Sang bac Đại học Khoa học Xã hội saong Nhân văn  - Đại học Quốc gia TP.HCM saong Pasak pakat negar ka ilamo nghệ thuật Indira Gandhi (di Mintri Ilamo Ấn Độ) bahrau mbaoh tangin tame harak pahadar pambuak gauk piah jhul tagok bruk roh duah học thuật saong pambuak gauk dalam bruk khik ramik dom harak gar Cam hu asar meng Ấn Độ daok hu khik piah dalam dom baoh sang Cam. Dalam nan, pasak pakat negar ka ilamo nghệ thuật Indira Gandhi meda taduan bruk ieu pataom sa kapul peih bruk pasang iek, khik ramik, padang tư liệu saong số hóa harakl gar bản thảo Cam; gam tui di nan jeng daong padang bilik ngak iek piah số hóa bản thảo saong pabak pandap panda số hóa.

Mintri Y tế bahrau hu harak ieu dom tỉnh, ban di Trung ương tacei pato brei patagok parilo bruk klauk vaccine pacang Covid-19. Mintri Y tế ndom lac, labik halei oh taduan mek ginup vaccine piah klauk mbang ka 3, mbang ka 4 ka urang umo meng 18 thun tagok, ka uranaih umo meng 5 tal mala 12 thun saong oh duah thau ginup dom menuac njauk klauk jru, meyah caik rah tabiak jit di labik di drei, ye labik nan njauk taduan trách nhiệm anak Rajaei.

UBND TP Hồ Chí Minh bahrau brei parabha chỉ tiêu bruk tín dụng dom danak dak brei masraiy laba bier tui Sarak 11/2022 di Rajaei ngan haong paok jien lac 15 tỷ 7 rituh trieu đồng. paok jien ini meda hu parabha mai ka dom quận huyện saong ban Thủ Đức piah langyah ka bhap bini daok blei atau pah sang daok xã hội, padang ngak sang bahrau, ngak pasiam veik sang daok. Dahlau di nan, Gilang paraik Kanja dhar TP Hồ Chí Minh jeng hu harak payua ka Gilang pariak sarak kanja TP Hồ Chí Minh peih dom sarak brei masraiy laba bier saong daong jien laba lac 2% brei masraiy piah blei sang daok xã hội, sang daok ka urang ngak di ban raya HCM.

Bahrau ini, huyện đoàn Tân Phú Đông, tỉnh An Giang hu jak ba kapul ngak pahala ban raya Hồ Chí Minh alin hadiah 200 pok pandap brei ka dom anek saih sang kan kandah daok bac di sang bac tiểu học saong THCS Phú Tân, tỉnh An Giang, yaok pok yaom 250 rabau đồng. Kapul ngak pahala jeng hu brei 5 pok pandap ka sang kan kathaot daok di xã Phú Tân, yaok pok yaom 1 triệu 300 rabau, dalam nan hu 5 mbao brah saong dom janih pandap mbang karei karei.

Urak ini hu rilo jalan di tỉnh Tiền Giang khut, mbaih biak trak ngak kan kandah ka bruk nao mai, pajeng ba. Trak di abih lac labik jaik tatua An Cư, di puk An Thiện, xã An Cư, (huyện Cái Bè) hu rilo ổ gà, ổ voi ba tal rilo bala jalan mbak. Rilo jalan liên tỉnh, liên huyện jeng daok khut, mbaih mbaoh, hu rilo ổ gà, min suai hu ngak pasiam,  ngak kan kandah ka manuac nao mai saong radaih nduac.

Dalam harei 25/5 Triều Tiên hu gac 105.500 urang njom virus SARS-CoV-2, tui nan dom menuac njaom pandiak di taneh ia ini tagok labaih 3 triệu urang. Harei kabroi jeng lac harei ka 5 gam gam, dom menuac njaom ruak daok trun meneing di taneh ia ini. Blah báo Rodong Sinmun, jabat ndom puac di Đảng Lao động Triều Tiên brei thau, jit ruak di taneh ia ini hu pasang iek dalam tukvak anak tal. Gam haong nan, hu panuac kakei bhap bini sangka pacang caga jit. Kuhria meng tuk tamuh jit di harei 12/5 tal harei ini, Triều Tiên hu abih tih labaih 3 triệu urang ruak, saong hu 68 urang metai.

Kapul khik caga takai tasik Tunisia brei thau, 76 urang lahik hadei di tuk sa sruh gilai karam di tasik gah timur taneh ini. Dalam tukvak tapa, dom urang duah jalan tame châu Âu meng Tunisia suan hukum dak harei dak tagok rilo. Di adit blaoh, kapul khik caga takai tasik Tunisia daong hu ka 44 urang pliah di metai saong sraong tagok hu 3 rup tau, dalam tuk 10 urang jeng daok lahik hadei di tuk gilai di dom urang nan karam di langiu tasik.

Ruak đậu mùa khỉ hu mboh di 16 taneh ia mangaok dunya, rilo meng lac di châu Âu saong Bắc Mỹ. WHO saong dom chuyên gia y tế kakei lac, meyah mboh kalik hu dom baoh ia sit bhong meriak, njauk nao tal bác sĩ atau bilai y tế jaik di abih, piah samar hu dut iek saong duah thau bruk taom gaok, jalan njaom mbak. Tui dom chuyên gia y tế, virus đậu mùa khỉ bhian njaom mbak tapa taom gaok rup haong rup suai lavik di menuac haong menuac atau haong athur njauk ruak. Rao tangin gam gam, khik hacih hacih saong likei kumei ndih daok haong gauk siam mekre salamat lac dom jalan ngak siam di abih piah pacang cakak ruak njaom mbak./.

Urang lang: M.P & Thu Thao – 26/5/2022