Jabat Rajaei birau hu harak pathau khan tamat di Phó Thủ tướng Trần Hồng Hà di mbang nyaom ka dự thảo ramik pasiam Nghị định ka 81 di Rajaei ka jalan mek jien, khik piah jien bac ngan haong sang bac di he thong pato megru di karja saong sarak brei miễn, trun jien bac, daong jien bac da-a. Tui nan, Phó Thủ tướng Trần Hồng Hà eiw Mentri Pato megru oh brei tagok jien bac thun 2023-2024. Phó Thủ tướng caong khin Mentri Pato megru  patui bruk roh duah sarak jien bac hu siam abih gah, njauk lagaih, piah ngak brei tui jak ba xa hoi hoa jeng yau pato megru pho thong.

Peih ngak danak dak pakacah gauk “umo thun praong – kreih camin hadah”, dom thun tapa, urang praong thun di tỉnh Tiền Giang hu ba akaok nao dahlau, kham merat dalam bruk ngak mbang, pablei salih, ngak kaya mada ka baoh sang saong palei negar. Dalam tỉnh urak ini hu 178 ribau urang praong thun; dalam 5 thun tapa, hu labaih 4.900 urang praong thun hu pok mayaom dalam bruk ngak mbang, pablei salih joi. Rilo sang urang praong thun hu jien mek tame yaok thun tagok tal rilo tỷ đồng saong daok halain hatain rik daong tame dom danak dak an sinh xã hội. Bahrau ini, UBND tỉnh Tiền Giang hu alin 20 Harak mayaom ka urang dalam kapul urang praong thun naih joi di gah ini.   

Tui kuhria mboh dahlau, ia sua di dom kraong, craoh  di kraong Đồng Nai tagok samar ngak dauk  dom labik dhong biar, ngak kan kandah tal dom bruk nao mai angaok kraong, raong kaya ikan dalam ia, pala ngak kaya nong. Ta-eng Labik Khik iek alam - ilamu Đồng Nai khan brei dom baoh sang urang raong ikan long be di labik kraong Đồng Nai saong binek Trị An brei panduan bè raong tal labik salamat saong ba bhap bini tagok tambok ar. UBND huyen Định Quán brei padeih ngak bruk di dom tapen ghe gilai di kraong Đồng Nai, piah khik brei salamat ka bhap  bini; dom tapen ghe gilai peih ngak eng tapen kraong La Ngà, kraong Đồng Nai saong tapen binek Trị An brei padeih dalam tukvak ribuk ia sua.

Sa binah taneh pala padai Hè Thu di huyện Trần Văn Thời, Cà Mau tal tuk yuak, min kayua hajan khang dui atah dom harei tapa ngak ka ia dauk trak, mac yuak oh tame hu. Dom baoh sang njauk khat lahik biak trak, thau lac khat lahik nan ye pablei padai di mblang hamu ngan haong yaom 250.000 đồng/công ka dom urang raong ada nduac di mblang hamu. Taphia di nan, dom baoh sang rahra jeng daok yuak meng tangin. Min, ia dauk mateh rup manuac ngak kan kandah biak rilo ka bruk yuak kuak. Vụ Hè Thu ini mikva buh jien tame labaih 1,2 triệu đồng/công, dom sang urang nong gaok khat lahik jeng khat abih.

TP.HCM hu caga blaoh ka Le hoi kraong ia Ban raya HCM mbang ka I thun 2023, hu peih ngak rilo bruk ilamu - ma-in sambai - nghe thuat biak siam mekre, peih ngak angaok kraong Ban Gon. Peih ngak dalam 3 harei, meng harei 4 -6/8, Le hoi kraong ia Ban raya HCM mbang ka I meda  hu peih ngak veik “ Angaok tapen ala ghe gilai’ saong dom bruk padhih the thao ala ia…Bruk biak gheih di Le hoi lac show veik bruk rah tabiak ngan haong kadha “ Sài Gòn - Kraong ia dak dalikan” peih tabiak di melam 6/8 di Cang Sài Gòn. Ini lac danak dak padang ngak veik gilac kaok meti di Ban raya HCM, brei mboh veik bruk di alam, anek manuac tapa dom tukvak tapa di Sài Gòn - Gia Định - Chợ Lớn - TP.HCM.

Hajan yau tuh ia dalam 3 harei ini ba tal ia sua, ia dauk biak trak di rilo bhum langiu ban Bắc Kinh, Trung Quốc. Pasak kuhria mboh dahlau bruk langik tasik negar Trung Quốc  hu tabiak panuac cảnh báo sambo kanjik ka hangin khang dalam bruk cảnh báo 4 tanut lac: hijao – kanjik – kanjik katam – bhong tuk ribuk Khanun mai jaik gah timun negar ini. Tal dah page harei 1/8, di ban Bắc Kinh hu 11 urang metai, 27 urang lahik. Hajan khang dui atah oh padeih ngak ka hajan ia sua, ia dauk di rilo labik di langiu ban Bắc Kinh. Di pak ini, jalan dien, jalan phone njauk klaih klaoh, radaih ô tô njauk ia ba theik saong sang jaleih ka oh yaok pataom hu. Labaih 52.000 rahra hu panduan ba nao daok di labik salamat.

 Mỹ hu mboh 419 mbang patuh phao ralo labik kuhria meng akok thun mbiah tal ini. Tui gah langiu rajaei bhian tui iek dom mbang patuh phao di Mỹ, taneh ia ini hu mboh dua mbang patuh phao ralo rabik yaok harei. Labaih 25 ribau urang metai kayua patuh phao dalam thun ini, kuhria rah tapa 118 urang metai yaok harei. Meyah yau urak ini, ralo abih hu 690 mbang patuh phao ralo labik di thun 2021 meda daok tagok gilac dalam thun ini.

Meng harei 1/8, urang pablei salih di France meda oh taduan hu harak hóa đơn. Di dom cửa hàng, urang blei pandap meda oh taduan hu harak hóa đơn bi-ar, min jeng meda taduan hu hóa đơn kỹ thuật số, hu payua tal tui jalan tin nhắn phone par tangin, email atau mã QR. Mayah cửa hàng hu ứng dụng karei, hóa đơn meda hu ngak bahrau dalam ứng dụng nan yaok mbang tuai blei pandap. Bruk ini hu pandar piah patakik tachrauk nerak.