Di var ginum biai di Thuong truc Rajaei ka pasak jien padai dunya di TPHCM saong Da Nang birau ini, Thu tuong Phạm Minh Chính jao Pho Thu tuong Nguyễn Hòa Bình peih nyaom biai piah duah thau bruk sahaneng hatai caong; langyah tani tanat bruk “ sa pasak, dua labik”,  brei palih ruah TPHCM dahlau, hadei di nan peih ngak di Da Nang. Thu tuong caong khin, hu jalan ngak karei, brei ngak bruk haong dom po buh jien tame ngak di Trung Đông, Trung Quốc, dom taneh ia ASEAN, dom po buh jien tame ngak mbang di Hoa Kỳ, chau Au; dom sarak ngak brei patagok glong, khang samar.

UBND TPHCM birau ba tabiak bruk duah thau hatai caong takre di rahra bhap bini ka du thao Sarak ramik pasiam, pabak dom asar kadha tame Hukum negar CHXHCN Viet Nam thun 2013 di Ban raya, daok iew lac Hukum negar 2013. Bruk duah thau hatai caong takre di bhap bini piah patagok bruk ngak po di bhap bini, jak ba hu rilo akaok sahaneng hadah krah, abih hatai kham merat saong rilo gauk njauk hatai pachreih tui di taong abih bhap bini ka bruk ramik pasiam, pabak veik asar kadha di Hukum negar thun 2013, piah Hukum negar hu njauk tui hatai caong takre di bhap bini rahra.

Hadei tuk baoh durian laik yaom, yaom baoh panat di tinh Tiền Giang jeng trun tui. Urak ini po bein di huyen Cai Lậy  pablei panat janih 1 labaih 10.000 dong sa kilo, janih 2-3 yaom dua klau ribau dong sa kilo. Ta-eng panat pasiu bhong meriak  yaom jiak 20 ribau dong sa kilo, trun jaik 10 ribau dong sa kilo dut saong tukvak ini thun dahlau. Yaom pablei yau nan, urang pala panat oh hu laba, gaok mai lahik kayua baoh panat takik praong, pasiu sit. Panat trun yaom tuk ralo bein paik baoh praong;  dalam tuk darak pasar pablei tabiak negar langiu suai damuai.

Hadei tukvak trun yaom suai lavik, urak ini yaom baoh kruac bung kalik hijao di tinh Ben Tre tagok veik, po bein bui hatai kayua duah hu jien tame jeng yau hu laba labaih jien buh tame sangka iek phun pala, piah brei rilo baoh praong dalam bilan kruac bung hadei. Urak ini, kruac bung janih ka 1, praong trak 1,2 -1,8 kilo sa baoh, piah pablei tabiak negar langiu hu yaom meng 41.000 -  42.000 đồng sa kilo. Taneh pala kruac bung kalik hijao di tinh Ben Tre urak ini hu labaih 7.200 hecta. Karuac bung kalik hijao di Ben Tre brei baoh praong siam, luac thun.

Kong ty Than den Thien Loc daok panduan ba baoh sang glong 3 tal trak 1.000 tan di phuong Binh Thang, Ban Dĩ An, tỉnh Bình Dương lih kadun trun 40m dut saong labik camereip piah caik veik taneh ngak jalan Vành đai 3 TPHCM tapa Binh Duong. Hadei sa bilan peih, sang padang glong tagok 1 met 7 dut saong tuk camereip. Tui kuhria mboh dahlau labaih 15 harei anak tal, sang glong ini hu panduan ba tame labik birau, jao abih taneh peih ngak jalan Vành đai 3.

Dom urang jakar My saong Trung Quoc hu taom gaok gauk pak Thuy Si piah gunum biai dom bruk pablei salih di dua negar. Dua taneh ia ini hu tabiak harak dalam nan njauk gauk ka bruk trun jien je ka ndap nda di dua gah dalam 90 harei. My brei trun jien je  ngan haong ndap nda Trung Quoc meng 145% trun daok 30%. Dalam tuk nan Trung Quoc brei trun jien je ngan haong ndap My meng 125% trun daok 10%.

Dalam sarak pathau khan, urang jakar ngak praong dom taneh ia Bac Au – Baltic brei thau meda patui daong Ukraine di jalan pamong tal bruk salamat saong padeih bruk methuh gauk dui atah labaih 3 thun tapa. Dom taneh ia Bac Âu – Baltic iew Nga brei padeih abih patuh phao gam oh ndok hagit dalam 30 harei, hu dom urang ngak praong di Pháp, Đức, Ba Lan, Anh saong Ukraine njauk hatai dahlau, piah peih tabiak jalan ginum biai ba siam salamat sron mbon.

Melam 12 bilan 5 tui tukvak Viet Nam, rilo radaih dien peih ala taneh di London brei padeih kayua lahik dien, ngak biak kan kandah ka dom radaih cong cong di ban ine negar Anh. Yaom lac dui atah dalam dom minit min, bruk nan ba tal rilo radaih khat lahik trak, dalam nan hu dom jalan rilo radaih abih di ban ine London. Urak ini, bruk nan oh ka ngak brei cambaic laic./.