Harei ini 3/11, Phó Thủ tướng Thường trực Phạm Bình Minh hu mbaok di var peih pakak padang ngak sang mac ngak tabiak pandap ma-in ka uranaih di Kapol nyaom Lego di Khu công nghiệp VSIP III, ban sit Tân Uyên, Bình Dương. Danak dak sang mac Lego ngan hoang yaom jien labaih 1 tỉ USD hu taong yaom lac sa dalam dom danak dak hu phun jien negar langiu praong abih tame Bình Dương. Danak dak meda padang ngak dalam 2 thun saong kuhria ba tame pandar meng thun 2024.

Peih ngak danak dak bruk ngak bangsa tukvak 2021-2030, pamaong tal thun 2045, tỉnh Kiên Giang brei ngak dahlau di abih bruk cak rok patagok taong abih gauk, khang kajap bhum mikva bangsa takik, trun manieng dom xã, puk palei biak kan kandah, ngak pasiam raidiuk saong paglaong mbang ngui di mikva bangsa. Tui jalan ba tabiak tal thun 2025, trun dom sang kan kathaot dalam bhum mikva bangsa takik tui kuhria lac 0,4% sa thun tui tanut chuan di negar tukvak 2021-2025; tal thun 2030 trun daok mala  2%.

UB bhap bini tỉnh Đồng Nai birau ba tabiak Jalan peih ngak Danak dak pakat negar patrun kan kathaot  khang kajap vaktu 2022 - 2025 saong dom sarak daong brei ka urang kathaot, abih di nyu lac baoh sang urang bnagsa takik kan kathaot pambuak saong dom danak dak  patrun kathaot khang kajap. Dalam nan, Danak dak pamaong tal trun 80% baoh sang kathaot dalam taong abih baoh sang kathaot vaktu 2022 -2025. Piah peih ngak hu bruk nan, tỉnh caik tabiak abih tih phun jien labaih 77,5 tỷ đồng. Ini lac  daong prein piah ka bhap bini yam tagok padang raidiuk, pamaong tal patruh kathaot dalam tukvak ini.

Di mbang ndem biai nao mai haong urang par akaok tỉnh Cà Mau rilo urang dalam kapul, urang nong hu ba tabiak bruk palei daok kurang uurang ngak. Dalam tuk nan, kapul urang ngak di puk palei hu nao ngak bruk di dom labik ngak kong praong langiu tỉnh, ba tal bruk kurang urang ngak di puk palei, ngak kan kandah ka bruk ngak, abih di nyu nan lac bruk cap mek kaya ikan di pak ini. Urang lambaok di Sở Lao động thương binh saong Xã hội tỉnh Cà Mau brei thau, bruk urang ngak di puk palei mai ngak bruk di dom labik ngak kong lac jalan njauk ngak dalam tukvak urak ini. Pamaong tal dom siam lagaih, ye bruk ini meda daong lang yah bruk ngak, paglaong jien mek tame ka urang ngak.

UB bhap bini tỉnh Đồng Tháp birau hu mbang ginum biai  tapa harak pathau khan ka danak dak padang ngak jalan peih drah samar Cao Lãnh - An Hữu vaktu ka 1. Tui danak dak nan kuhria abih tih jalan atah labaih 27,43 km. Akok jalan tapa jalan peih drah samar Mỹ An – Cao Lãnh, di huyện Cao Lãnh; puac jalan tapa jalan tỉnh ĐT850. Jalan peih praong 4 lan radaih, hu jalan brei radaih padeih chip oh peih gam gam. Di var ginum biai ralo urang sahaneng lac  njauk brei pambuak jalan peih drah samar tame ban Cao Lãnh.

Tui yaok pataom kayua Trung Quốc ba tabiak, 10 bilan akaok thun ini, labaih 20 sruh radaih pui hu peih nduac tapa jalan tapen negar Việt - Trung ngan haong dom pandap panda hu pajeng tagok khang, lac labaih 178%. Jalan ngak “jalan pasei samar drah’ urak ini hu jabat jalan pasei Quảng Tây peih ngak ngan haong bruk pambuak di dua gah nduac luac bhum, tukvak nduac di dom sruh radaih pui nduac tapa dua taneh ia meng Nam Ninh tal Hà Nội hu salah dalam harei. Urak ini pandap panda pajeng di dom sruh radaih pui nduac tapa dua taneh ia Việt Nam saong Trung Quốc, tapa Quảng Tây hu labaih 240 janih, yau ye pandap panda điện tử, jru Đông Y Trung Quốc, njam patam baoh karuac, jamraik.

Rajaei Hàn Quốc hu khan brei thau bruk bayar jien ka urang negar langiu metai dalam bala juah kateik  gauk di Itaewon. Dalam nan yaok urang negar langiu  metai hu bayar jien 20 trieu won (14.000 USD) gam haong jien  ngak ndam metai 15 trieu won (10.500 USD). Gauk gar urang njauk bala tame negar Hàn Quốc hu daong 70.000 won (50 USD) sa harei. Hu 26 urang negar langiu  mai meng 14 taneh ia metai dalam bala nan.

Cảnh sát Nigeria brei thau lac, sa kapul tội phạm hu phao  cap khik 39 uranaih daok yuak padai di trang trai daok di gah Pai negar ini saong ndok jien laoh. Urak ini gah cảnh sát daok peih bruk cap mek kol pan phao nan, saong daong dom urang njauk cap khik. Di gah barak saong gah kreih negar ini, dom kol tội phạm bhian peih dombruk taong tame saong blah mek pandap di dom palei, pametai rahra atau cap khik bhap bini piah mek jien buh tabiak./.

Urang lang: Thu Thảo & Bhumi