Danak dak jalan Vành đai 3 Ban raya HCM

Patui danak dak mbang nyaom ka 11, page ini, UB thường vụ QH brei panuac ka bruk pok tagok QH pasang iek, ba tabiak jalan brei buh jien tame ngak Danak dak jalan Vành đai 4 Ban Ine Ha Noi; Danak dak jalan Vành đai 3 Ban raya HCM. Danak dak jalan Vành đai 3 Ban raya HCM kuhria abih tih jien buh tame labaih 75 ribau 300 tỷ đồng, nao tapa Ban raya HCM, Đồng Nai, Bình Dương, Long An atah abih tih jiak 92 km. Danak dak daok dalam dom danak hu makna praong di Negar, peih ngak meng thun 2022 mbiah tal thun 2027.

Uan harei Phật đản thun 2566 Phật lịch, thun 2022 saka ia harei, harei 12/5,Ủy viên mintri Chính trị, Phó Thủ tướng Thường trực Phạm Bình Minh hu mai rivang tadhau yhut Trung ương Giáo hội Phật giáo Việt Nam song tăng, ni, phật tử. Phó Thủ tướng Phạm Bình Minh ndom lac, Đại lễ Phật đản lac tuk piah ka dom tăng, ni, phật tử gam song bhap bini dalam taneh ia ba gauk pamong tal Đức Phật Thích ca mâu ni, jang yau jalan ngak agama bangsa, nan lac: "Từ bi, hỷ xả, chân, thiện, mỹ". Thun 2022 lac thun biak prong di Phật giáo Việt Nam ngan song bruk peih ngak Đại hội Phật giáo Việt Nam mbang ka 9, Phó Thủ tướng jia lac Giáo hội Phật giáo Việt Nam hu peih ngak jak jeng Nyaom roya ngan song jalan ngak "Agama. Bangsa -Chủ nghĩa xã hội".

Tapa bruk pasang iek, Thanh tra tỉnh Tiền Giang duah mboh rilo bruk suan di Sở y tế saong dom jabat di Sở dalam bruik blei pandap panda y tế, sinh phẩm, kít dut iek ruak, vaccine; jru pang caga jit Covid-19 di tỉnh Tiền Giang. Tui panuac tamat bruk pasang iek, dalam 2 thun pacang caga jit, gah y tế Tiền Giang hu 3 paok thầu yaom jien praong hu blei dalam thun 2020 min ngak oh ka ginup harak gal tui bruk ba tabiak; hu paok thầu oh ka taong yaom hu abih piah thau lac tukvak pok tagok bruk brei buh jien tame ngak tui bruk ba tabiak di karja; dom pok thầu blei min oh ka pasang iek taong yaom daok kandong veik piah padang angan blei tame tui bruk khin pandar.

Tui Tổng công ty Đầu tư patagok jalan nduac samar Việt Nam (VEC), tal puac quý 3-2022, tong abih 5 jalan nduac samar kayua jabat ni khik ramik hu pandar bruk mek jien điện tử oh padeih (ETC).Dalam nan hu jalan nduac samar ban raya HCM - Long Thành - Dầu Giây, Bến Lức - Long Thành.

Yaok rituh baoh sang urang raong ikan padoc ikan klaik di Trà Vinh daok khat lahik trak kayua pandap mbang tagok yaom, dalam tuk ikan takik hu labik pablei. Urak ini ikan padoc yaom meng 28.000 tal 32.000 đồng sa kilo tui yaok janih saong biak kan pablei. Ngan saong yaom ini urang raong khat meng 5.000 tal 6.000 đồng sa kilo. Piah trun bruk khat lahik, rilo baoh sang raong palih ruah jalan mek ikan tagok tui hatai piah pablei di dom darak meng kan dalam tỉnh.

Mesup ni (12/5), Trung Quốc daok tabiak panuac brei thau ka hajan praong di tanut sambo katam, lac tanut trak ka 2 , tok hadei di tanut “báo động đỏ” di labik gah merong taneh ia; Dalam nan, dom tỉnh Quảng Đông, Quảng Tây hu hajan biak khang Dom labik di Quảng Đông, Quảng Tây song Phúc Kiến hu hajan biak khang tagok tal 100-180 mm, hu labik 250-280 mm. Mbang hajan khang mbang ni di labik gah merong Trung Quốc meng harei 9/5 ngak ka ia sua di mangaok 18 krong yam tapa tanut báo động.

Mentri Y tế Công cộng Thái Lan Anutin Charnvirakul njauk hatai brei peih 1 bruk pasang iek piah duah thau kayua habar metai di dom urang njom Covid-19 yaom lac hu klauk ginup 3 mbang jru vaccine. Ong brei thau oh hu urang halei metai dalam dom urang hu klauk blaoh 4 mbang jru. Labaih 7% dalam dom urang njom Covid-19 hadei di tuk hu klauk ginup klau mbang jru vaccine metai. Dalam dom urang metai rilo meng lac dom urang umo thun praong saong dom urang hu ruak dahlau dalam rup.

Tui pathau khan di jabat pasang iek pandap mbang Ca-na-đa, jit kum menuh ada H5N1 dok tamuh khang di taneh ia ni ngak ka 1,7 triệu drei menuk ada metai song ba nao am cuh klaak , Alberta lac tỉnh njauk khat lahik trak di abih ngan haong 900.000 drei. Taphia di nan, Ca-na-đa jeng duah mboh dom athur rong hu tasau njauk njom ruak kum menuk ada. Urak ni, dom urang roh duah jeng dok tui iek catang piah duah thau anek ruak ni meda njom mbak tapa menuac halei oh./.

Urang lang: Hani Pha – Bhumi – 12/05