Palei ngak lan Hamu Craok hu padang tabiak saong cak rok patagok hu labaih 7 abap tapa di ban sit Phước Dân, huyện Ninh Phước, tỉnh Ninh Thuận. Ini lac palei yao klak hu tal 90% lac urang Cam saong jaik abih jeng pambuak pagam haong bruk ngak lan meng kan.

Bruk ngak lan palei Hamu Craok bhian hu pato veik ka urang kamei, taong abih jalan ngak lan jeng hu ngak meng tangin. Kayua yau nan, yaok janih pandap ngak tabiak jeng hu caik veik inem biak karei, ndung bak bruk saneng duah saong hatai takre. Amuk Đàng Thị Trình daok di palei Hamu Craok brei thau: “Bruk ngak di khaol dahlak hu meng kan mai, yau nan ye khaol dahlak oh klaak nyu hu. Meyah harei hadei dahlak taha nao ye anek taco dahlak patui veik bruk ngak ini.”

Gam haong palei ngak lan Hamu Craok, palei menyim jih dalah Cam Caklaing jeng lac palei ngak daneiy angan di Ninh Thuận. Pak ini jeng daok khik hu bruk menyim jih dalah Cam meng kan bo oh cang tal mac moc saong jam riak bahrau bahrang. Tapa yaok abap hu mbaok, bruk menyim meng tangin pak ini jeng daok hu ngak, patagok dalam puk paga palei pala. Meng phun kapah hu pala dalam bein sang, meng palak tangin gheih ghang di dom urang kamei Cam, rilo khan bai bak asal ilamo bangsa hu tabiak rai.  

Amuk Lâm Nữ Minh – Phaok Yam ndok HTX Jih dalah Cam Caklaing  brei thau: “Kadha biak karei di menyim Cam nan lac brei hu dua baoh daneng menyim yau khaol drei hu mong mboh. Sa baoh daneng menyim atah piah menyim dom jih bingu hala duh ka dom janih talei viền. Daok sa baoh daneng menyim daok diah jeng dreh yau dom bangsa karei nan lac piah menyim jeng dom blah khan bai.”  

Ndom tal dom sarak daong ka dom palei ngak cak rok patagok, ong Ngô Khanh, Phaok akaok UBND huyện Ninh Phước, tỉnh Ninh Thuận brei thau: “Dom sarak daong ka dom palei ngak di tukvak urak ini rilo meng lac pataom tame bruk ngak jalan mbak, sang parang iek, gom hadah jalan.”

Lac tỉnh hu rilo urang Cam daok, Ninh Thuận ndung bak ilamo bangsa Cam. Meng akhar vak, khan ao angui cuk, ilamu padang ngak sang danaok, điêu khắc tal bruk ngak lan, menyim jih dalah  taong abih mboh biak karei. Abih di nyu lac ilamo daoh tamia Cam hu jeng inem krung hu yaom glaong di bein ilamo Việt Nam. 

Ong Văn Công Hoà, Phaok Yam ndok Sở Ilamo padhih saong rivang ma-in tỉnh Ninh Thuận brei thau, tapa bruk patagok asal ilamo bangsa pambuak pagam haong cak rok patagok bruk rivang ma-in daok ba jalan cak rok patagok bruk ngak mbang kinh tế bol bhap rahra. “Hu số hoá bloh labaih 200 janih pandap; padang ngak hu dom bộ sưu tập pandap panda yau: khan ao Cam pambak tui agama Bà La Môn, khik ramik ragu ragam meng akhar vak, roh duah saong padang ngak veik labaih 300 janih pandap panda.”

Duah gilac veik dom yaom glaong di nyu pambuak pagam haong asal ilamo bangsa, bruk rivang ma-in Ninh Thuận daok hu khik ramik, cak rok patagok asal ilamo bangsa Cam, ba labik ini cak rok patagok khang kadang, ba mai rilo bruk hit ngak mbang saong jien mek tame tani tanat ka bhap bani./.