Anak bruk pablei salih, pajeng ba suan hukum pabui tame Viet Nam, abih di nyu lac meng Campuchia rah tabiak dalam sraw kadau, patagok bruk njom mbak praong dom janih ruak trak, Thủ tướng Phạm Minh Chính hu payua harak kong điện ieu kakei dom mentri, gah, bhum palei pakhang bruk pasang iek, tui iek, abih di nyu lac di dom pabah mbang negar,  jalan sit, peih jalan nao tapen negar, pabah lam nge tasik, jalan kraong…piah pacang caga, duah mboh saong langyah dom urang pablei salih, pajeng ba suan hukum pabui tame negar Viet Nam. Meyah mboh pabui ba tame suan hukum  brei bayar veik atau am cuh klak, tui nan brei langyah catang dom kapol, nyaom urang ngak suan hukum.

Tỉnh Long An daok kham marat patagok manuac ngak, pasiam bruk ngak harak gar hành chính saong hạ tầng dịch vụ piah ieu  ta-a urang buh jien tame ngak mbang, abih di nyu nan lac ngan haong dom doanh nghiep mai meng Nhật Bản. 6 bilan akaok thun, tỉnh Long An hu pabak harak tut angan buh jien tame ka 39 danak dak FDI. Min dalam abih tih 10 tỷ USD, phun jien meng dom doanh nghiệp Nhật Bản bahrau meblah labaih 10%. Urang lambaok di Kapul doanh nghiệp Nhật Bản brei thau, Long An lac bhum palei hu rilo kein lagaih dui pachreih urang buh jien tame tuk dom taneh brei ka bruk ngak mbang, pala drak daok rilo;  adat mbuan lagaih. Ini jeng lac labik hu gah buh jien tame di Nhật Bản dang akaok di dalam bhum ĐBSCL.

Meng harei ini tal harei 8/8, 108 sang bac THPT di karja Ban raya HCM brei taduan hồ sơ palih ruah pabak veik tame tal bac 10. Ini lac mbang akok metai, Ban raya HCM peih bruk palih ruah pabak anek saih tame tal bac 10. Dom anek saih hu palih ruah pabak lac hu pakacah tame tal bac 10, oh gam tame kalau sang bac hu palih ruah tame sang bac THPT karja. Langiu di nan, anek saih brei palih ruah sa dalam dom sang bac palih ruah pabak saong oh brei salih veik tui hatai caong khin. Kuhria tal 17 tuk harei 1/8, TPHCM hu labaih 72.000 anek saih tame bac, daok 3.891 anek saih oh ka ngak ho so tame bac, sang bac kurang ralo abih lac 260 anek saih.  

# UBND tỉnh Ninh Thuận brei klaak dom harak khan brei thau ka bruk mek taneh piah ngak 2 danak dak điện hạt nhân di dalam huyện Ninh Hải saong huyện Thuận Nam. Hadei di 10 thun haduh hatai daok dalam bhum “quy hoạch tuan", rahra di pak ini daok kuhria tal bruk quy hoạch, padang ngak, gam tui di nan jeng caong khin kanja hu jalan ngak, sarak daong rahra samar drah tani tanat raidiuk. Ong Nguyễn Khắc Hòa, Phó akaok UBND huyện Ninh Hải brei thau lac, di pak ini jeng hu 12 danak dak hu brei tapa, min tuk peih ngak jeng tavak tame bruk quy hoạch danak dak điện hạt nhân.

UBND tỉnh Bến Tre birau peih bruk padang ngak Khu CN Phú Thuận.  Danak dak ini kuhria abih tih jien buh tame ngak 3.539 tỷ đồng, taneh praong 231,7ha tại huyện Bình Đại. Brei panuac  di var peih ngak, Akok UBND tỉnh Bến Tre Trần Ngọc Tam brei thau, tuk ba tame ngak bruk, danak dak brei langyah bruk pablei pandap tabiak  hu tani tanat di bhum palei, brei mek jien tame kadung jien karja, abih di nyu njauk ndem tal lac bruk patagok bruk ngak palei pala, ba bruk ngak ka rilo urang ngak di bhum palei.

Takik di nyu 1 urang metai saong 13 urang njauk rambuac hadei di tuk sa urang likei peih radaih ginuh tagok takai jalan saong hadei di nan mek to klauk tame rilo urang. Bruk ini rahtabiak di harei 3/8 di ban sit Seongnam jaik ban ine Seoul  di Hàn Quốc. Urang ngak bruk nan, umo labaih 20 thun, njauk cap khik hadei di nan saong daok hu sua tangi. Hu thau, urang ini ngak bruk dalam gah jao pandap. Abih tih 4 urang njauk rambuac kayua njauk radaih ginuh saong 9 urang njauk rambuac kayua njauk to klauk. Dom urang njauk rambuac hu ba tame sang iek ruak piah taong ruak. Bruk ginuh radaih rahtabiak ka oh bak sa bilan hadei di sa bruk urang likai, mek to klauk di labik jaik ga radaih pui điện  ngak ka 1 urang metai dahlau di tuk klauk tame 3 urang karei jaik di labik rahtabiak bala.

Tui khaw tin di Truyen thong  Philippines, sa sruh kapal gilai pajeng labaih 70 urang kram langiu tasik tỉnh Quezon, gah meraong pulao Luzon. Urak ini, oh kathau  hu hadom urang metai lahik kayua bala ini. Gah khik caga tapen tasik Philippines brei thau hu bala nan, min oh ka khan brei cambaic laic. Bruk duah  saong daong hu peih ngak chip. Adit dahlau, sa kapal gilai pajeng tuai  kableih di danao Laguna de Bay di tasik tỉnh Rizal, gah Timun, ban ine Manila, ngak 27 urang metai. Tuk bala rah tabiak, gilai pajeng jaik 70 urang njauk prein di nyu pajeng ralo ye 42 urang. Dom mbang gilac kram  bhian rah tabiak di labik ini, ralo kayua hajan ribuk, gilai takik brei pasiam, pajeng ba tapa prein.

 Nga meda trun labaih 300.000 thung menyek pablei tabiak negar langiu yaok harei dalam bilan 9 anak tal. Bruk trun manjek pablei tabiak negar langiu daok dalam bruk kham marat ngak samu veik darak pasa dầu mỏ. dahlau di nan, Nga hu sanya trun dom manjek ngak tabiak labaih 500.000 thun sa harei, samu 5% dom manjek ngak tabiak di negar ini. Sa urang jakar ngak praong di Saudi Arabia jeng brei thau taneh ia ini jeng meda daok cakak dom menyek ngak tabiak trun 1 triệu thung sa harei dalam 1 bilan tra, tal abih bilan 9. Saudi Arabia saong Nga lac dua taneh ia pablei menyek tabiak negar langiu dang akaok di dunya. Yaom manjek  tagok biak rilo hadei di tuk dua taneh ia ini  khan lac cakak trun manjek ngak tabiak meng akaok bilan 7./.