Tapa nan, dom urang jakar hu mbaok mboh lac, Danak dak rik tame pamong iek veik  bruk peih ngak Sarak Nyaom roya XIII di Đảng  di dom bhum tasik, kaoh pulao meng kaok vaktu mbiah tal ini; taong yaom 5 thun peih ngak Sarak ka 36/2018 di BCH T.Ư mbang XII ka Bruk ngak mbang cak rok patagok kinh te tasik di Viet Nam suai lavik tal thun 2030, pamong tal  thun 2045. Tapa nan danak hu rik daong urang jakar, urang đảng, dom rairah bhap bini, urang lin bol pan phao karaong mboh cambaic laic  dom bruk hu makna praong dalam saong mbuan lagaih  di Taneh ia - Bhum tasik, tapa nan rik tame pabak hatung hatai anit ranam taneh ia, hadah mbaok meta, iek praong bangsa, kham merat khik bruk ngak po tasik gireih  di taneh ia, palei negar.

Sở Pato magru tỉnh Sóc Trăng brei thau, dalam thun bac 2023-2024, Sở ka oh peih bruk mek jien bac ngan haong labik pato magru mầm non, pato magru phổ thông công lập di dalam tỉnh. Sở ini jeng ieu kakei dom Jabat pato magru pakat huyện, ban sit pathau khan ka bruk ka oh peih bruk mek jien bac thun bac 2023-2024 tal dom labik pato magru saong anek saih, amaik ame anek saih di dalam ban hu thau. Tuk hu adat bahrau ye Sở Pato magru meda peih bruk mek jien bac tui adat.

 Urak ini, tỉnh Bến Tre hu labaih 2.000 gilai ikan ngak bruk di langiu tasik, dalam nan hu jaik 90% gilai hu brei harak adat brei chap mek kaya tasik; 86% gilai hu brei harak adat mac jamraih salamat. Piah khik iek gilai ikan chap mek kaya tasik suan hukum  oh hu khan brei thau saong tui bruk ba tabiak IUU, mbiah tal ini Bến Tre hu 2.002 dalam taong abih 2.034 kapal gilai  hu pagam mac jamraih  tui iek bruk ngak mbang angaok tasik, dom gilai daok veik  oh ka ngak bruk. Taong abih dữ liệu kapol kapal gilai  hu pabak ginup tame Cơ sở dữ liệu bruk taong chap ikan negar. Meng akaok thun tal ini, Bến Tre  oh ka hu gilai taong chap ikan suan hukum njauk negar langiu chap mek langyah tui hukum.

Kayua kein laba glaong nan ye jaik di ini, urang nong di dom bhum taneh kan yau ye bhum dhaong, bhum njom likhun, bhum Đồng Tháp Mười di tỉnh Tiền Giang salih meng phun padai tapa pala phun panat. Kayua hu padang ngak dom ar pacang khang kajap nan ye mblang taneh pala phun panat hu khik caga salamat saong cak rok patagok praong siam. Hadei di labaih 2 thun pala phun panat hu brei paik baoh. Di tukvak urak ini, baoh panat hu yaom meng 30-40 ribau đồng/kg, dut saong pala padai, urang nong pala panat hu jien mek tame glaong jang rilo mbang. Urak ini Tiền Giang hu labaih 15.000 ha panat, brei baoh 265 tạ/ha, mek hu labaih 270 ribau tấn sa thun.

Dalam 2 harei tapa, hajan praong gam ia ndik  ngak dauh ralo tỉnh, ban di bhum Nam Bo. Di Ban raya HCM, ia ndik tagok glong gam haong hajan praong ngak dauk veik rilo jalan mbak di bhum labik dhaong biar, tapen kraong, ribong. Dom quận 7,8, ban Thủ Đức, Gò Vấp, Quận 12, Tân Phú, Tân Bình, Bình Thạnh saong dom huyen bhum tapen duah dalam ia…gar jalan mbak, ia tame dalam baoh sang.  Hajan praong dui atah meng page  tal jalan pandiak harei 2/10 ba tal rilo jalan di Bình Dương dauk dalam ia, gar jalan, radaih padam mac, bhap bini nao mai kan kandah. Rilo jalan di ban Thủ Dầu Một daok gar cakak kayua duak ia.

Quốc hội Liby hu brei tapa hukum pilih ruah Tổng thống saong Nghị viện di taneh ia ini. Tui nan, dalam 240 harei meng di tuk Hukum pilih ruah hu brei tapa, Liby meda peih bruk pilih ruah Tổng thống saong Quốc hội tui jalan biak saron mbon, cambaih laih saong mek rahra ngak pasak. Dalam pathau khan anak Quốc hội ka bruk brei tapa Hukum pilih ruah bahrau, Akaok Quốc hội Aguila Saleh brei thau lac, yaok rahra dalam taneh ia jeng hu quyen hu mbaok tame pilih ruah dalam dom mbang pilih ruah Tổng thống saong Quốc hội anak tal tui Hukum pilih ruah bahrau.

Hoi dong giai thuong Nobel di Thụy Điển birau khan brei thau giải thưởng Nobel  y sinh 2023, meyaom dua urang ilamu Katalin Kariko urang Hungary saong Drew Weissman urang Mỹ kayua hu dom bruk roh duah  brei ngak tabiak patagok vaccine cong nghe mRNA pacang ruak COVID-19 hu siam. Hoi dong giai thuong  Nobel Thụy Điển brei thau: dom urang mek hu giai hu rik tame ngak brei pasamar bruk ngak tabiak vaccine oh ka bhian hu dalam tukvak rilo bruk praong ngak jhak tal prein yawa anek manuac di samar birau.

Dom urang metai dalam mbang tamuh jit ruak pandiak tabiak darah biak trak damak abih di Bangladet lac tapa 1.000 urang meng di akaok thun ini. Dom sang iek ruak daok jar var sangka labik daok ka dom urang ruak tuk jit ruak njom pambak biak samar di taneh ia hu rilo menuac ini. Rajaei negar ini daok jhul khang bruk pacang caga ruak pandiak tabiak darah, meng paglaong hatai sahaneng tal bruk kham marat pametai anek bọ gậy hadei di yaok mbang hajan.