Mentri Kong an tacei pato gah Cảnh sát jalan mbak, kong an dom bhum palei pakhang bruk pasang iek, langyah bruk ngak suan trat tu salamat jalan mbak, abih di nyu lac bruk menyum alak ngak suan hukum, langyah tui jalan “ oh lac labik pakauk, oh klak thei tabiak”. Tui Trung tướng Tô Ân Xô, urang brei panuac di Mentri Kong an, dalam quý 3, gah Cảnh sát jalan mbak pakat negar hu langyah labaih 864.000 mbang ngak suan hukum jalan mbak, taong phạt jien labaih 1.549 tỉ đồng, chap mek  242.000 radaih dom janih. 

Pambuak tal bruk mebuk njauk jru mek tuk mbang ahar su kem tuk pataom mbaok harei Trung thu di chung cư Palm Heights (Ban Thủ Đức), ngak ka 1 ranaih metai, 48 urang pandik tung, dalam nan hu 19 urang tame sang iek ruak, harei ini, Sở Y tế TP.HCM ieu pataom samar drah Kapul dom urang roh duah ilamo piah patui veik taong yaom makna ba tal njauk jru mek pandap mbang. Sở Y tế hu pato tacei dom sang iek ruak pataom prein tame  taong ruak ka dom urang ruak lac uranaih, gam tui di nan jeng pato tacei Pasak pasang iek ruak kik Ban pambuak haong Mban khik ramik salamat pandap mbang ban, peih bruk pasang iek dịch tễ, dut iek janih jru mek dalam pandap mbang piah plaih njaih rahtabiak dom mbang njauk jru mek pandap mbang yau nan veik.

Dom bilan jiak ini, ruak pandik meta bhong di tỉnh Vĩnh Long tagok biak samar saong oh mboh padeih, abih di nyu lac di dom sang bac. Tui Pasak Pasang iek ruak kik tỉnh, kuhria tal puac bilan 9 meng blaoh, dalam tỉnh hu labaih 17.200 mbang urang ruak. Njauk caik hatai, dom adit jaik ini, yaok adit  taduan hu labaih 3.000 mbang urang njom mbak, dalam nan hu uranaih ruak meblah 53%. Urak ini, gah y te tỉnh daok jhul khang bruk pathau khan piah paglong jalan sahaneng dalam bhap bini piah pacang caga jit ruak.

Tui gah ngak nong tỉnh Hậu Giang, padai  tui kuhria mboh dahlau di thun 2023 dalam tinh dang akaok bhum ĐBSCL tuk mek hu jaik 7 tấn/ha. Piah hu siam lagaih yau nan, urang jakar ngak nong hu jhul khang bruk salih ilamo ka urang nong. Abih di nyu nan lac, hatai sahaneng di urang nong ka bruk pandar jamriak saong ilamo buh jien tame, bruk pala drak tui jalan pandar dom ilamo kỹ thuật dalam dom bruk ngak padai, dak harei dak rik tame bruk khik tani tanat saong paglaong năng suất padai di tỉnh.

Di tỉnh Sóc Trăng dalam 9 bilan tapa, bala meng langik tasik oh lagaih ngak metai manuac saong lahik drap ar, kuhria khat lahik labaih 39,2 tỷ đồng. Dalam nan, 1 urang metai, 6 urang njauk rambuac, khut tayak 276 baoh sang, sang bac, labik ngak tabiak pandap pandar; ngak yaok ratuh  phun kayau jaleih; 2.830 ha hamu padai yuak hu meng 30-70%...Abih di nyu lac, bala meng langik tasik, ia ndik ngak glut jaleih labaih 1.775 m ar pacang kraong ia, jalan betong, ar tasik. Piah pacang caga bala meng langik tasik, glut jaleih oh ka bhian mboh, tỉnh Sóc Trăng tacei pato gah chức năng, sumu tangin rivang, pacheih ba, daong bhap bini tani tanat raidiuk; tui nan, peih bruk yaok kuhria taong yaom bruk khat lahik  piah daong tui bruk ba tabiak.  

Hàn Quốc hu labaih 5.000 urang metai kayua manyum alak dalam thun 2022, tui nan, yaok harei hu 14 urang metai kayua manyum alak di negar ini. Bruk metai pambuak tal alak, dalam nan alak lac makna praong ba tal metai manuac, pagap yau dom ruak gah gan atau laka tung pruac kayua alak. Di Hàn Quốc, manyum alak hu jeng lac bruk bhian randap yaok harei, dalam dom mbang taom gaok gauk di dalam sang tuk padeih lễ Chuseok (Trung thu) atau dalam var huak melam haong urang ngak gam haong ayut saabat. Min, alak ngak kanjak jhak biak tral tal prein yava di rahra. 

Pambuak tal bruk patuh phao di pasak pablei salih Thái Lan ba tal 3 urang metai, 4 urang njauk rambuac di harei 3/10, gah Cảnh sát Thái Lan chap khik sa urang umo 14 thun saong daok tangi sua ka bruk patuh phao. Dahlau di nan, dom video klah rabha tagok mạng xa hoi brei  mboh  bruk sraw kadau di pasak pablei salih dahlau tuk rah tabiak bruk nan, rilo urang gam uranaih, nduac sraw gauk tabiak truh pasak pablei salih. Thủ tướng Srettha Thavisin brei mboh bruk haduh hatai, tui nan brei adat ka Gah Cảnh sát pasang iek ngak brei cambaic laic bruk nan, khik brei salamat labik hu rilo manuac sia.

Dom Hạ nghị sỹ Mỹ hu buh phieu brei padeih Akaok Hạ viện Kevin McCarthy. Ini lac mbang camriep dalam sajarah, Hạ viện Mỹ buh phieu brei padeih ngak Akaok Hạ viện. Sarak ini hu ba tabiak kayua Hạ nghị sỹ Cộng hòa cực hữu Matt Gaetz lambaok ka bang FloriDa, urang hu panuac lac ong McCarthy oh kham marat abih drei piah cakak trun bruk pandar cai di liên bang. Ong McCarthy lac Akaok Hạ viện Mỹ hu tukvak ngak bruk katut di abih ka dua dahlau di tuk njauk brei padeih, lac 269 harei.