Kapul ngak bruk di Cục Quân y, Tổng cục Hậu cần bahrau mai pasang iek bruk pasang iek prein yava urang lin bahrau di Trung đoàn 897 saong Sang iek ruak Quân dân y tỉnh Sóc Trăng. Tapa pasang iek di dom kapul, Cục Quân y taong yaom dom kapul hu ngak siam bruk pasang iek, pato tacei peih ngak dom harak gar di pakat glaong, bruk pacang caga jit ruak dalam tuk taduan 54 lin bahrau. Pambuak haong dom kapul dalam bruk pasang iek, yau ye Chụp X-quang, dut iek HIV/ma túy, dut iek darah …; rami ramik labik saong dom bilik pasang iek, jalan iek ruak tani tanat njauk tui panuac pato tacei, camriep bruk pasang iek ruak hu peih tabiak njauk haong adat.

Tui Viện KH thủy lợi gah Meraong negar, di bhum Taneran kraong Cuu Long khuhria mboh dahlau ia mbak njom tame praong abih di bilan thu thun ini lac puac bilan 2 tal bilan 3. Meng puac bilan 12/2022 ia mbak tagok aval. Dom bhum tapen kraong Tiền saong kraong Hậu meda daok gaok kan kandah kayua ia ndik dalam bilan 2. Ia mbak ngan haong nồng độ  4 angaok sa ribau meda njom tame  dalam tal 60km; meyah gah ala peih ia oh hu kuhria dahlau ngak ia mbak tame dalam meng 50 - 65km, ngak kan kandah tal bruk mek ia di dom pabah ribong. Kayua yau nan ye piah caga dom bruk kan kandah kayua tua riya, ia mbak rah tabiak, dom bhum palei di bhum Taneran kraong Cuu Long njauk brei padang ngak dom jalan pacang caga, khik piah ia pandar jeng yau  ia pruh ka phun pala…

Bhian di nyu, hadei di Tết Nguyên đán 2023, yaok ratuh gilai ikan di Tiền Giang tabiak tasik. Min tal urak ini, rilo gilai hu prein praong, taong cap di dom mblang tasik meng kan jeng daok di ar tasik kayua kaya tasik daok takik nao, yaom phun jien pabak ka mbang nao tabiak tasik taong cap ikan biak glaong … Tui Sở Ngak nong saong patagok palei pala Tiền Giang, meng akaok thun tal urak ini, tỉnh hu 624/1.037 gilai taong cap kaya tasik tabiak pabah lamnge. Urak ini 413 gilai daok di ar, dalam nan hu 63 gilai daok hu dom gilang paraik kê biên, 80 gilai ka oh caik pagam pandap pasang iek jalan nao, 270 gilai padeih ngak kayua daok rami ramik ngak pasiam, daok cang pablei.

UBND tỉnh Đắk Lắk brei thau, Harei pataom Cà phê Buôn Ma Thuột mbang ka 8 thun 2023 hu peih tabiak di Hà Nội di akaok bilan 3 anak tal, ngan haong kadha “Buôn Ma Thuột – Labik tal di café dunya”. Harei pataom hu peih tabiak dalam 5 harei, meng harei 10/3 tal harei 14/3, ngan haong 6 kapul gam haong 18 bruk ngak pablei salih saong ilamo. Ini lac sa bruk ngak ilamo praong, ba kein lagaih piah yaih khan angan je di cà phê Buôn Ma Thuột, cak rok patagok cà phê angan je di Việt Nam. Tapa nan, dak harei dak ba Buôn Ma Thuột jeng labik tal di cà phê dunya, rik daong paglaong yaom, brei mboh labik dang di cà phê Việt Nam angaok darak pasa dunya.

Gah Y tế dunya ( WHO)  brei thau, taneh ia châu Phi Malawi daok pacang caga bruk tamuh jit ruak tả trak abih kuhria meng dahlau mai tal ini tuk hu jaik 37.000 mbang urang njom ruak saong 1.210 urang metai, dalam tuk vaccine  pacang caga ruak kurang biak ralo. WHO daok huac lac jit ruak tamuh urak ini meda jhak nao meyah oh hu dom jalan pacang catang.

Dom urang par akaok Liên minh châu Âu njauk gauk brei ngak catang veik jalan tapen negar piah pacang cakak bruk sarau kadhau di cư di anak mata, jang yau di harei hadei. Bruk ngak ini hu ba tabiak hadei di Mbang nyaom biai pakat glaong đặc biệt di Liên minh châu Âu (EU) hu peih tabiak dalam dua harei tapa di Bỉ. Dahlau di nan, 8 taneh ia dalam Liên minh châu Âu (EU) hu jak ba Ủy ban châu Âu (EC) pasang iek veik ngak catang jang dom jalan tapen negar haong gauk di nyaom piah pacang caga bruk mbuan rahtabiak sa mbang sarau kadhau di cư praong karei.

Urang metai kayua phao ndao di Mỹ tagok glong abih di dunya, glong jang rilo mbang dut saong  taneh ia karei di dunya. Tui USA Today, di Mỹ, yaok 100.000 bhap bini ye hu labaih 12 urang metai kayua phao ndao, glong jang 4 mbang taneh ia dang dhi 2 lac Thụy Sĩ. Ralo urang pan phao dalam dom mbang patuh phao rilo meng lac urang kalik patih. Dom urang metai lac urang asal Phi saong urang njauk rambuac dalm dom mbang patuh phao di Mỹ glong jang 2 mbang saong glong jang 14 dut hoang urang kalik patih./.