Patui khan ka dom khat lahik kayua rabuk ka 3. Kuhria tal jala ini 9/9, rabuk ka 3 saong ngin hajan meng rabuk ka 3 ngak brei 59 urang matai saong lahik, jaik 250 menuac njauk rambus. Dalam nan hu 44 urang matai kayua glut jaleih taneh saong ia sua. Cao Bằng lac tỉnh njauk khat lahik biak trak ka menuac urang tuk hu 21 urang matai saong lahik; patui di nan lac dom tỉnh, ban Lào Cai, Quảng Ninh, Hải Phòng, Hòa Bình, Yên Bái, Lạng Sơn, Bắc Giang, Tuyên Quang, Hà Giang. Di tỉnh Phú Thọ, tatua Phong Châu  pambuak 2 huyện Tam Nông saong Lâm Thao mesup ini jaleih trun kraong. Tỉnh Phú Thọ hu ba menuac mai daong khik caga siam mekre salamat saong tacei ba jalan ka radaih nao mai. 

UBND tinh Ca Mau bahrau hu harak payua Mintri Kế hoạch - Đầu tư pok panuac likau daong labaih 1.300 ty dong piah ngak pasiam bruk glut jaleih takai tasik Đông. Tukvak tapa, tinh Cà Mau hu ieu pataom yaok prein khang piah pasiam veik dom khut tayah kayua glut jaleih. Min, kayua bruk glut jaleih biak praong, rilo labik glut jaleih trak oh ka hu pasiam kayua kurang jien padai. Cà Mau hu 254km takai tasik, glut jaleih ngak brei lahik 5.250 ha taneh saong glai pacang caga, samu haong taneh kuhria rah tapa di sa xã.

Ban Sóc Trăng, tỉnh Sóc Trăng bahrau brei thau Sarak di Uỷ ban Thường vụ Quốc hội ka bruk rami ramik đơn vị hành chính pakat xã tukvak 2023-2025 di tỉnh Sóc Trăng. Tui sarak, hu 11 đơn vị hành chính pakat huyện, lac 1 ban,  2 ban sit saong 8 huyện; 108 đơn vị hành chính pakat xã, hu 80 xã, 16 phường saong 12 ban sit. Ong Trần Văn Trí, akaok UBND ban Sóc Trăng brei thau, đơn vị hành chính bahrau, hu padang tagok hadei di rami ramik hu khik kajap bruk ngak, oh ngak brei srau kadau tal bruk hit ngak mbang saong raidiuk di bhap bini, bruk ngak mbang pablei salih di dom đơn vị, doanh nghiệp.

Tui So Cong thuong TPHCM, urak ini hu 2 urang buh jien tame ngak hu panuac ieu brei pasang iek piah ngak danak dak dien angin langiu tasik huyen Cần Giờ. Danak dak camereip lac dom danak dak sang mac dien angin langiu tasik hu prein khang abih tih 1.000MW di 2 labik tapen tasik dom xa Lý Nhơn, Long Hòa saong ban sit Cần Thạnh, huyen Cần Giờ. Danak dak ka dua lac sang mac dien angin di langiu tasik Cần Giờ haong prein khang 6.000MW, piah ba dien tagok jalan dien negar saong piah ba tabiak hydrogen hijao dalam tukvak hadei thun 2030. 

Dom harei tapa, mikva Khmer di palei Xóm Lớn, xã Châu Điền, huyện Cầu Kè, tỉnh Trà Vinh chreih chrai kayua hu nao angaok jalan bahrau. Bruk njauk iek praong lac jalan menyek samu tapak atah 1.500 mét hu labaih 30 sang mikva urang Khmer alin brei taneh. Ong Văn Tiên, sa dalam dom menuac alin brei taneh ngak jalan brei thau, jalan bê tông dahlau daih praong labaih 1 mét min, saong nyu mbaih khut khang. Tuk palei brei ngak jalan saong peih praong tabiak tui jalan ngak lac “Karja saong bhap bini ba gauk ngak”, ong Tiên saong mikva njauk hatai pachreih tui chip. 

Yagi – rabuk ka 11 dalam thun ini di Trung Quốc hu khik bruk rabuk khang dalam luac 64 tuk, ngak brei khat lahik trak di rilo labik di negar ini dalam dom harei tapa. Dom chuyen gia langyah lac bruk pambuak gauk kan gaok di rilo kadha ngak patagok prein khang oh ka bhian hu di Yagi, nan lac: angin yuk khang di tasik Đông, do am glaong meng dom mbang rabuk nhiet doi gam haong khi quyen lagaih ka bruk ngak jeng dom mbang rabuk. 

Harei ini, Triều Tiên hu peih ngak rilo bruk pahadar 76 thun harei harei padang taneh ia Cộng hòa Dân chủ Nhân dân Triều Tiên. Dalam harei kabroi, dom urang jakar pakat glaong di Triều Tiên hu mai ravang Cung điện Ia harei Kumsusan, labik kabo di aruah Chủ tịch Kim Nhật Thành saong Kim Jong Il. Triều Tiên jeng hu peih mít tinh langiu langik saong peih payak praong di ban ine Bình Nhưỡng. Dom bruk pahadar hu mbaok di dom urang hu buh prein ka taneh ia saong dom menuac buh prein tabiak ngak hu rilo bruk praong dalam ngak bruk.

Tui Uy ban Pato megru di Quoc hoi Hàn Quốc, dalam 5 thun tapa hu labaih 32.000 gru patao padeih bruk dahlau di thun padeih huu, tok kuhria di thun ini lac hu labaih 3.300 gru pato klaak bruk di drei. Ini lac bruk njauk duh hatai ka gah Pato megru negar ini. Dom chuyen gia mboh lac, padeih bruk patagok lac kayua dom asal kadha, hu gam bruk iek praong ngan haong bruk pato megru trun biar, kan kandah dalam bruk pasang iek anek saih saong bruk jien bilan, sarak oh njauk hatai.