Bhum Đông Nam bộ hu tanut patagok mbiah kayua lac labik hu công nghiệp tagok khang

UB bhap bini Ban raya HCM birau mbaoh tangin tame hồ sơ padang jamang peih taneh padang ngak binah ka 1 di danak dak Jalan ka 3 Ban raya HCM piah sap pagap padang jamang, jao hồ sơ peih taneh. Padang jamang lac bruk ngak hu makna praong dalam piah peih padang ngak đồ án ramik veik dom quy hoạch, bayar jien daong, padang veik labik daok, thau cambaih hadom menuac khin panduan salih labik daok…Rajaei iew meng ini tal bilan 6.2023, danak dak Jalan ka 3 Ban raya HCM brei hu takik abih 70% mbaoh taneh piah padang ngak salih jalan nagak camereip lac puac thun 2023. Danak dak brei peih ngak dalam 36 bilan saong brei radaih peih di bilan 10.2025, salah taong abih di bilan 6.2026.

Patagok kinh tế 9 bilan thun ni di Đồng Nai mek hu labaih 8,6%, dang ka 4 dalam bhum Đông Nam bộ. Dalam nan, Tây Ninh dang ka sa song tanut patagok labaih 11,5%; patui di nan lac TP.HCM; Bình Phước song Bình Dương. Bhum Đông Nam bộ hu tanut patagok mbiah kayua lac labik hu công nghiệp tagok khang, dui pachreih hu rilo urang dalam taneh ia song langiu buh jien tame ngak mbang. Langiu di nan, Đông Nam bộ daok pachreih hu rilo doanh nghiệp buh jien tame ngak mbang gah dom gah karei yau: thương mại dịch vụ, logistics, hạ tầng kỹ thuật, taneh riya sang danaok.

Hadei di tukvak tagok yaom glong 30 ribau đồng 1kg, urak ini baoh paneng di bhum taneran kraong Cuu Long daok trun yaom, daok meng 7.000 – 8.000 đồng sa kilo. Baoh paneng tok pablei tabiak di darak Trung Quốc, yau nan ye darak nan padeih blei ye yaom trun khang. Kayua yau nan ye, po bein njauk caik hatai tuk peih praong taneh pala phun paneng plaik njiak bruk pala rilo, oh hu urang blei.

UBND tỉnh Bình Dương bahrau tabiak mbaok song peih ngak iek radaih oh menuac peih di mangaok jalan công cộng di ban bahrau. Ni lac, danak dak kayua Công ty TNHH Becamex Tokyu pambuak bruk song dom gah lac: Phenikaa-X, Nippon Koei Vietnam peih ngak. Urang pal akaok UBND tỉnh Bình Dương cong lac, danak dak hu dong tame bruk patagok bruk nao mai công cộng song salih bahrau hadah krah njauk tui jalan ngak di bhum thông minh Bình Dương. Ni lac, mbang camereip radaih pajeng oh hu menuac peih hu ba tame pandar di jalan công cộng di Việt Nam. 

Sở Y tế Ban raya. Hồ Chí Minh brei thau bruk dut iek langyah trình tự gen brei mboh sa urang kumei ruak Đậu mùa khỉ chủng Monkeypox virut. Ini lac urang ruak Đậu mùa khỉ akaok meti di Viet Nam. Urang ruak lac kumei, umo 35 thun, daok di Ban raya HCM, tamuh ruak harei 18/9 tuk nao rivang ma-in dulịch di Dubai. Tuk thau bruk nan, Mentri Y tế hu panuac ieu UB bhap bini Ban raya HCM patui jalan jhul khang bruk peih ngak dom jalan pacang caga jit ruak, samar dut iek ruak langyah trình tự gen saong patui bruk dut iek jit, langyah sruh jit ruak, pa-atah gauk, taong ruak ka urang tui tacei patao di Mentri Y tế.

Po di Nobel “Y sinh” thun ni, hu ka urang ilamu Thụy Điển angan Svente Paabo. Urang ilamu, di truyền học urang Thụy Điển hu pok brei, kayua dom duah thau bahrau di ong ka bruk tiến hóa di anek menuac. Urang ilamu Svante Paabo ndik tapui thun 1955 di Stockholm, dahlau deih bac di sang bac Đại học Uppsala (Thụy Điển), Đại học Zürich (Thụy Sĩ) song hadei di nan lac sang bac Đại học California (Mỹ). Ong jeng Giáo sư di Đại học Munich (Đức) thun 1990. Thun 1999, ong padang tabiak Viện roh duah Nhân chủng học tiến hóa di Leipzig, negar Đức song ngak bruk di pak ni mbiah tal harei ni.

Page ini, bol lin Hàn Quốc khan lac Triều Tiên birau cuh sa tên lửa đạn đạo oh ka thau janih halei tame bhum tasik gah Timun taneh ia. Rayo papar binguk NHK di Nhật Bản jeng hu ba khaw tin meng Gah khik caga ar takik Nhật Bản brei thau Triều Tiên birau cuh tên lửa. Rajaei Nhật Bản hu panuac kakei bhap bini brei caik hatai hadei di bruk cuh tên lửa nan. Ini lac mbang cuh tên lửa ka 5 di Triều Tiên dalam sa adit.

Labaih 1,9 triệu urang umo taha di Thái Lan, urak ni, oh ka klauk vắc-xin pacang Covid-19 song dok dalam nyaom mbuan si njam ruak glong di abih urak ni. Mintri Y tế Công cộng Thái Lan dok ieu dom urang dalam nyaom ni song dom urang dok taom dar ngak catang dom jalan "siam mekre bahrau", dalam nan brei cuk pataih pacang mbaok, rao tangin, khik hacih saat labik dok song paatah di gauk. Cục Pasang iek jit ruak Thái Lan hu panuac kakei tong abih urang umo taha njauk klauk vắc-xin pacang Covid-19 dak samar dak siam, piah plaih ruak trak tagok,ba tal metai./.

Urang lang: Hani Pha & Bhumi – 04/10