Dalam ginum biai klak rabha ilamu peih ngak danak dak pakat negar patagok kinh te – xa hoi bhum urang bangsa takik saong bhum ceik vaktu 2021-2030 di harei 24/11, UB Bangsa caong khin dom jabat pambuak tal brei roh duah, ba tabiak jalan ngak, jak ba prein khang dom gah piah ngak salah danak dak, kuhria abih tih phun jien labaih 137.600 tỷ đồng, dalam nan hu kadung jien karja negar jaik 105.000 tỷ đồng. Danak dak Patagok LHQ di Viet Nam taong yaom Viet Nam ngak hu jak jeng bruk patrun kathaot biak njauk meyaom. Yau nan min, jien mek tame di baoh sang urang bangsa takik  di dom labik tok kuhria rah tapa hu meng 40 – 50% dalam negar. Danak dak Patagok LHQ pachreih brei pambak praong jalan jao brei adat kinh te ka urang kumei bangsa takik meng jalan ngak, cong nghe ngak tabiak pandap saong pabei salih birau.

Kapul urang Hội đồng Bangsa di QH bahrau ngak bruk haong UBND tỉnh Bạc Liêu ka bruk peih ngak sarak pato megru bhum bhap bini bangsa takik. Tukvak tapa, Bạc Liêu biak sangka tal bruk pato megru bhum bangsa takik tapa dom jalan ngak, dom sarak daong patagok. Tỉnh hu padang sang bac phổ thông bangsa gam bac gam daok, pilih ruah anek saih meng thun bac 2020-2021. Kapul urang Hội đồng Bangsa hu panuac ieu Bạc Liêu patui bruk peih praong sang bac, pato pakai gru pato mek hu tanut chuẩn, paglaong jang asal siam mekre bruk pato megru bhum bhap bini bangsa takik.

Tui khaw tin meng Mentri Y tế, meng akaok thun 2022 mbiah tal ini, dalam negar hu 314.271 mbang urang ruak pandiak tabiak darah, hu 115 urang metai. Kuhria mboh dahlau  ruak pandiak tabiak darah daok rah tabiak sraw kadau saong daok tagok jang. Abih di nyu lac bhum gah Barak saong bhum kreh negar, dalam nan dom tinh, ban hu urang njom ruak  gam gam tagok glong dom adit birau ini lac Hà Nội, Quảng Nam, Quảng Bình, Bình Thuận. Mentri  Y tế  iew dom tỉnh, ban peih ngak tui iek tani tanat langyah catang piah sruh jit ruak  pandiak tabiak darah  di labik drei; pruh jru hóa  chất taong abih dom baoh sang di labik sruh jit ruak.   

Harei ini, Tòa án bhap bini TP.HCM peih veik mbang sơ thẩm langyah, kaoh duas Nguyễn Võ Quỳnh Trang (SN 1995) haong Nguyễn Kim Trung Thái (SN 1985) dalam bruk uraniah kumei 8 thun metai kayua njauk taong paoh. TAND TP hu padang rạp langiu mblang bein di tòa praong 600 m2, caik màn hình LED piah ka bhap bini hu maong iek tapak mbang langyah, kaoh duas. VKS jeng daok khik tamo bruk truy tố Trang ka duas pametai menuac saong duas ngak pap urang karei. Daok bị cáo Thái njauk truy tố ka duac ngak pap urang karei saong pacang padauk menuac duas.

Labaih 2 bilan tapa, yaom pabui diuk di gah Meraong negar trun ala yaom phun jien raong. Rilo urang raong glang brei thau yaom pabui diuk pablei tabiak urak ini meng 50.000 – 56.000 đồng sa kilo, ba tal urang raong pabui khat lahik meng 5.000 – 10.000 sa kilo. Bruk nan karei jang dut saong jaik abih dom thun, kayua yaok thun, tuk puac thun bruk blei rilo pabui tabiak biak siam, yaom pabui bhian tagok saong tani tanat. Rilo urang raong rilo pabui var praong brei thau daok gaok kan kandah khang tuk dom đại lý, D.N meda tadok yaom pandap mbang ka athur.

 Ong Anwar Ibrahim bahrau tuyên thệ tagok ngak Thủ tướng Malaysia. Thủ tướng bahrau ini brei thau lac rajaei kayua ong pan akaok lac pasiam veik bruk kinh tế, tani tanat chính trị saong khik kajap bruk jum pataom di dom bangsa, dom agama. Ong Ibrahim 75 thun, lac urang ngak  chính trị lavik thun saong dahlau daih lac hạ nghị sỹ, bhian ngak praong dalam saman ong Mahathir ngak Thủ tướng, ong bhian ngak tal Phó Thủ tướng.         

Gilang pariak Dunya brei thau, jit ruak COVID-19 ngak bleik salih veik bruk trun kathaot dui atah yaok pluh thun  di Philippines. Thun 2018 urang kathaot di taneh ia ini lac 16,7%; bhap bini radiuk ginup mbiah jaik 12 trieu urang saong 44 trieu urang ngak mbang raidiuk tani tanat. Yau nan min, hadei jit ruak praong COVID-19, urang kathaot thun 2021 di Philippines tagok 18,1%. Ini lac  sa dalam dom taneh ia hu jien mek tame glong biar  karei di gauk glong abih di bhum Đông Nam Á.

Pantanal- bhum taneh dauk ia praong abih dunya, daok gaok kan kandah trak kayua biến đổi khí hậu. Rilo jalan ngak daok hu kham merat peih ngak piah khik caga inem krung dunya ini. Pantanal praong meng 140.000-195.000 km2, daok rilo dalam Brazil, peih praong tapa Bolivia saong Paraguay. Thun 2020, labik ini hu pui mbang khang abih dalam sajarah, palai pajoa 26% dom sinh vật saong pametai 17 triệu động vật hu talang raong. Urak ini Pantanal ini daok thu lagu jang kayua biến đổi khí hậu ngak brei ia hajan hu takik jang./.