Page ini, Quoc hoi pang harak pathau khan saong Harak taong yaom bruk ramik veik dom asar kadha di Sarak 53 thun 2017 ka Pathau khan roh duah bruk peih ngak Danak dak mek veik taneh, bayar jien taneh, daong padang labik daok birau ka urang hu taneh mek ngak Mblang kapal haok dunya Long Thành, di tỉnh Đồng Nai. Tui Harak pathau khan di Rajaei, jien buh tame ngak Danak dak nan hu ramik pasiam veik trun labaih 3 ribau 730 tỷ đồng dut saong tuk camereip. Taneh njauk mek veik jeng trun 82 ha, min hu pabak tame dom bruk yau ini: brei padang labik daok ka dom baoh sang kayua mek taneh veik piah peih ngak 2 jalan tame labik daok di bhap bini, labik tái định cư Lộc An - Bình Sơn…Rajaei likau QH brei dui atah tukvak peih ngak Danak dak “mbiah abih thun 2024” salih ka bruk ngak salah dahlau thun 2021 yau hu ndem dalam Sarak.

Pathau khan di Ginum biai pakat dunya ka tasik Biển Đông mbang ka 15 ngan haong asal kadha “Patakik veik bhum tasik biển xám, peih praong bhum tasik hijao”, “daok hu peih tabiak di TPHCM, ong Martin Thümmel, urang iek gah Đông Á, Đông Nam Á saong Thái Bình Dương, Mintri Ngoại giao Liên bang Đức brei mboh hatai suh sah ka bruk catang tagok di tasik Biển Đông jaik di ini, abih di nyu nan lac bruk gilai cảnh sát tasik saong gilai bol lin tasik Trung Quốc ginuh tame dom sruh gilai di Philippines dalam bhum đặc quyền kinh tế di Philippines harei 22/10/2023. Ong Thümmel brei thau lac bruk ngak cambaih laih bhum tasik njauk ngak tui adat di hukum dunya, di Công ước Liên hợp quốc ka Hukum tasik thun 1982 (UNCLOS). Brei thau di Toà Trọng tài thun 2016 hu yah klak dom yêu sách quyen sajarah di Trung Quốc, tui nan oh hu kadha halei di Biển Đông hu bhum đặc quyền kinh tế 200 hải lý.

UBND TP.HCM birau patabiak harak van ban ka bruk brei mek jien bac học kỳ I thun bac 2023 -2024 di dom labik pato bac di karja dalam ban raya. Jien bac samu haong thun bac 2021 -2022. Jien bac parabah tui 2 nyaom bhum taneh: Nyaom 1 lac anek saih di Ban Thủ Đức, Quận 1, 3,4,5,6,7, 8, 10, 11, 12, Bình Thạnh, Phú Nhuận, Gò Vấp, Tân Bình, Tân Phú, Bình Tân meng 60.000 - 200.000 đồng. Jien kak tame glong abih dalam nyaom 1 lac nhà trẻ ngan haong 200.000 đồng sa uranaih sa bilan, biar abih lac THCS saong bổ túc THCS lac 60.000 đồng sa anek saih sa bilan, tiểu học oh mek jien bac. Nyaom ka 2 lac anek saih di dom huyen Bình Chánh, Hóc Môn, Củ Chi, Nhà Bè, Cần Giờ, jien mek tame meng 30.000-120.000 đồng. Jien kak tame glong abih lac nhà trẻ 120 ribau đồng sa uranaih sa bilan, biar abih lac THCS saong bổ túc THCS lac 30.000 đồng sa anek saih sa bilan, tieu hoc oh mek jien.

