Di mbang nyaom yaok bilan di bilan 11/2022 hu peih tabiak di dah page ini (1/12), Thủ tướng Phạm Minh Chính brei thau lac, anak tal daok hu rilo kan kandah, abih di nyu nan lac meng gah langiu pambak tame, caik ka khol drei njauk thau cambaih bruk, mek ilamo dalam bruk khik ramik piah ngak siam bruk ngak dalam bilan 12 – bilan puac thun 2022, ngak salah dom bruk bo Quốc hội jao. Pambuak tal dom bruk bahrau tamuh tagok, khol drei njauk kham marat ngak pasiam abih tih piah plaih bruk kurang xang manjek, jru tavao, pandap panda, patui veik klauk jru piah pacang caga ruak, khik tani tanat darak pasa salamat, siam makre, khang kajap, paglaong raidiuk, mbang ngui di bhap bini dalam tuk Tết, oh caik ka bruk kurang dom pandap panda pandar yaok harei, oh caik brei tagok yaom.

Mintri LĐTBXH bahrau hu harak ieu urang pan akaok Sở LĐTBXH dom tỉnh brei pathau khan bruk jien bilan saong thưởng Tết di doanh nghiệp brei ka urang ngak dahlau di harei 25/12 tal. Gam haong nan, dom tỉnh brei tacei pato, daong ka doanh nghiệp, menuac pandar urang ngak pasang iek, ngak njauk dom sarak brei ka urang ngak, yau ye jien bilan, jien thưởng haong dom bruk kein laba karei brei ka urang ngak njauk tui adat.

Dalam Danak dak bruk ngak negar patrun kathaot khang kajap thun 2023, UBND tỉnh Bình Phước hu ba tabiak jalan ngak lac trun 2.000 sang kan kathaot, dalam nan trun 1.000 sang kan kathaot bangsa takik, samu 2% dalam abih tih dom baoh sang bangsa takik. Gam tui di nan, khik ka taong abih dom baoh sang kan kathaot, jaik kathaot hu ginup kadha hu mbang tui dom sarak di kanja ka gah y tế, pato magru, sang daok, tín dụng, pato bruk ngak, ba bruk ngak, ba urang ngak tabiak negar langiu ngak bruk, ia hacih saong vệ sinh…

Akaok UB bhap bini tỉnh Đồng Nai bahrau mbaoh tangin tame harak brei peih bruk pasang iek, thanh tra thun 2023. Sa dalam dom asal kadha di bruk pasang iek thanh tra lac dom danak dak, pok thầu kayua Cty cổ phần Tiến bộ Quốc tế AIC haong dom Cty thành viên njauk thầu. Tukvak pasang iek dalam 10 thun, meng thun 2011 tal thun 2021. Langiu di nan, tỉnh Đồng Nai daok brei pasang iek bruk ngak njauk tui adat hukum ka bruk khik ramik đầu tư, quy hoạch, taneh riya, padang ngak ngan saong dom danak dak di dom huyện Long Thành, Nhơn Trạch saong Trảng Bom.

Urak ini, rilo labik di mangaok dom jalan roya nao tapa tỉnh Bến Tre njauk khut trak, abih di nyu nan lac di dom jalan Roya 57, 57B saong 57C, bruk dauk ia di dom labik mbaok jalan, ngak ka mbaok jalan njauk mbaih mbaoh, ngak kan kandah ka urang nduac radaih di mangaok jalan saong ba tal bala di mangaok jalan, ngak ka bhap bini biak haduh hatai. Urak ini Sở Jalan mbak pajeng ba tỉnh Bến Tre hu harak ieu Cục jalan mbak Việt Nam pathau khan Mintri jalan mbak pajeng ba patabiak bruk samar drah ka bala di labik jalan khut, gam tui di nan jeng brei padang ngak dom danak dak samar drah.

Liên minh Viễn thông dunya (ITU) kuhria mboh dahlau lac, thun 2022, 73% menuac urang umo labaih 10 thun di dunya hu takik di abih lac 1 baoh phone pan tangin. Dalam dom menuac urang umo mangaok 10 thun di dunya, jaik 3/4 dom menuac hu pandar bloh phone tangin, brei mboh prein khang peih praong bruk pabak Internet di mangaok dunya. Bruk ngak po phone tangin hu tagok tani tanat dalam dom thun jaik di ini. Tui urang kinh tế pakat glaong di ITU, menuac urang tame Internet jeng tagok khang dalam thun 2020 tuk jit praong COVID-19 bahrau tamuh tabiak

Châu Âu daok laik tame kan kandah kayua jalan nding ba khí đốt di Nga padeih ngak saong dalam tukvak katut panak, meda lac oh hu jalan piah langyah. Kayua yau nan ye, tui kuhria bruk sarau kadhau khí đốt di EU meda dak harei dak trak damak jang. Châu Âu daok duah jalan salih ka đốt jalan nding di Nga meng khí tự nhiên hóa lỏng meng Mỹ saong Trung Đông. Langiu di nan, châu Âu kurang dom jalan nding ba khí piah njuk khí đốt meng dom pabah lamnge pandar gilac veik khí di takai tasik Địa Trung Hải, tame dalam lục địa.

Janih bánh mì atah di Prang bahrau hu Gah Khoa học, Pato megru saong Ilamu di Liên hợp quốc pok brei angan lac inem krung ilamu  phi vật thể di dunya. Bánh mì meng kan tok hu ngak meng tapung, ia, baoh khi saong sara. Tukvak pandih tapung njauk dui atah meng 15 tal 20 mon di  nhiệt độ meng 4-6 độ C. Ahar atah, lamin, racam daok lac brei mboh ka bruk mbang menyum di Prang dalam 100 thun tapa. Yaom lac bruk blei bánh mì nyu trun meneing dalam pluh thun tapa, Prang jeng daok ngak tabiak jaik 16 triệu baoh yaok harei, samu 6 tỷ baoh sa thun./.