekre, haniem phul… Sở Ilamu brei thau saong ravang me-in tỉnh peih bruk pok meyaom baoh sang ilamu hadah krah; pato pasram ilamu pacang caga taong paoh gauk dalam sang (pasiam veik). Dom puk palei di Đồng Nai peih ngak rilo bruk yau: pakacah baoh sang naih gheih, pakacah thaot binguk gheih mekre hu ba tagok fanpage, pakacah baoh sang siam mekre, baoh sang naih gheih saong pakacah ngak mbang huak bingi.

Bier harei kabroi (26/6), kapul ngak bruk di Phó Thủ tướng Rajaei Trần Lưu Quang hu taom gaok mikva taong cap ikan saong pasang iek bruk pacang caga cap mek kaya tasik suan adat hukum, oh pathau khan saong oh tui njauk adat (IUU) di huyện Châu Thành, tỉnh Kiên Giang.  Tui Mban pato tacei jalan ka IUU tỉnh Kiên Giang, abih tih dom sruh gilai ikan hu tut angan di tỉnh Kiên Giang lac 9.515 sruh. Dom sruh gilai hu rami ramik caik pandap pasang iek jalan nao lac 3.634 meblah 98,26% gilai ikan. Di mbang taom gaok, lambaok ka mikva taong cap ikan hu  khan brei thau dom kan kandah di bruk nao taong cap ikan atah tasik dom thun jaik di ini, jang yau dom bruk haduh hatai tuk gilai ikan ngak suan adat IUU njauk negar langiu cap khik piah langyah. Phó Thủ tướng mboh lac, tỉnh Kiên Giang hu rilo kein lagaih dalam bruk kham marat pacang caga  bruk ngak suan di adat IUU; caong khin UBND tỉnh Kiên Giang saong dom gah chức năng pambuak bruk siam saong hu rilo jalan langyah piah oh caik ka gilai ikan lih tapa bhum tasik di negar langiu, kham marat taoh talaoh the kanjik di châu Âu meng ini tal puac thun 2023. 

Mbang pakacah tamat THPT thun 2023 peih tabiak meng harei 27/6 tal harei 30/6. TP.HCM hu labaih 85.000 anek saih tame pakacah di 156 labik pakacah. Sở Pato Megru ban raya jeng hu ramik 6 labik pakacah piah caga. Dalam tukvak ini, Tổng công ty Điện lực TP.HCM oh padeih atau patrun prein pabak điện tui bruk ba tabiak. Dahlau di harei pakacah 1 adit, gah điện jeng oh cakak điện, brei ka anek saih hu mbuan lagaih piah bac bài caga pakacah. Gam haong nan, Tổng công ty Điện lực TP.HCM hu panuac ieu dom labik dalam gah điện, hu mbaok luac harei melam dalam tukvak peih mbang pakacah piah samar drah pasiam dom khut khat pambuak tal điện.  

Tui Viện Khoa học Khí tượng Thủy văn saong Biến đổi khí hậu- Mintri Tài nguyên saong môi trường:  El Nino meda trak damak jang di Tây Nguyên saong Nam Bộ meng puac thun. Hajan meda kurang di rilo labik dalam taneh ia ngan haong tanut bhian mboh lac meng 25-50%. Meng nan, mbuan hu thu lagu di dom bhum yau ye Bắc Trung Bộ, Nam Trung Bộ, Tây Nguyên saong Nam Bộ. Ribuk, áp thấp nhiệt đới di tasik Biển Đông saong ngak kan kandah tal Việt Nam meda lac oh rilo, min pataom tame di kreih bilan, nan ye  nyu glaih glar jang ka cường độ saong quỹ đạo.

Ong Omi Shigeru – akaok mban cố vấn di rajaei Japon ka vi rút Corona bahrau brei thau, mbang njom mbak ka 9 meda daok tamuh tabiak di taneh ia ini saong kakei brei klauk caga pabak, jeng yau dom jalan ngak karei piah patrun patakik dom menuac metai. Akaok mban cố vấn Omi Shigeru brei thau, tui yaok pataom bahrau ini meng dom kapul y tế mboh lac dom menuac njom ruak daok tagok di dalam taneh ia. Ong Omi Shigeru ndom tal yaom glaong di bruk khik caga urang taha praong thun saong dom menuac mbuan njauk ruak trak piah patrun patakik menuac metai.

Rajaei Indonesia harei 26/6 hu payua labaih 45 tấn pandap daong pahla ka rahra  Myanmar njauk kan kandah meng ribuk nhiệt đới Mocha di Rakhine di bilan 5 meng blaoh. Taong abih tih pandap hu daong lac labaih 45 tấn, hu yaom labaih 525 ribau đôla Mỹ, dalam nan hu dom lều bạt, lều baoh sang, pandap mbang chip, pandap panda ngak hacih saat. Khan mesam, phui, jamriak dien… taphia di nan, Indonesia hu ba sa sruh gilai piah ba pandap daong di Pasak rami ramik bruk di bhum ASEAN ka bruk daong pahla di bala langik tasik (Pasak AHA) meng Subang, Malaysia tal Yangon, Myanmar.  

Cục khik ramik pandap mbang menyum saong jru tavao Thái Lan (FDA) harei 26/6 brei am cuh klaak dom ma túy yaom 600 triệu USD. Dom ma túy am cuh klaak nan, hu 27 tấn amphetamine, 5 tấn cathinone, jaik 320 kg heroin, cocaine … hu cap mek dalam 192 vụ án. FDA khan lac dom pandap nan hu am cuh tui tacei pato di Jabat khik caga alam môi trường Mỹ (EPA) piah khik kajap bruk oh hu jru mek atau janih jhak halei tathuak tabiak alam môi trường.  Thái Lan lac sa pasak pajeng ba praong di kol tội phạm ma túy rah tui labik kraong Mekong.