Page ini (15/12), di Pasak Nyaom biai pakat negar pak Ha Noi peih ngak Nyaom roya Kapul Dam dara CSHCM pakat negar mbang 12, vaktu 2022-2027 dalam praong prang hu mbaok di 980 urang lambaok  ka labaih 22 trieu urang jakar, urang đoàn, dam dara Viet Nam dalam saong langiu negar. Ngan haong kadha “ Caong khin - Jum pataom - Khang hatai - nao dahlau - Hadah krah”, Nyaom roya brei mboh bruk kham merat gah chính trị di dam dara Viet Nam dalam tukvak birau caong khin yam tagok, ba abih prein yawa yam tapa dom kan kandah, ngak brei khang kajap taduan bruk hu makna praong dalam bruk dak padang saong khik caga taneh ia Viet Nam XHCN.  

Tỉnh Kiên Giang bahrau peih bruk padang ngak jalan radaih tapen tasik Hòn Đất - Kiên Lương, haong yaom jien buh tame jaik 1.480 tỷ đồng meng kadung jien karja pakat negar. Jalan atah 40km, dalam nan padang ngak bahrau 34 tatua meng bê tông cốt thép, radaih pajeng trak du halei jeng nao tapa hu; gam haong gom truac hadah, jalan tathuak ia, salamat jalan mbak... Jalan ini tuk ngak salah bloh lac jalan nao mai, pajeng ba praong, khik kajap bruk nao mai tapen tasik gah pai di tỉnh Kiên Giang.

Thun ini, BHXH tỉnh Trà Vinh hu iew da-a, jak ba bhap bini rik daong tame  hu labaih 930 trieu dong piah alin brei số BHXH, harak BHYT ka urang hu raidiuk kan kandah dalam tỉnh. Tapa danak dak piah daong ka mikva hu pabak prein kham merat yam tapa kan kandah, patagok dalam raidiuk, pamaong tal pambak praong BHXH, BHYT dalam abih bhap bini.

Piah daong prein ka urang ngak dalam tuk tết Nguyên đán 2023, dom pakat công đoàn di tỉnh Bà Rịa – Vũng Tàu meda buh tabiak 41 tỷ đồng daong jien mbang Tết ka 1.000 urang ngak gaok kan kandah, yaok pok yaom 1 triệu đồng. Công đoàn jeng hu daong 150 harak radaih ka urang ngak 3 thun oh ka hu nao palei mbang Tết,  tadhau ayuh Tết  urang ngak gah puh ramik dalam ban, urang ngak di dom labik iek ruak, caga cấp cứu… dalam melam giao thừa, yaok pok yaom 300.000 đồng. Langiu di nan, tỉnh daok hu peih  danak dak “Tết jum pataom – Xuân pambuak gauk” thun 2023 haong 58 “labik pablei pandap 0 đồng”, pablei pandap trun yaom, mbang menyum oh abih jien ka urang ngak.

Meng hatai caong lac dom bilan puac thun darak pasar tuai dulich meda tagok gilac, dom D.N, labik ngak dulich di Binh Thuan hu caga blaoh blai tani tanat meng pandap panda, labik daok, piah ba tame duh ka tuai mai rivang main. Dalam nan, hu bruk ngak birau rilo pandap dilich, padang ngak veik rilo pandap biak mekre oh labik halei hu, birau veik pachreih tuai mai rivang ma-in. Langiu bruk pachreih yaih khan thaot binguk labik rivang ma-in, dom D.N daok caik hatai bruk patagok pasiam dich vụ, buh jien tame ngak cơ sở pandap pandar duh ka tuai damuai, yau bruk peih Nyaom dara Dulich online, pambuak website du lịch Bình Thuận (Việt - Anh) haong dom website dulich dalam taneh ia…

Hội đồng an ninh negar Mỹ ndom lac halan hatian daong ka Trung Quốc pacang bruk patagok dom urang njom COVID-19 meyah taduan hu panuac ieu daong. Tập đoàn China Meheco khan lac hu mbaoh tangin tame harak sanya haong Cty Pfizer di Mỹ piah blei saong parabha jru COVID-19 meng jalan menyum lac Paxlovid di Trung Quốc hadei di tuk taneh ia ini brei pacadu sarak "zero COVID". Di bilan 8, Pfizer hu mbaoh tangin sanya brei adat ka Cty jru tavao Huahai Chiết Giang ngak Paxlovid brei ka urang ruak daok di taneh ia Trung Quốc.

Harak pathau khan di Mentri Phúc lợi Hàn Quốc brei mboh dalam thun 2021, taneh ini hu labaih 3.300 urang metai ta-eng saong tok hu thau sa tukvak hadei di nan. Hu rilo makna ba tal bruk nan hu rilo, dalam nan hu bruk kinh te, daok atah di manuac sia, gauk gar saong patagok dom baoh sang daok ta-eng. Langiu di nan, dom sang daok sa drei tagok 7,9%, tui nan abih tih sang urang daok sa drei di Hàn Quốc tagok 33,4% dalam taong abih baoh sang di taneh ia ini.

Quốc hội New Zealand bahrau brei tapa hukum bahrau piah patrun patakik bruk njuk pakao. Hukum bahrau ini, pakauk oh brei pablei pakao njuk ka dom urang umo mala 14 thun, haong yaom jien tagok tal  150 ribau đôla New Zealand (lac jaik 96 rabau USD). Hukum ini jeng brei trun meneing nicotin hu brei adat dalam dom janih pakao njuk saong cakak trun 90% dom labik pablei rai hu adat brei pablei pakao njuk. Tal puac thun 2023, dom labik pablei rai hu adat pablei pakao njuk di New Zealand hu cakak trun, meng 6.000 yau urak ini trun daok 600./.