Pahadar 76 thun Harei Thương binh - Liệt sĩ (27/7/1947-27/7/2023), page ini (19/7), Akok negar Võ Văn Thưởng ba akok kapol urang di Đảng saong  Karja mai pok bingu, cuh gilau hadar tal dom AHLS, urang lin CM, bhap bini anit taneh ia di labik kubo Hàng Dương, huyện Côn Đảo. Hatung hatian praong uranam saong thau dhar phol tal dom anh hùng, urang lin CM, bhap bini  anit taneh ia var klak rup drei ndih trun ka taneh ia di Côn Đảo,  Akok negar Võ Văn Thưởng saong kapol urang jakar hu pok bingu kakuh kubo di  Tổng Bí thư Lê Hồng Phong, urang anit taneh ia Nguyễn An Ninh, Anh hùng liệt sĩ Võ Thị Sáu.., pahadar dom urang anek gheih ghang di bangsa  var klak rup ka Taneh ia. Hadei di nan, Akok negar hu mbaok ngak Pathi dom urang lin CM saong bhap bini anit taneh ia var klak rup  di Côn Đảo, cuh gilau anak blah patau vak angan 2.284 liệt sĩ pak Labik kakuh di Côn Đảo.

Pasak tim mạch di sang iek ruak Nhi Đồng 1 (TP.HCM) hu jeng Pasak tim mạch biak gheih camereip abih di Việt Nam. PGS-TS-BS Nguyễn Thanh Hùng, Yam ndok Sang iek ruak Nhi Đồng 1  brei thau, 15 thun tapa, sang iek ruak Nhi Đồng 1 hu ngak labaih 5.100 mbang blac raih tim hở saong labaih 7.100 mbang thông tim, daong plaih di metai hu ka labaih 98%. Tim mạch lac sa dalam dom gah cakrok mboh di anak meta saong hu siam lagaih di abih dalam 20 thun jaik ini, daong patrun bruk metai lahik meng 4,9% daok 0,4% di thun 2021.

Kapol urang njom jru mek kalik kruac Ban Cần Thơ birau peih bruk “Bilan ngak ka urang njom jru mek kalik kruac thun 2023”.   Cần Thơ urak ini hu 4.471 urang njom jru mek kalik kruac dioxin. Meng thun 2017 -2022 ngan haong phun jien jak ba labaih 48 tỷ 570 trieu dong daong padang ngak sang birau saong pasiam veik 231 baoh sang, alin hadiah 1.153 paok jien bac, daong ka labaih 1.310 labik bhong meriak, daong phun jien oh mek laba ka 228 mbang baoh sang. Tapa dom danak dak hu daong ka yaol rituh baoh sang hu tani tanat raidiuk. Rilo urang ruak naih joi kham yam tapa kan kandah, ngak hu siam ralo bruk jak ba dak padang KT -XH di bhum palei.  

Hadei di 4 thun oh peih ngak kayua jit ruak Covid-19, Festival hadang Cà Mau thun 2023 tui kuhria hu peih tabiak ngak di bilan 12 tal. Festival hadang Cà Mau hu peih ngak haong rilo bruk ngak, rilo asal kadha, chreih chrai ka jalan ngak, brei mboh dom yaom glaong biak karei ka raidiuk, ilamu di urang bhum Tây Nam Bộ saong bhum taneh Cà Mau; yaih khan prein khang piah jhul patagok khang kajap gah hadang Việt Nam… Cà Mau hu thau tal lac labik hu hadang taong cap saong hadang raong, gam ilamu ngak hadang, pablei hadang tabiak negar langiu dang akaok taneh ia.

Dom harei tapa, hajan khang, ia ndik ngak glut jaleih ralo jalan kraong di huyen Cai Lậy, Tiền Giang ba tal jalan mbak nao mai gar tavak, saong bruk pajeng ba pablei salih  klaik klaoh, mbuan ba tal bruk ngak mbang pala drak di bhap bini gaok kan kandah. Akok UBND tỉnh saong urang lambaok  dom gah chức năng  hu mbaok di labik piah pasang iek; tui nan, peih ngak dom jalan langyah. Urak ini, di huyen Cai Lậy daok 24 labik glut jaleih, atah jaik 800m. Meng akaok thun mbiah tal ini, Tiền Giang rah tabiak 67 labik glut jaleih atah labaih 11.000m.

Liên minh 8 đảng njauk gauk daok brei pok ong Pita tabiak piah pilih ruah ngak Thủ tướng Thái Lan dalam mbang nyaom di Quốc hội piah pilih ruah tabiak Thủ tướng bahrau di harei 19/9 tal. Dahlau di nan, mbang buh phiếu camereip pilih ruah Thủ tướng  di harei 13/7, ong Pita lac urang  duy nhất hu ba angan tabiak piah buh phiếu di Quốc hội, min ong tok mek hu 324 phiếu. Puac adit dahlau, ong Pita brei thau lac ong halan hatian dang tapa sa gah piah brei bruk padang rajaei ka đảng Kayua taneh ia  Thái meyah ong daok lah dalam mbang pilih ruah pok ngak Thu tuong di harei 19/9.

Ia dauk saong hajan khang rah tabiak di rilo taneh ia Châu Á yau Hàn Quốc, Trung Quốc, Ấn Độ. Di Myanma daok dang anak rilo harei hajan khang abih kuhria dalam 76 thun tapa ba tal rilo bang di bhum gah Meraong njauk ia dauk saong glut jaleih taneh trak. Jabat karja iew bhap bini daok di labik kraong  kraong saong labik biar dhong brei peih ngak dom jalan samar drah. Bhum gah meraong Trung Quốc jeng daok hu hajan khang oh ka bhian mboh. Labaih 2.600 bhap bini di Trùng Khánh brei panduan ba nao labik karei. Hajan khang dahlau di nan ba tal labaih 85 ribau bhap  bini di tỉnh Tứ Xuyên brei paduan ba nao labik karei.

Sa Cty di Mỹ bahrau brei thau bruk ngak iek janih jru bahrau piah taong ruak Alzheimer. Tui nan, meyah urang ruak pandar jru meng aval meda trun hu tal 60% triệu chứng di ruak. Jru biak siam meyah urang ruak hu taong ruak aval, siam di abih lac dahlau di tuk ruak tamuh khang. Cty ni daok ngak harak likau adat dom jabat khik ramik di dunya saong bruk ini meda ngak salah di puac thun ini./.