Page harei 8/12, Thủ tướng Rajaei Phạm Minh Chính hu mbaok peih Parang iek Quốc phòng dunya Viet Nam 2022 ( daok iew lac Viet Nam Defence 2022). Parang iek kayua Mentri Quoc phong peih ngak meng harei 08 -10/12/2022 di Mblang kapal haok Gia Lâm, Hà Nội. Thủ tướng ndem cambaic laic, Parang iek Quoc phong dunya Viet Nam 2022 lac jalan lagaih piah ka dom urang ilamu ba tabiak sarak quoc phong, dom D.N quốc phòng, an ninh taom gaok, ndem biai nao mai, patagok, pambuak bruk pamong tal dunya sron mbon, pambuak bruk saong patagok khang kajap.

Mbang camriep bruk patagok kinh tế di Hậu Giang tui kuhria lac dang akaok Bhum taneran kraong Cửu Long saong dang ka 4 dalam taneh ia; jeng lac tanut tagok glaong abih meng di tuk padang tỉnh tal urak ini. Bruk ini bahrau hu pathau khan di mbang nyaom ka 13 di HĐ bhap bini tỉnh Hậu Giang mbang X, tukvak 2021-2026. Bruk njauk biai nan lac patagok kinh tế di Hậu Giang daok lac labik hadah, glaong abih meng dahlau mai, mek hu 13,94%, dang akaok bhum ĐBSCL saong yam tagok ka 4 di dalam taneh ia, tagok labaih 30 tanut dut saong thun 2021.

Yaok thun, tal tuk ia bulan bak baoh bilan mat nan lac tuk bhap bini bangsa Xtiêng di tỉnh Bình Phước peih ngak Adat uan padai birau, thau dhar phol dom po yang, po langik po tasik chraong daong brei ka mikva hu bilan yaok kuak hu rilo, hangin siam hajan lagaih…Ini jeng lac Tet di urang bangsa Xtieng. Di var peih ngak adat, bhap bini bangsa Xtieng meda hu ndem biai nao mai ka bruk ngak mbang haong gauk hadei sa thun ngak bruk glaih glar. Dom dam dara hu ma-in, daoh tamia, menyum tapai saong huak lisei padai birau…Tui sahaneng di bhap bini Xtieng , bruk peih ngak adat nan oh lac daong urang chreih chrai ngak mbamng, bo daok rik tame khik ramik saong patagok ilamu meng kan di bangsa Viet Nam.

Dah page ini (8/12), Toà án bhap bini tỉnh Đồng Nai kaoh duas 74 bị cáo dalam jalan pablei salih lậu, duah jalan pablei 200 triệu lít xăng. Toà án bhap bini tỉnh Đồng Nai tabiak panuac phat dom bị cáo par akaok jalan ini lac Đào Ngọc Viễn (umo 54 thun, daok di TP.HCM) 17 thun guk, phat pabak tame 100 triệu đồng. Hội đồng langyah jeng brei khik ramik dom jalan pacang cakak, kareih abih dom drap ar di dom bị cáo piah khik kajap bruk ngak njauk tui hukum; dom drap ar, radaih – pandap panda pandar ka bruk pablei salih lậu nan jeng njauk pataom mek piah ba tame drap ar di kanja.

Công ty Cổ phần pajeng ba Jalan pasei Sài Gòn brei thau, urak ini daok hu 57.000 vé radaih pui tuk Tết thun nasak Tapai 2023. Cmabaih laih lac, tukvak dahlau Tết ( meng TPHCM nao Ha Noi) daok labaih 13.000 ghe. Dalam nan, vé nao Phan Thiết, Nha Trang daok ve yaok harei; vé Quảng Ngãi dom harei dahlau 15/1 daok ralo, dom harei meng harei 15/1 tal harei 18/1 daok vé ghe phụ. Tukvak hadei Tết meng Ha Noi nao TPHCM daok labaih 44.000 ghe, ralo vé meng harei 22/1 tal harei 26/1.

 Philipin harei kabroi brei thau lac dom mbang ginum biai ka Paok adat bruk ngak di tasik Biển Đông (COC) daok hu peih ngak veik saong ASEAN kham marat ngak salah COC samar di abih. Urak ini ASEAN saong Trung Quốc hu ngak salah mbang pasang iek ka 1 saong daok peih bruk pasang iek ka 2 harak gar ginum biai sarak Paok adat bruk ngak di tasik Biển Đông (COC). Urang jakar ngak praong di Philipin jeng brei thau lac meda hu rilo mbang ginum biai tapak jang di thun hadei meda jhul samar bruk ginum biai.

Tui yaok kuhria, dalam 9 bilan akaok thun 2022, hu jaik 645.000 mbang tuai negar langiu mai Lào, sumu 71,64 % bruk ba tabiak dalam thun ini. Tapa nan hu mboh bruk ngak mbang hu patagok di gah dulich saong lac bruk bui sambai ka gah kinh te Lào. Mentri Thông tin, Văn hóa saong Du lịch Lào brei thau tuai damuai mai meng Thái Lan, Trung Quốc saong Hàn Quốc dang akok angan tuai mai Lào. Dalam nan, urang negar Lào peih dom mbang dulich dalam negar jeng tagok, labaih 1 trieu urang, sumu 97% dut saong bruk ba tabiak.

Peru bahrau hu urang kumei Tổng thống camriep abih kuhria meng kan mai tuk amuk Boluarte tuyên thệ tagok pan bruk, sa harei hadei di tuk Tổng thống dahlau deih ong Pedro Castillo njauk brei padeih ngak saong njauk cap kareik dalam mbang kaoh duas di Quốc hội. Tổng thống Pedro dahlau deih njauk cap mek ngan haong duas kham marat yah klaak jabat lập pháp saong eng drei khik quyen pasang iek rajaei, ngak tabiak sa mbang sarau kadhau hukum negar biak trak damak di taneh ia Nam Mỹ.