Pasang iek tapak bruk peih ngak Danak dak buh jien tame padang ngak Mblang kapar haok dunya Long Thành di tỉnh Đồng Nai dalam harei kabroi, akaok Quốc hội Trần Thanh Mẫn brei thau lac, dom urang Quốc hội biak caik hatai, caong maong ka Danak dak samar drah ngak salah, tani tanat jalan ba tabiak saong hu chat luong, samar ba tame pandar, peih ngak, kayua yau nan ye, tukvak tapa, yaok kan kandah jeng hu Quốc hội taoh talaih chip. Akaok Quốc hội ieu kakei Mintri jalan mbak pajeng ba, dom jabat pambuak tal bhian caik hatai, pasang iek, pato tacei piah ka danak dak tani tanat tukvak ngak, njauk jalan ba tabiak min jeng tani tanat ka chat luong. Tui nan, akaok Quốc hội jeng hu nao rivang, alin pandap ka dom baoh sang rahra daok di Labik tái định cư Lộc An - Bình Sơn; jao alin pandap ka dom kapul padang ngak Danak dak buh jien tame padang ngak Mblang kapar haok dunya Long Thành.

Mesup ini, tỉnh Sóc Trăng peih Ginum biai Lang yah, taong yaom “Tanut salih bahrau hadah krah – PII tỉnh”. Tui Sở Ilamu saong Cong nghe tỉnh, tapa dak labik dang Bộ chỉ số salih bharau hadah krah pakat tinh thun 2023, tỉnh Sóc Trăng hu 31,81 điểm, dang dhi 48/63 tỉnh, ban saong dang dhi 10/13 tỉnh ban bhum ĐBSCL. Yam ndok Sở Ilamu saong Kong nghe tỉnh, ong Nguyễn Thành Duy brei thau, Sóc Trăng hu jalan lagaih piah buh jien tame ka bruk pato megru paglaong ilamu di urang ngak saong rilo jalan lagaih piah tỉnh patagok dom gah ngak nong kong nghe glaong, ngak kong ngak tabiak kaya pandap.

Kapul khik caga quyen uranaih Việt Nam, pambuak haong Kapul daong urang jaoh jo, quyen uranaih saong urang ruak kan kathaot tỉnh Bạc Liêu peih bruk jao 125 paok jien bac saong pandap ka dom adei anek saih kan kathaot, yam tapa kan kandah takre bac ta-a, haong pok jien abih tih labaih 150 triệu đồng. Meng thun 2022 tal urak ini, Kapul hu jak ba dom urang ngak pahla daong jaik 5 tỷ đồng piah daong ka dom urang jaoh jo, urang ruak kan kathaot. Dom paok jien bac ini daong ka dom adei yam tapa kan kandah, kham marat bac taa, piah harei hadei jeng menuac siam, kein ka puk paga palei negar.

Meng bilan 8 ni, gah Bao hiem xa hoi peih ngak tapak bruk bayar jien bilan padeih hưu, jien daong Bao hiem xa hoi yaok bilan tapa tài khoản cá nhân ka urang mbang tui di dom labik Bao hiem xa hoi dalam taneh ia. Urak ini dalam taneh ia hu jaik 3 triệu 400 rabau menuac hu mbang tui jien bilan padeih hưu, jien daong Bao hiem xa hoi yaok bilan. Tal urak ini, di bhum thành thị hu jaik 74% dom menuac mbang tui dom sarak Bao hiem xa hoi, jien daong oh hu bruk ngak tapa tài khoản cá nhân, tagaok jaik 10% duk saong thun blaoh.

Dah page ini, sa dhal phun praong jaoh di Mblang bein Tao Đàn, quận 1, TPHCM  ngak ka 2 urang metai, 3 urang njauk rambuac. Phun hijao jaoh dhal lac phun Dầu praong vil taom dar dhar jaoh lac labaih 1,2m, laik trun meng mangaok glaong 25m. Tuk camriep mboh lac, dhar phun jaoh huan gah dalam, gah langiu dhar phun daok that saong hala hijao yau dom phun karei. Meng di dah page ini, ong Nguyễn Hồ Hải, Phó Bí thư Thường trực Thành ủy TPHCM hu mai tal Sang iek ruak Bhap bini 115 sua tangi, pachreih ba dom urang njauk bala. Pasak khik ramik hạ tầng kỹ thuật, Công ty Mblang bein phun hijao pambuak haong sang urang gaok bala sangka dom urang njauk rambuac saong daong kuhria ngak ndam lahik lahik ka dua urang metai.

Trung Quốc daok yam tapa rilo taneh ia karei dalam bruk brei adat taxi oh hu menuac peih hu nduac angaok jalan. Ilamu ini jeng daok tamuh tabiak sa kan kandah ka bruk ngak tuk radaih oh hu menuac peih di Trung Quốc. Di ban Vũ Hán, taxi peih eng lac bruk bhian randap. Tapa nan, meda ngak patrun yaom jien duah hu di dom urang peih radaih taxi. Langiu di nan, dom radaih pasram peih jeng oh cang hu gru pato daok dalam radaih. Trung Quốc daok jhul samar labik dang akaok dalam gah radaih automatic. Nan ye bruk patagok parilo janih radaih peih eng lac bruk oh plaih hu.

Urak ini, abih tih dom urang ruak patuk ho gà di negar Anh tagok labaih 10.000 urang, dalam nan hu 10 uranaih ruak metai. Dom urang ruak njom laka kayua vi khuan ini tagok biak samar saong kuhria lac tal tanut glaong abih dalam 40 thun, dalam nan bruk njauk haduh hatai nan lac dom urang ruak metai urak ini daok di tanut glaong abih kuhria dalam labaih sa piluh thun. Dalam dom urang ruak, labaih sa mateh lac dom urang labaih 15 thun. Tui Jabat An ninh Y tế Anh, dom urang ruak patuk ho gà tagok samar lac kayua bruk klauk jru pacang caga ruak trun khang.

Gah Y tế dunya (WHO) brei thau lac dom menuac njauk ruak COVID-19 dak harei dak rilo angaok dunya saong tui kuhria mboh lac oh siam veik hu dalam tukvak anak tal. WHO jeng khan lac mbuan hu dom biến thể trak damak rilo  jang tuk virus daok njaom mbak saong salih bahrau, meda ba tal sa biến thể pacang veik hu bruk ba tangin tame di gah y tế. Nan ye WHO hu panuac ieu dom rajaei jhul khang dom bruk klauk jru pacang ruak, khik kajap lac dom nhóm menuac mbuan njaom mbak di abih hu klauk jru 12 bilan sa mbang./.