Page ini 11-4, Tieu ban dieu binh, dieu hanh peih ngak taong abih bruk pasram dom kapul dieu binh, dieu hanh piah peih ngak Pahadar 50 thun Harei Peih paha gah Meraong negar, yasa taneh ia, di Ban Biên Hòa, tinh Dong Nai. Dom kapul lin pan phao karaong hu mbaok tame pasram haong gauk dalam nan hu dom kapol dang di bol lin, kong an, rahra ta-eng pacang khik hu 13 kapol. Dalam nan, bol lin 8 kapol, kapul tiêu binh, le dai; kong an 5 kapol. Danak dak pasram hu dua banah: Banah adat di Ndang, Karja kayua bol lin dang ngak saong banah dieu binh, dieu hanh.

Thun bac 2025-2026, TPHCM palih ruah jaik 67.000 anek saih tame tal bac 10 di karja ngan haong 115 sang bac. Thun ini, hu jaik 89.000 anek saih tamat THCS, palih ruah tame jaik 67.000 anek saih tal bac 10 di karja, meblah labiah 75%, rilo jang thun dahlau. Min, kayua anek saih tal bac 9 thun ini takik jang dut saong thun dahlau, yau nan ye kuhria palih ruah tame biar jang thun dahlau labaih 10.000 anek saih. Mbang pakacah palih ruah tame tal bac 10 di TPHCM thun ini rah tabiak di harei 6 saong harei 7/6 anak tal.

Di dom tinh, ban gah Pei negar, dom kapul lin pan phao karaong daok peih ngak rilo danak dak, harei raya pandap mbang, ilamo…piah gam haong mikva bangsa Khmer raok Tet Chol Chnam Thmay 2025. Di xa Đông Thành, ban sit Bình Minh, tinh Vinh Long daok rah tabiak dom danak dak Tet Bol lin rahra saong harei ilamo, pahat padhih urang bangsa Khmer. Ini lac bruk piah pasiam, pakajap jang bruk gul pataom pambuak gauk di bol lin saong rahra dalam bruk padang saong pacang khik Taneh ia, ngak jeng bruk bui sambai, chreih chrai raok salam Tet Chol Chnam Thmay di urang bangsa Khmer.  

Hajan praong dui atah jaik sa mon di dom bhum palei dalam tinh Ben Tre di biar harei kabroi 10/4 ba tal rilo jalan njauk  ia dauk, ia tame sang rahra. Hajan praong ngak la-ar padam pandiak trun di dom harei tapa. Hajan nan daok rik tame  “ rao sara mbak”, hu ia taba padang piah di dom ribong dalam mblang hamu, daong ia pruh phun pala jeng yau bruk ngak nong. Yau nan min, bhap bini rahra njauk brei caik hatai dom bala meng langik jhak gam haong hajan akaok.  

Pambuak tal bala apui khuah mbang sang ngak 4 urang metai daok di phuong 4, Ban Mỹ Tho, tinh Tien Giang, tapa pasang iek hu bruk apui khuah, jabat chuc nang kuhria mboh camereip, bruk ini kayua ndien ndaik pui mbang rada sang ngak meng kayau ba tal khuah blaoh hadei nan khuah praong. Urang dang akaok tinh Tien Giang hu jao jien daong ka dom baoh sang urang gaok bala, yaok urang metai hu daong 25 trieu dong. Gam haong nan brei daong ka uranaih hu amaik ame metai piah sahnang ka bac megru; gam haong nan samar drah padang gilac baoh sang njauk apui mbang.

Dalam tuk bruk meriak gauk gah pablei salih My -Trung dak harei dak catang, Trung Quốc brei panuac kakei gah jirah yulit saong nao bac haong My. Mentri Ilamo saong Yulit  Trung Quoc  kakei  tuai damuai  taong yaom tani tanat ginup dom bruk mbuan khat lahik tuk nao yulit Mỹ jeng yau bruk nao mai njauk caik hatai. Mentri Pato megru Trung Quoc kakei anek saih sinh vien taong yaom bruk mbuan gaok kan kandah sraw kadau saong paglong jalan sahaneng pacang caga tuk palih ruah bac da-a di dom tieu bang di My tukvak anak tal.

New Zealand daok pambuak haong dom negar karei piah ba tabiak dom panuac samu gauk piah pasiam bruk pablei salih tui hatai drei, hadei tuk Mỹ anak meta brei padeih pandar jien je ngan haong jaik abih dom negar. Gam haong nan brei mboh samar drah hu dom mbang ndom biai saong dom urang pan akaok karei piah duah hu sa bruk pacang caga haong gauk ngan haong asal kadha jien je meng Mỹ. Dahlau di nan, negar ini hu ndom lac brei oh ba tabiak dom jalan ngak piah ngak cagar ngan haong jien je di Mỹ.

Takik abih di nyu 47 urang metai saong rilo urang karei njauk rambuac tuk hangin, hajan, jakala klak, hajan patau gam di dom bang dalam negar An Do harei karoi 10-4. Jabat kuhria dut iek langik tasik An Do kuhria iek ribuk meda rah tabiak dalam dom harei anak tal. Di An Do, dom mbang jakala klak, hajan gam gam saong dak harei dak kan thau dahlau, ba tal yaok rituh urang metai yaok thun./.