Di tỉnh Sóc Trăng, kadung jien pachreih bac ia tasau đậu nành Việt Nam pambuak haong Cty ia tasau đậu nành Việt Nam Vinasoy bahrau ba tabiak danak dak “Dinh dưỡng samu ka rai hadei”. Ini lac bruk ngak patui veik di jalan ba kaya dinh dưỡng siam makre meng langik tasik tal dom adei anek saih di grauk labik dalam negar hu Kadung khang kajap peih ngak di rilo thun tapa. Bruk bahrau dalam danak dak ia tasau di sang bac thun ini lac pataom tame pamaong tal dom anek saih THCS. Tui nan, dalam tukvak I thun bac ini, Danak dak pabak oh mek jien labaih 405.000 pa-op ia tasau ratak đậu nành Fami Canxi, hu yaom 1ty 850 trieu dong ka labaih 33.000 anek saih THCS di 63 sang bac di 5 huyện: Kế Sách, Mỹ Tú, Mỹ Xuyên, Thạnh Trị saong Trần Đề.

Hadei di tukvak jhul, urak ini danak dak tatua Rạch Miễu 2 di tỉnh Tiền Giang daok ngak dalam suai damuai kayua gaok dom kan kandah, tavak tavaiy, abih di nyu nan lac mbaok taneh. Bruk nan kayua dom gah chức năng pak ini brei takik pajeng betong mai labik padang ngak; điện Trung hạ thế oh ka hu langyah ngak suai bruk kuac hluk jaik got pasei mố M39 di tatua praong; dom baoh sang bhap bini oh ka panduan nao labik karei ngak suai tal bruk padang pacang njom ia tame taneh, cuah daok kurang …

Tổng thống Mỹ Joe Biden brei thau lac ong oh haduh hatai ka dom cuang kandah dalam bruk pilih ruah thun 2024 hadei di tuk urang hu pilih ruah tame ndang Cộng hoà, ong Mike Johnson hu pok tagok ngak Akaok Hạ viện. Nghị sỹ Mike Johnson, lambaok ka bang Louisiana, lac urang dalam mban pan akaok Ndang Cộng hoà di Hạ viện hu pok tagok ngak Akaok jabat ini di harei kabroi. Ong lac sa luật sư ngak gah dom bruk sarak saong lac urang jaik taphia haong Tổng thống dahlau deih ong Donald Trump.

Dalam mbang ginum biai haong Tong thong Colombia Gustavo Petro daok hu mbang rivang kapat karja di Trung Quốc, Chủ tịch Trung Quốc Tập Cận Bình brei thau paglong bruk pambuak gauk Trung Quốc - Colombia tagok jeng pambuak bruk suai lavik saong pachreih Colombia samar hu tame Sang kien “Vành đai, Jalan mbak”. Ong Tập Cận Bình ndom lac bruk padang talei rohim pambuak Trung Quốc saong Colombia lac bruk kham merat suai lavik di bhap bini dua taneh ia saong brei mboh hatai jia gauk jeng yau talei pambuak bruk di dua gah. Trung Quốc abih hatai pambuak haong Colombia jhul patagok talei pambuak bruk praong piah ba mai kein laba siam jang ka bhap bini dua taneh ia, pabak prein khang ka bruk sron mbon saong patagok di dunya.

Tổng thống France ong Emmanuel Macron harei kabroi hu panuac lac Israel meda gaok bruk ngak suan mayah peih bruk taong praong tame dải Gaza, gam tui di nan jeng brei thau lac bol lin France meda payua chiến hạm đa nhiệm praong ka 2 di France Tonnerre tal dải Gaza hu mbaok tame dom bruk daong pahla. Hadei di mbang nao rivang Israel piah brei mboh hatai jumpataom gauk, Taong thong France Emmanuel Macron harei kabroi hu tal Ai Cập dalam bruk kham marat pacadu veik bruk mesuh metak di Israel saong kapul Hamas daok pambak praong. Gam tui di nan jeng brei thau lac klau bruk ngak bahrau di abih di France pak di labik urak ini lac pacang caga haong kol khung bo, daong khik rahra saong daong bruk ngak pahla saong puac di abih lac duah jalan langyah ka chính trị./.