Patagok ilamu meng kan lac “Anit ranam gauk, daong ba gauk”, abih he thong chính trị tỉnh An Giang daok kham merat, pataom prein yava jien padai tame sangka Tet ka bhap bini, piah kyaok sang, yaok urang hu mbang Tet biak bui sambai, haniem phul saong patak pataom…Kuhria tal tukvak ini, labaih 13.000 urang, hu buh prein ka cách mạng saong gauk gar hu taduan pandap Tet di Akok negar, kuhria tabiak yaom jien lac labaih 4 tỷ đồng; jaik 132.750 urang taduan pandap Tet di urang pan akaok tỉnh, tui yaom jien lac labaih 100 tỷ đồng.

Kadung jien Daong urang kathaot tỉnh An Giang jeng hu buh tabiak daong blei labaih 4.000 paok pandap, saong yaom jien abih tih labaih 2 tỷ đồng ka urang đoàn, urang hoi, urang ngak lahik bruk ngak hu raidiuk kan kandah.

Yam tapa dom kan kandah hadei di jit praong Covid-19, bilan xuân ini, rahra dom puk palei di Đắk Lắk chreih chrai jang tuk bilan pala cà phê hu năng suất saong yaom kaom tagok jang dut saong yaok thun. Di dom puk palei bhum atah bayah, bilan xuân dak bui sambai jang meng hu bruk sangka daong ba di dom kapul pambuak talei rohim. Pagap yau di ban sit Buôn Hồ urak ini hu 111 jabat, kapul hu parabha jeng 28 kapul pambuak talei rohim haong 28 puk palei. Tapa bruk pambuak talei rohim nan, hu daong patagok bruk jak ba, pathau khan ka rahra di dom puk palei; daong sangka anek saih kathaot yam tapa kan kandah, daong sang kan kandah cak rok patagok bruk ngak mbang, pala drak, jak ba rahra hu mbaok tame blei bảo hiểm y tế, blei thẻ bảo hiểm y tế alin ka rahra gaok kan kandah. Bruk pambuak talei rohim haong puk palei di Đắk Lắk hu tame daong praong ka bruk khik kajap an ninh chính trị, trật tự xã hội, pakhang  bruk jum pataom bangsa.

Peih ngak danak dak pakat negar - Bruk bol lin pambuak haong bhap bini puk palei bhum urang bangsa takik saong bhum ceik vaktu ka I ( 2021-2025), Trung đoàn 717 ( Binh đoàn 16) pambuak saong UB bhap bini huyện Bù Đốp, tỉnh Bình Phước peih bruk jao 86 drei pajaih ka 49 baoh sang bhap bini bangsa takik saong baoh sang biak kan kandah di dua huyen Bù Đốp saong Lộc Ninh, tỉnh Bình Phước. Ini lac dom drei pajaih hu prein yava khang kadang, hu klauk jru caga ruak blaoh saong dut iek jit ruak ginup abih. Piah ka dom baoh sang taduan drei pajaih  mai raong hu siam lagaih, dahlau di nan, dom baoh sang bhap bini hu pasram, tacei pato ilamu  padang ngak var ro raong saong dom jalan ngak brei hacih khak athur; ilamu pala, ngak saong khik piah pandap mbang ka athur.

Cục Khik ramik padang ngak danak dak, Mintri ngak nong saong patagok palei pala brei thau, tukvak 2021-2025, Mintri hu peih ngak 130 danak dak bahrau. Tal urak ini, Mintri hu pasang iek, mbaoh tangin brei ngak 73 danak dak, danak dak thành phần. Cục Khik ramik padang ngak danak dak daok pataom tame jhul samar dom danak dak hu Rajaei brei adat dui atah tukvak meng thun 2022 tapa dom thun 2023; thun 2024. Dalam nan brei ngak dahlau dom danak dak caik ia praong yau ye binek Krông Pách Thượng di tỉnh DakLak, binek Cánh Tạng di tỉnh Hòa Bình, binek Bản Mồng di tỉnh Nghệ An saong binek kraong Chò di tỉnh Khánh Hoà).

Tui kuhria mboh meng Mentri Thông tin saong Truyền thông, Việt Nam tok hu 30% urang bac tapuk gam gam, 26% oh bac tapuk saong 44% lavik lavik meng bac  tapuk. Yau nan min, khol drei hu tal 70% bhap bini pandar Internet, daok dalam kapul dang akaok dom taneh ia di dunya. Tapa nan brei mboh ilamu bac tapuk dalam tukvak salih pandar số. Tui dom urang ilamu gah pato megru, piah jhul bruk bac tapuk patagok, oh lac tok ieu bhap bini bac tapuk rilo jang, bo bruk praong daok di labik lac brei paglong asar kadha dalam tapuk meng urang cih vak tal urang ngak tabiak tapuk. Tui nan, anak tal, tapuk điện tử daok hu ralo jalan patagok siam lagaih, yaok urang bac tapuk hu bruk palih ruak karei gauk di tapuk angak mạng saong tapuk siphau yau nan ye dua janih tapuk nan brei hu tagok yau gauk, pamong tal bruk ba rilo baoh tapuk gheih tal urang bac, rik tame paglong ilamu bac dalam menuac sia.

Ba drei tame harei roya Tết meng kan di bangsa, urang lambaok negar Việt Nam di Ai Cập hu peih danak dak taom gaok rahra uan Xuân sak tapai 2023. Hu mbaok tame danak dak hu urang kajar, urang ngak gah Lambaok negar saong dom jabat lambaok negar Việt Nam di Ai Cập, rilo mikva urang Việt daok di negar langiu, anek saih daok raidiuk, ngak bruk saong bac taa di Ai Cập. Dalam chreih chrai, bui sambai uan raok Xuân sak tapai 2023, mikva urang Việt di Ai Cập gam hu mbang dom pandap meng kan ndung bak Tết di Việt Nam yau ye ahar bánh chưng, nem, phở. Dahlau di nan, urang lambaok negar Việt Nam jeng hu peih bruk papaok ahar bánh chưng piah hadar veik dom ilamo meng kan siam gheih di bangsa di tuk xuan mai tal.

Rajaei Nhật Bản birau ginum biai njauk gauk, kuhria peih tathuak ia thải di sang mac  điện hạt nhân Fukushima tabiak tasik, di bilan xuan atau bilan hè thun 2023. Dahlau di nan, bilan 4 thun 2021, Nhật Bản brei peih tabiak labaih 1 trieu tấn ia chieu xạ meng sang mac điện hạt nhân Fukushima, hu hlang blaoh tabiak tasik. Rajaei taneh ia ini taong yaom, bruk peih tathuak ia thải tapa hlang blaoh labaih 2 thun sa mbang khik siam ka alam moi truong. Yau nan min, dom taneh ia jaik taphia, dalam nan hu Hàn Quốc saong Trung Quốc brei mboh bruk haduh hatai ka alam moi truong tasik.

 Gilang paraik kanja Thái Lan brei thau, dom gilang paraik ảo camriep abih di negar ini tui kuhria meda ba tame pabak dịch vụ di thun 2025. Kadha ini hu ba tabiak dalam tuk gah gilang paraik kanja Thái Lan daok jhul samar bruk maraik gauk, peih praong bruk hu masaiy saong cakak trun jien sahuika dom doanh nghiệp saong manuac urang. Dom gilang paraik online jeng hu caong maong lac meda peih praong dịch vụ tal dom tuai bahrau ngan haong yaom sahui bier jang, bruk ini meda ba mai kein lagaih ka abih tih dom tuai damuai./.