Brei panuac peih mbaok Nyaom biai mbang ka 17, piah pataom iek veik 1 thun peih ngak Sarak 05 di Mban Chấp hành Đảng bộ ban raya ka jalan pacang caga jit ruak COVID-19 saong pasiam veik kinh tế ban raya hadei di harei 15/9/2021, Uỷ viên Mintri Chính trị, Bí thư Thành uỷ ban raya Nguyễn Văn Nên brei thau lac, njauk di harei ini thun dahlau, Ban Thường vụ Thành uỷ ginum biai  brei panuac ka Sarak 18 ka bruk patui veik pasang iek saong ramik veik dom jalan pacang caga jit saong bruk  KT– XH 9 bilan di thun 2021. Tuk nan, thei jeng duh hatai kayua dom tanut ba tabiak jeng bier, tăng trưởng âm saong jien mek tame kadung jien kanja bier. Tal urak ini, dom bruk ngak hu lac hu makna biak praong, abih gah, chreih chrai saong hatai jia daok tagok glaong. Min, di yaok gah njauk maong veik saong duah tabiak dom siam lagaih piah patagok, abih di nyu nan lac bruk brei thau cambaih, peih ngak danak dak bruk ngak di yaok gah, yaok puk palei.

Harei pataom pakacah Urang ngak nong naih joi pakat negar mbang ka 5 daok rah tabiak di tỉnh An Giang, hu mbaok 16 kapol pakacah naih joi di abih hu palih ruah meng dom bhum palei. Harei pataom pakacah lac “mblang me-in” ba mbuan lagaih ka urang jakar Hội, urang nong dalam negar hu taom gaok gauk, hu bac megru, klak rabha ilamu dalam bruk pala drak, pablei salih, hu thau saong pandar ilamu ky thuat tame bruk pala drak saong dalam raidiuk, gam haong nan, patagok bruk jum pataom urang ngak nong di dom bhum palei, dom bangsa.

Anak bruk  langik tasik oh siam, hajan ia sua dui atah, gah ngak nong tỉnh Tiền Giang hu pato tacei dom puk palei saong urang nong samar drah yuak padai Hè Thu 2022 ka nyu salah, dahlau di bilan hajan ia sua. Dalam bilan Hè Thu 2022, mikva urang nong trun pajaih hu jaik 48.500ha, mek hu jaik abih bruk ba tabiak. Tui Jabat ngak nong saong patagok palei pala huyện Gò Công Đông, kayua ngak njauk haong tukvak pala drak, pandar gam gam dom jalan langyah ilamo kỹ thuật ngak nong thâm canh, gam tui di nan samar drah yuak samar padai daok tathak,  nan ye tal urak ini, tỉnh hu bilan Hè Thu yuak kuak blaoh dahlau di tuk rahtabiak ribuk saong bala di langik tasik.

Kuhria tal page ini, ribuk ka 4 di dom tỉnh, ban meng Nghệ An tal Bình Định saong 2 tỉnh Kon Tum, Gia Lai ngak brei 60 urang njauk rambuac, labaih 3.360 baoh sang glut jaleih  saong par tabung; rilo ribaong kraong, ar pacang, tapen kraong tasik glut jaleih, theik tui ia; rilo jalan mbak dauk dalam ia, jalan HCM saong dom jalan roya glut jaleih rilo labik, dom jalan mbak dalam bhum saong 4 tatua tuan, tatua tạm njauk ia ba theik. Urak ini, dom tỉnh daok daong bhap bini ramik pasiam sang jalieh, par tabung, khut tayak.

Takai kraong Dinh di ban Phan Rang - Tháp Chàm, tỉnh Ninh Thuận njauk glut jaleih ngak ka yaok pilih baoh sang daok di khu phố 4, phường Bảo An biak haduh hatai. Urak ini daok tame bilan hajan, bruk glut jaleih dak harei dak trak damak, takai kraong mbang tame dalam labik bhap bini daok saong tame taneh ngak nong. So ngak nong saong patagok palei pala hu likau UBND tỉnh Ninh Thuận brei padang danak dak buh jien tame ngak kraong ribaong ngan haong jaik 1km piah khik salamat ka bhap bini saong drap ar bhap bini di labik glut jaleih.

  Di dom tỉnh gah Barak Campuchia, hajan ia sua dalam dom harei tapa ba tal yaok pluh ribau hecta njam patam khut khat, 4 urang metai; yaok ribau urang brei panduan nao labik karei. Piah hu salamat ka bhap bini dalam bilan hajan ia sua, Thủ tướng Campuchia Hun Sen tacei pato UB pakat negar gah Khik iek Bala Campuchia pambuak saong dom jabat chức năng saong urang kajar dalm bhum tuk halei jeng caga panduan ba bhap bini nao labik hu salamat.

Hu takik di nyu lac 3 urang metai, 14 urang njauk rambuac saong 15 urang lahik dalam mbang jaleih tatua di jalan cao tốc di bang  Amazonas, gah barak Braxin. Gah truyền thông pak ini ba panuac di dom urang maong mboh khan lac, mbaik tatua nyu ra-ai talah praong ngak gar jalan dahlau di tuk jaleih trun. Karja bang Amazonas urak ini ka oh hu panuac brei thau ka bruk ini.

  Hàn Quốc daok duah jalan jhul patagok bruk ngak tabiak radaih điện, dalam nan hu ba tabiak bruk kham merat ngak brei tagok dua mbang urang blei dut haong dom labik ngak tabiak ô tô dalam negar  lac 12% di thun 2030 saong hu jeng taneh ia khang gah công nghiệp radaih ôtô di dunya. Piah ngak hu bruk nan, rajaei samya brei pabak dom bruk daong gah jien je saong rilo jalan daong karei di gauk piah pacheih urang buh jien tame ka dom labik ngak tabiak radaih ô tô yaom 95 ribau tỷ Won ( labaih 66 tỷ USD) di thun 2026./.

Urang lang: A.Nghiem & Thu Thao – 29/2/2022