Patui danak dak Mbang nyaom ka 6, harei ini Quốc hội tame adit ngak bruk ka dua. Dalam harei ini, dom urang lambaok ka Quốc hội hu ginum biai di hội trường ka bruk peih ngak dom Sarak di Quốc hội ka dom Danak dak bruk ngak negar ka padang ngak palei pala bahrau tukvak 2021 - 2025, patrun kan kathaot khang kajap tukvak 2021 - 2025, cak rok patagok kinh tế - xã hội bhum bangsa takik saong bhum ceik tukvak 2021 - 2030. Kuhria tal puac bilan 8 thun ini, abih tih phun jien ka đầu tư peih brei 3 danak dak bruk ngak negar lac 16 ribau 300 tỷ đồng, bahrau mek hu jaik 48% jalan ba tabiak. Patrun kan kathaot ka oh mek hu bruk ba tabiak di parilo gah, khang kajap, abih di nyu nan lac bhum mikva bangsa takik, bhum ceik.

Tui Mintri ngak nong saong patagok palei pala, jien pablei brah tabiak negar langiu dalam 9 bilan tapa mek hu 3,66 tỷ đô la Mỹ, rilo jang labaih 40% duk haong tukvak ini thun blaoh. Ini lac yaom tagok glaong abih dalam labaih 10 thun tapa. Tui Hiệp hội Lương thực Việt Nam, meng yaom brah pablei tabiak negar langiu di Việt Nam daok dang akaok darak pasar yau urak ini, jien mek tame di gah padai brah hu siam jang duk haong dom thun dahlau. Min piah khik hu siam mekre di bruk pablei brah tabiak negar langiu tuk yaom padai daok tagok glaong yau urak ini, dom doanh nghiệp pablei tabiak negar langiu brei hu jalan ngak suai lavik 

Ban Thông minh – Bhum salih bahrau hadah krah Bình Dương hu Mbang nyaom Cộng đồng thông minh dunya (ICF) pok mayaom angan rahra thông minh di thun Top 1 ICF 2023. Piah hu ICF pok mayaom, Bình Dương hu yam tapa dom kapul karei biak naih mai meng dom taneh ia yau ye Mỹ, Brazil, Canada, Úc. Yau nan, Bình Dương lac ban thông minh camriep di Việt Nam hu pok mayaom lac ban thông minh di dunya. Dahlau di nan, Bình Dương 5 mbang gam daok dalam Top 21 (Smart21) saong 3 mbang gam daok dalam top 7. 

Bahrau ini, takai tasik huyện Ba Tri, tỉnh Bến Tre daok njauk ia tasik mbang tame, ngak jaleih takai tasik rilo. Labik glut jaleih atah 4,7km, ngak lahik rilo taneh ngak mbang di mikva saong taneh glai pacang caga tapen tasik, ngak kan kandah tal raidiuk, bruk ngak mbang di labaih 4.500 sang. Tui panuac likau di tỉnh Bến Tre, Rajaei hu buh brei 200 tỷ đồng daong ka tỉnh peih ngak danak dak “Pacang caga glut jaleih takai tasik huyện Ba Tri”. Danak dak ini hu  ngak ye bruk glut jaleih di Bến Tre hu pacang veik.

Miuyim tỉnh Bình Thuận bahrau peih tal pato puac Ariya di urang Cam pak huyện Bắc Bình, dui pachreih hu jaik 30 urang bac lac halau janeng, urang daong bruk, urang ilamo padeih huu saong dom anek kamuan lac urang Cam hu mbaok tame bac. Ini lac sa dalam dom asal kadha di Danak dak 6 dalam Danak dak bruk ngak negar 1719 tukvak 2021-2025 daok hu peih tabiak di tỉnh Bình Thuận, lac Padang ngak danak dak patagok dom yaom glaong di Harei mbang Katê di urang Cam; tal pato ilamo ngak lan am meng kan di urang Cam; Khik ramik saong patagok dom yaom glaong ilamo parang iek ilamo meng kan, lac: kadha daoh tamia meng kan, kadha daoh di bangsa Cơ Ho; Padang ngak bruk “Gilang peih” di Paok pataom ilamo di Patao Cam.

Rajaei Indonesia bahrau brei thau pok sarak kinh tế pandar gilang pariak karja piah patrun patakik kan kandah meng bruk El Nino saong piah pacang haong bruk srau kadau kinh tế. Dalam nan rajaei Indonesia kaoh tabiak meng kadung jien karja labaih 167 triệu USD piah pabak 10 kg brah ka yaok baoh sang, brei jien mbaok 200.000 rupiah yaok bilan (lac 12,5 USD) ka yaok urang dalam 2 bilan jhung thun ini. Gam haong nan, jhul samar bruk peih jien mesraiy ka doanh nghiệp sit saong oh mek jien thuế giá trị gia tăng ngan saong dom hợp đồng pablei salih sang bharau yaom mala 2 tỷ rupiah (lac jaik 125.400 USD). 

Hàn Quốc bahrau peih ngak harei pahadar sa thun rahtabiak bala juak gauk di Itaewon ngak ka 159 urang metai saong jaik 200 urang karei njauk rambuac. Dom blah áp phích saong bingu pahadar dom urang gaok bala hu caik di khu phố Itaewon. Brei panuac di harei pahadar di nhà thờ Youngahm di Seoul, Tổng thống Yoon Suk Yeol brei thau lac: “Rajaei Hàn Quốc hu kham marat piah tani tanat an ninh, salamat dalam taneh ia di dalam thun tapa saong sanya lac patui veik paglaong dom kham marat ini”. Tổng thống Suk Yeol gam tui di nan jeng payua panuac pandik harao tal dom baoh sang urang gaok bala metai dalam bala juak gauk rahtabiak di khu phố Itaewon di harei 29/10/2022.

Gah Hamas di Gaza tabiak panuac lac halan hatian ginum biai ka bruk peih palao dom menuac njauk Hamas cap mek di harei 7/10 piah salih mek bruk peih palao taong abih dom urang Palestine daok njauk kreik dalam dom sang guk di Israel. Thủ tướng Israel Benjamin Netanyahu jeng ndom lac, Kapul iek gah mesruh metak di rajaei hu ginum biai ka bruk meda mbaoh tangin tame sa harak, dalam nan hu salih gauk taong abih dom urang guk Israel saong Palestine, min ong brei thau lac oh ba tabiak bruk ginum biai ini./.